Tàm dar pơrjum, Mpồl duh broă bơyai lơh kờp sền nền wơl jơh ală kơnòl broă, broă lơh rơcăng ai Pơrjum dờng Tàm pơrlòng gơboh lơgar gùt lơgar dơ̆ XI geh lơh tàm ngai 26 mờ 27/12 nam do; mơkung sền swì ai gùng dà broă lơh bè broă sền swì pà sră jờng rơ “Khin cha jak chài mpồl phàu crong làng bol”, “Khin cha jak chài Lơh broă” ai ală mpồl cau mờ cau nă să is in. Pơrjum dờng Tàm pơrlòng gơboh lơgar gùt lơgar là broă lơh cíñ trị dờng màng bơh dà lơgar dê, sền wơl gơl gùng tàm pơrlòng 5 nam do – dùl tơngai lơh broă is ồn ngan, uă broă ờ hềt tŭ lơi geh bơh lài. Pơrjum dờng gam là tiah tìp bal, lơh gơrề nùs nhơm gơboh lơgar, bơta kơ̆p kờñ brồ guh, kơ̆p kờñ ngan tă pơgồp dà kơlhề bơh jơh gùt jơi bơtiàn dê, pờ gơlik dùl tŭ tơngai tàm pơrlòng pa, ai dà lơgar bơtàu tơngguh pas pràn, pas sơm, jak chài, gơboh gơbài.

Đơs pơndŭt dar pơrjum, Thủ tướng ồng Phạm Minh Chính jờng rơ ală mpồl dềt neh lơh ngan uă ngan tơrgùm lơh jăt niam ală kơnòl broă tàm broă lơh rơcăng bơyai lơh Pơrjum dờng Tàm pơrlòng gơboh lơgar. Thủ tướng tơngkah pal lơh jăt mơ tơn broă lam lơh ală ràng tơlik yal tơnggĭt broă lơh geh lơh sa – mpồl bơtiàn dà lơgar dê tơnơ̆ 40 nam tam gơl pa; ràng tơlik rùp mờ tơngume “Tàm pơrlòng gơboh lơgar – tài dùl Việt Nam pràn kơldang”. Bal mờ hơ̆ bơyai lơh yal tơnggĭt bè Pơrjum dờng lơh kah wơl pràn kơldang nùs gơboh lơgar, pơñiờ să jơi bơtiàn, lơh gơrề jrô ơnàng làm uă srơh tàm pơrlòng tàm mpồl bơtiàn, lơh geh bơta gơn kơnờm, lơh gơlik jơnau gơdan ai bơtàu tơngguh dà lơgar in tàm ală nam pơn jăt tai.