Tàm Tiah bơtô ƀồc ồng Trần Phú, Tổng Ƀí thư bơh chờm Đảng Kộng sản Việt Nam dê, Tổng Ƀí thư ồng Tô Lâm bal mờ Mpồl lơh broă Dà lơgar tus pơdơng bơkàu, chu ñàng kah kơlôi, tơlik nùs nhơm jơh nùs ki ngàm, gĭt ưn ngài mờ bơta kah rơngal uă ngan gơ wèt mờ ală dà kơlhề, tă pơgồp ơn pơdơng dờng ngan bơh ồng dê tàm broă lơh kăc màng pơnrơ ngan bơh Đảng dê mờ bơh jơi bơtiàn Việt Nam dê. Krơh nùs nhơm kăc màng, nùs nhơm khin cha bơh cau ling kộng sản niam bơnĕ ngan, kơ̆ dơn dòn song, khin cha bơh ồng Trần Phú dê sùm gơcrà àng, nàng ală rơnàng kwang bàng, đảng viên mờ ală rơnàng làng bol he bơsram, đòm jăt.

Pơn jăt hơ̆, tàm Tiah Tềl lời wơl Kah yau kâp dà lơgar is ồn Sơnĕ pe Đồng Lộc, Tổng Ƀí thư ồng Tô Lâm mờ Mpồl lơh broă Dà lơgar neh chu ñàng, ơn goàng bơkàu tàm Hìu tơrñăng kah kơlôi cau chơ̆t màng ơruh pơnu lam lài gùt lơgar mờ tiah bơtô ƀồc 10 nă ùr Khin cha jak chài chơ̆t màng lam lài neh khin cha jak chài phi să tàm Sơnĕ pe Đồng Lộc. Bơta phi să khin cha jak chài bơh ală ùr ơruh lam lài dê neh gơgơs rùp pơrya tă pơgồp dà kơlhề dờng ngan bơh gĭt nđờ tơlăk nă ơruh pơnu tài lơgar hŭi să tờm, ờ gŏ pơlai sơnam kơnòm tài broă lơh dong klàs jơi bơtiàn, tơrgùm dùl dà lơgar.