Tổng Ƀí thư ồng Tô Lâm pơyua jơnau còp să đềt mềr kờñ gơboh ngan tus mờ mpồl bơtiàn cau Việt Nam ơm tàm lơgar ndai, cih dờp nùs nhơm tam klăc đềt mềr mờ Dà lơgar tờm, nùs nhơm kơnòl gơ wèt mờ ƀòn tờm, dà lơgar. Tổng Ƀí thư đơs loh, Đảng mờ Dà lơgar he sùm ờ tam gơl bồ tơngoh sùm sùm làng bol là nggu, là anih tờm, cau tờm, là jơnau kờñ, là gơn kơnờm mờ bơta pràn bơh bơtàu tơngguh dê; tàm hơ̆, mpồl bơtiàn cau Việt Nam ơm tàm lơgar ndai là mpồl cau ờ gơtùi tam cah is bơh jơi bơtiàn Việt Nam dê, là bơta pràn is ồn kwơmàng bơh mpồl tam klăc dờng jơh gùt jơi bơtiàn dê tàm rài bơtàu tơngguh pa.

Tổng Ƀí thư kơ̆p kờñ, làng bol he tàm lơgar ndai sùm lơh jăt niam adăt boh lam tiah he ơm kis, tam klăc bơ̆t bơtàu mpồl bơtiàn ngai sơlơ bơtàu tơngguh dờng pràn, tơngguh gơnoar broă, bơngă bơh mpồl bơtiàn dê; sùm sùm jơh nùs sền gàr, yal tơnggĭt uă niam chài Việt Nam, bơ̆t bơtàu rùp hin niam bơnĕ bè dà lơgar, kòn bơnus Việt Nam tàm muh măt gơ̆p bơyô ală lơgar.