Bơh Pơrjum dờng 13 tus tŭ do, tàm bơta kal ke bal bơh rài lơh sa dunia dê, “Sơrlèt càl khồm sơlơ̆u wơl”, lơh sa Việt Nam kung gam gơguh uă ngan sơl mờ gàr geh bơta pràn bơtàu tơngguh kơ̆ kơl jăp tơnơ̆ kòp dờng Kovid- 19. Nam 2023, kờp jơh priă geh bơh tăc mờ blơi phan mờ lơgar ndai geh mờr 700 tơmàn dolar Mỹ; gơhòi gơ jà bơcri priă lơgar bơdìh geh 23 tơmàn dolar Mỹ, là khà jơnhoa ngan rlau jơh bơh lài tus tŭ do; mơkung gơs là dùl anih àng bè bơta kơ̆ kơl jăp, bơtàu tơngguh wơl mờ bơtàu tơngguh lơh sa tàm bơta tàm lơgar mờ dunia tìp uă kal ke, ờ kơ̆ kơl jăp. Nam 2024, khà GDP neh lơh geh rlau 476 tơmàn 300 tơlak dolar Mỹ (gơguh mờr 60 dơ̆ pơndrờm mờ nam sơnrờp tam gơl pa), gơgơs rài lơh sa dờng dơ̆ puan Asean dê mờ dơ̆ 32 dunia dê. Đơs tàm Pơrjum dờng Cau Kă bro kơnòm să Việt Nam dơ̆ VIII pa do, Thủ tướng Cíñ phủ ồng Phạm Minh Chính đơs loh:

“Tơnơ̆ mờr 40 nam tam gơl pa lơh sa Việt Nam neh gơguh niam ngan. Dilah bè jơh nam 2025 gơguh lơh sa geh rlau 8%, kờp jơh priă lơh geh bơh rài lơh sa dê là 510 tơmàn dolar Mỹ, ơm dơ̆ 32 tàm dunia. Kờp bal dồ nă cau geh rlau 5 rbô dolar Mỹ. Bè hơ̆, lơgar he mŭt tàm lơgar priă lơh geh di mơ uă (di mơ uă pơgăp 4 rbô 700 dolar Mỹ mờ Việt Nam rlau 5 rbô dolar Mỹ). Do là dùl broă lơh geh bal bơh Đảng mờ Dà lơgar he dê”.

Gơtùi gŏ, 40 nam lơh jăt gùng dà Tam gơl pa neh lơh gơlik geh bơta tam gơl kah yau, lam dà lơgar sơrlèt bơta sơrlồng sơrlàng, lơyài bơtàu tơnguh nàng brồ guh pràn mờ bơngă pa. Rài lơh sa drà kă bro phan pơlam gùng sàh hội củ nghĩa ngai sơlơ lơh sir, bơta dờng mờ bơta pràn tàm pơrlòng geh tơngguh loh làng; gơguh lơh sa gàr sùm tàm khà jơnhoa tàm uă tŭ tơngai, rài kis làng bol sùm geh tam gơl niam. Ală anih lơh broă cíñ trị geh bơ̆t bơtàu pràn kơldang, gùng dà broă lơh đơng lam bơh Đảng dê pơn jăt tai gơl pa, gơtùi mờ cồng nha ătbồ dà lơgar ngai sơlơ gơguh. Lơh broă mờ lơgar ndai mờ mŭt gơrờm bal mờ ală lơgar lơh geh ală broă pơnrơ ngan, tơngguh uă bơngă mờ bơta pin dờn Việt Nam dê tàm muh măt ală lơgar. Ală broă lơh geh hơ̆ geh gơtha kah yau do là cơng tàng lơh geh bơnàng jă kơ̆ kơnhăp nàng dà lơgar brồ guh, mơkung lơh kơ̆ kơl jăp bơta pin dờn bơh làng bol dê tàm bơta đơng lam Đảng dê, ai geh cơng tàng mùl màl kwơmàng nàng Đảng he cih Sră nggal Pơrjum dờng XIV jăt gùng tam gơl pa, kơ̆p kờñ ngan bal mờ bơta wèt sền bơtàu tơngguh pa. Jăt Tổng Ƀí thư ồng Tô Lâm đơs, Pơrjum dờng Đảng gùt lơgar dơ̆ XIV geh gơtha kwơmàng gơcèng bơta tam gơl pràn, là tŭ tơngai dờng màng ngan tàm gùng lòt bơtàu tơngguh dà lơgar he dê, pờ gơlik “rài brồ să bơtàu tơngguh pas pràn mờ gam sùm”.

Nàng lơh jăt ngan ngồn ală broă rơndăp lơh Đảng dê, jơnau rơcăng cih ală sră nggal sền Pơrjum dờng XIV neh geh rơcăng nền nòn, pơlam gùng jŏ jòng, bơtòm tơrgùm bồ tơngoh jak Đảng mờ làng bol dê, tơnggŏ bơta ring bal “nùs kờñ Đảng dê” mờ “nùs nhơm làng bol dê”; bơtòm tơrgùm tơl ală bơta nàng dà lơgar mŭt tàm tŭ tơngai bơtàu tơngguh pa. Phó Pơgru dờng- Tiến sìh ồng Nguyễn Trọng Phúc, Hìu bơsram kơlôi sơnơng Cíñ trị Dà lơgar Hồ Chí Minh đơs là: “Pơrjum dờng XIV là broă bơtàu tơngguh uă ngan Đảng dê, là tŭ tơngai kah yau geh lơh tềl bơta dờng kràñ Đảng dê, Dà lơgar dê…mơya lam lơh jăt, lơh jăt ngan ngồn Jơnau lơh nền tàm pơrjum bơh Pơrjum dờng dê, lơh jăt ngan ngồn ală gùng dà broă lơh dờng, ală jơnau sồr lơh kwơmàng bơh Pơrjum dờng dê, jơnau kờñ dờng bơh rài pa dê…Sồr lơh nàng lơh jăt ngan ngồn bè lơi hơ̆ sồng là bơta kwơmàng ngan rlau jơh. Tơl bơta bơtàu tơngguh bơh dà lơgar dê tơnơ̆ Pơrjum dờng XIV den gơ jăt tàm bơta đơng lam, sồr lơh Dà lơgar dê, Ƀộ Cíñ trị dê, ală anih lơh broă cíñ trị tàm tơngai pa”.

Mờ tơngume “Tềng hơđơm nha bồng bi pơnyờ să ngan Đảng dê, tơrgùm bal pràn, dùl nùs bal lơh jăt geh cồng nha ală jơnau kờñ bơtàu tơngguh dà lơgar tus nam 2030; rơcăng lài is broă rơndăp lơh, kơnờm tàm bơta pràn is, pin dờn, guh pràn tàm rài brồ să jơi bơtiàn dê, tài ring lơngai, lơngăp lơngai is, làng bol lơh tờm, pas pràn, pas sơm, jak chài, gơboh gơbài, kơnhăp cơnđoà lòt guh củ nghĩa sàh hội”, Pơrjum dờng Đảng gùt lơgar dơ̆ XIV là bơta tam pơn jăt mờ gàr niam ală cồng nha neh lơh geh bơh 40 nam tam gơl pa dê; là tŭ tơngai kwơmàng tàm gùng lòt wèt tus dùl dà lơgar bơtàu tơngguh, pas sơm mờ dờng pràn.