Tàm dơ̆ hòi điện thoại cribơyai, Thủ tướng ồng Phạm Minh Chính dùl dơ̆ tai nting bơr chờ hờp bal mờ lơgar Singapore neh bơyai lơh geh cồng nha dơ̆ tĕ khà. Thủ tướng pin dờn là mờ gơnoar broă mờ làng bol lơgar Singapore neh jàu kơnòl, Thủ tướng ồng Lawrence Wong rơ̆p pơn jăt tai tề lam, lam dà lơgar Singapore sơrlèt rlau ală bơta lòng, pơn jăt tai bơtàu tơngguh kơ̆ kơl jăp, pas sơm gam sùm.

Cribơyai bè gĭt gơ̆p đah Việt Nam mờ Singapore, Thủ tướng ồng Phạm Minh Chính sồr 2 đah lơh pràn lơh broă bal lơh sa, rề ơnàng bơcri priă lơgar Singapore dê tàm Việt Nam, ngan là tàm ală broă măy mŏk pa, năng lượng lơh geh wơl, phan bơna ngăc ngar mờ bơtàu tơngguh tiah drà kơ̆ kơl jăp; tơnguh tai lơh broă bal tàm ală broă tăc đèng càl mờ lơgar ndai, tàm pơgơl tíñ cỉ carbon, tam gơl pa priă jền, bơtàu tơngguh anih ơhò dà lềng ơm mờ rơcăng, dră cau lơh tìs gan nhàr dà lơgar. Bàr Thủ tướng dồ nùs ring bal rơ̆p cribơyai loh làng bè lơh broă bal 2 gah mờ ală broă ndai di dơ̆ Pơrjum Kâp dờng Asean mờr tus tàm lơgar Malaysia.