Mpồl neh lòt sền ngan ngồn tàm Tiah lơh sa mờ măy mŏk Hoà Phú, Tiah lơh sa mờ măy mŏk Phú Xuân mờ Rơndăp broă lơh Hìu sơnơm Uă gah Buôn Hồ. Đơs tàm dơ̆ lòt sền, Ƀí thư Tỉñ ủy càr Dăk Lăk ồng Lương Nguyễn Minh Triết đơs wih đơs wơl ală tiah lơh sa mờ măy mŏk ăt gơnoar broă kwơmàng tàm gơchồl bơtàu tơngguh lơh sa mờ măy mŏk, tam gơl rơndăp tăp sèng lơh sa mờ lơh gơlik broă lơh.

Ồng Lương Nguyễn Minh Triết sồr Anih duh broă Làng bol càr sồr ală sờh, gah sơrbăc mhar tă bơsong kal ke, lơh mhar tơngai pơrgon lơh gơl gùng tờm mŭt tàm Tiah lơh sa mờ măy mŏk Hoà Phú, ală anih pà sàng goh, hìu măy lơh bơsong sồ siă sang tơrgùm bal; mơkung gờñ săc rwah cau bơcri priă phan bơna Tiah lơh sa mờ măy mŏk Phú Xuân.