Đơs tàm anih tàm tơrbŏ sơñio rùp tơn Cao Bằng, Tổng Ƀí thư ồng Tô Lâm đơs nền, broă Wa Hồ rê hờ lơgar ờ mìng là bơta rê wơl bè đah ù tiah, mờ là bơta rê wơl mờ Làng bol, mờ bơta mùl màl jơi bơtiàn, mờ gùng lòt lơngăp lơngai is, rơcăng lài is bơh kăc màng Việt Nam dê. Bơh ală jơnau lơh nền broă kwơmàng geh lơh gơs tiah brê bơnơm Cao Bằng, gùng lòt Kăc màng Việt Nam geh lơh gơs, gơlam tus cồng nha bơh Kăc màng Nhai Phàm nam 1945, crơng gơs Dà lơgar Việt Nam Làng bol dê, bơh Làng bol mờ tài Làng bol. Bơta kwơ dờng ngan bơh broă Wa Hồ rê hờ lơgar ờ mìng gơ ơm tàm jơnau kah yau lơm mờ tàm ală jơnau bơsram gam bè ờs bơta kwơ tŭ tơngai dê.

Tềng đăp hwềng suàn ƀồc Củ tịc Hồ Chí Minh ki ngàm kờñ gơboh ngan, bol he hơ tam klăc bal dùl nùs, kơ̆ dơn gơl gùng neh săc rwah; tàm pơn jăt tàm pơdờn dipal phan lời wơl mờ Ồng dê neh lời wơl; lơh broă jơh nùs kràñ cê, lơh broă geh cồng nha, tơl kâp, tơl gah, tơl nă kwang bàng, đảng viên yờ tơngguh uă kơnòl tềng đăp Làng bol, jơh nùs lơh ngan bơ̆t bơtàu dùl lơgar Việt Nam ring lơngai, lơngăp lơngai is, rơcăng lài is, jak pràn mờ pas sơm, tă pơgồp jơh nùs ai ring lơngai mờ bơtàu tơngguh bơh kơnhoàl ù tiah do mờ dunia dê in”.