Jăt ală jơnau yal, jơnau đơs tàm dơ̆ pơrjum, bơta tam lơh ling klàng tàm Trung Đông pơn jăt tai gơbàn mhar, ờ ƀươn soh, kal ke gơtùi gĭt lài, lơh gơrềng tơn tus drà tăc mờ giă năng lượng gùt plai ù, tàm hơ̆ geh Việt Nam. Kơnòl broă tơngai tus, Thủ tướng Cíñ phủ sồr ờ gŏ di lời ờ tơl drà tăc xăng zờu, bañ lời gơkòl lơh sa, kă bro, bañ lời roh kơ̆ kơl jăp, rơndăp tăp sèng niam lơngăp lơngai jơh gùt mpồl bơtiàn. Thủ tướng Cíñ phủ tơngkah ală broă lơh lơh sa, kă bro xăng zờu pal niam song, kơryan prăp pồn phan, tơngguh giă, ơn prăp ơm kơ̆p gơguh giă, tơrgùm prăp, lơh gơbàn ờ niam drà tăc blơi, ală anih lơh broă geh gơrềng mŭt lơh broă dră wơl tăc blơi kơñau gan nhàr lơgar, kràñ cê kơ̆ nùs bơsong tơl pràn pơhìn ală cau lơh tìs.

Bè jŏ tơngai, Thủ tướng Cíñ phủ sồr Ƀộ Lơh sa mờ măy mŏk mờ Kă bro phan pal pơgồp bal mờ ală ƀộ, anih lơh broă kơlôi sơnơng broă lơh bơsong nàng gờñ tơngguh uă pràn jak rơcăng lài is năng lượng dà lơgar dê, bè pơn jăt tai lơh rơ̆ ru drà tăc mờ tơngguh uă jơnau tơl pràn rơcăng is năng lượng. Kơlôi sơnơng pơn jăt tai rơndăp tăp sèng wơl ală anih tờm kă bro xăng zờu; tơngguh uă pràn jak ơn prăp năng lượng dà lơgar, lơh geh jơnau sồr lơngăp lơngai năng lượng jŏ tơngai.