Tàm dơ̆ wă, Thủ tướng đơs sùm, lơgar Việt Nam sùm sền dờng màng mờ kơ̆p kờñ sùm bơtàu tơngguh gĭt gơ̆p lơh bơyô ờs mờng bơh yau mờ Cau lơh broă bal jŏ jòng tơl làm mờ lơgar ală ƀang Nga. Thủ tướng đơs niam broă Tập đoàn neh bơtàu tơngguh sơrbăc mhar mờ neh di tŭ lơh broă mờ ală tập đoàn, mpồl lơh sa kă bro dờng lơgar Việt Nam dê tàm tơngai lài; sồr tập đoàn bơcri priă uă rlau tai tàm Việt Nam, ală mpồl lơh sa kă bro 2 đah lơh broă bal kơ̆ kơl jăp, geh cồng nha rlau tai nàng lơh jăt ngan ngồn ală jơnau ring bal bơh đơng lam kâp dờng dê.

Ưn ngài Thủ tướng ồng Phạm Minh Chính lời tŭ jiơ wă, ồng Vladimir Petrovich Evtushenkov pà gĭt AFK Sistema là tập đoàn làng bol dê lơh is dờng ngan rlau jơh lơgar ală ƀang Nga dê mờ pơgăp 300 rbô nă cau lơh broă, kă bro uă gah broă: viễn thông (yal tơnggĭt), drơng broă sa priă sồ, măy mŏk pa, kă bro phan điện tử, lơh sơnơm, lơh sa mờ măy mŏk dơm chi mờ lơh hìu mờ dơm chi, broă lơh sa sươn sre, phan bơna sơnơm tơm ba, drơng broă sa priă ơm bĭc apah…

Ồng đơs nền rơ̆p lơh ngan lơh pràn lơh broă bal mờ đah Việt Nam tàm ală gah broă mờ Thủ tướng neh sồr lơh; crăp rơcăng tàm jàu măy mŏk, bơto niam cau lơh broă ai đah lơgar Việt Nam in nàng cèng wơl cồng nha mờ bơta kwơ jŏ jòng ai jơh bal bàr đah in.