Mho ngai 27/01, Tổng Ƀí thư ồng Tô Lâm đơng lam dơ̆ lơh broă mờ Mpồl Duh broă Đảng ƀộ càr Quảng Ninh bè ală broă lơh bơsong lơh pràn bơtàu tơngguh lơh sa – mpồl bơtiàn, sền gàr niam dà lơgar, lơngăp lơngai. Yal tàm dơ̆ lơh broă pà gŏ, nam 2025, GRDP hơ̆ là Kờp jơh phan bơna lơh geh tàm ù tiah càr Quảng Ninh dê gơguh mờr 12%, jơnhoa ngan rlau jơh gùt lơgar; bơta pràn lơh sa rề ơnàng, cồng nha lơh broă gơguh rlau 13%, rề dia geh rlau 85 rbô tơmàn đong, bơcri priă pơn jăt tai tam gơl niam.

Đơs tàm dơ̆ lơh broă, Tổng Ƀí thư ồng Tô Lâm sồr càr Quảng Ninh kơlôi sơnơng jrô nùs nhơm Pơrjum dờng XIV Đảng dê, lam lơh ndrờm bal ală pơlam gùng jŏ jòng kwơmàng, bơ̆t bơtàu broă lơh broă loh làng, cồng nha, gĭt nền di cau tờm, tŭ tơngai, bơta pràn mờ jơnau kờñ. Mờ ƀòn kung kờñ pal rơndăp tăp sèng wơl ù tiah bơtàu tơngguh, tơrgùm bal dà lềng bồt bơlào, tiah nhàr lơgar, phan lời wơl mờ tiah drà gơgơs dùl ƀòn brê bơnơm tơrgùm dùl nàng lơh gơlik bơta gơn kơnờm bơtàu tơngguh kơnhăp, jŏ jòng.