Gam tàm tơngai pĭc kơphê, geh tơnhào uă, geh trồ tơngai niam tăc geh giă tai den tàng cau tam kơphê tàm ƀòn Bu N’Doh, xã Dăk Wer, kơnhoàl Dăk R’lấp, càr Dăk Nông cau lơi kung chờ hờp, chờ hờñ lơm. Hìu bơnhă bi Điểu Suynh ơm tàm ƀòn Bu N’Doh geh 7 lồ ù tam tiêu, sầu riêng mờ mắc ca. Tàm hơ̆ geh 4 lồ kơphê gam tàm tơngai ai tơnhào uă ngan rlau. Nam lài lơh geh 10 tấn kơphê gar, nam do kờp dŭ geh rlau 13 tấn. Nam lài, kơphê mìng tăc geh giă 40 rơbô đông dùl kĭ, nam do gơguh uă rlau dùl dơ̆ mờ nggùl, mờr 60 rơbô đông dùl kĭ. Bi Điểu Suynh pà gĭt: bàr pe ngai do pơ ùr bi dê kòp sốt xuất huyết gam sơm kòp tàm hìu sơnơm càr. Mang bi lòt tàm hìu sơnơm sền gàr pơ ùr, mơya drim gờñ neh geh mat tàm mìr kơphê nàng lam cau pĭc kơphê, atbồ rlau 10 nă cau lơh broă gam pĭc kơphê ai hìu bơnhă bi in. Bàr pe nam do, bi Điểu Suynh geh làng bol pin dờn pồ lơh kwang atbồ thôn Bu N’Doh den tàm tơngai pĭc plai kơphê, bi sơlơ ờ ru ngan mờ ală broă lơh: den tàng là broă lam làng bol ơm gak sền gàr suơn kơphê nàng rcang lài ngòt gơtìp bol blơ̆ pĭc kơñau; den tàng sồr làng bol mìng pĭc kơphê dum nàng lơh geh niam bơta niam bơkah kơphê dê. Điểu Suynh pà gĭt: tàm ƀòn geh tus 31 hìu bơnhă càn priă bơh Ngân hàng nàng bơcri priă lơh broă sa. Mìng is hìu bơnhă bi lài do geh tŭ càn Ngân hàng tus rlau 1 tơmàn đong. Mơya neh tơm rơ hời, tŭ do mìng gam dồs 400 tơlak đong lơm, tàm tŭ hìu ơm, suơn chi bơh bi dê kờp priă ờ hơđơm 15 tơmàn đong. Bi Điểu Suynh, đơs: “Ngân hàng Argibank Nhân Cơ lơh ai tơl bơta ƀuơn ai añ in càn priă dong kờl ờ sa priă cồng uă bơh nam 2012 tus tŭ do. Lài do uă làng bol ờ hềt gĭt mờ bơnah càn priă ờ sa priă cồng uă bơh Argribank dê, làng bol pal càn priă bơdìh mờ priă cồng uă ngan. Bơh tŭ geh priă càn bơh Argribank dê bol añ neh geh priă bơcri tàm broă lơh sa, sơng ka sền gàr kơphê, kao su...Bơh hơ̆ bol añ geh bơtàu tơnguh lơh sa hìu bơnhă, pơgồp bơnah lơh tam gơl muh mat ƀòn lơgar dê”.

Ờ mìng kơnhoàl Dăk R’lấp lơm, mờ làng bol kòn cau M’nông ơm tàm tiah sar lơgar ngài, tiah nhàr lơgar kơnhoàl Tuy Đức càr Dăk Nông dê kung neh càn priă bơh Argribank dê dùl bă ƀuơn ngan. Bơta do ờ mìng kơryan rềs àr gơ aniai càn priă sa priă cồng uă lơm mờ gam dong làng bol geh priă nàng blơi phan bơna, phơng sih, sơng ka sền gàr phan tam di mờ tơngai lơh broă. Tŭ do neh geh 237 hìu bơnhă kòn cau M’nông geh càn 44 tơmàn 800 tơlak đong tàm Argribank kơnhoàl Tuy Đức dê nàng bơcri priă lơh broă sa. Bi Điểu Jâng, ơm tàm ƀòn Diêng Ngaih, xã Dăk R’Tih pà gĭt: pơgap mờ do 2 nam bi neh càn 500 tơlak đong nàng blơi phơng sih mờ tờm sơntìl mắc ca, sầu riêng rê tam tàm tiah ù mìr ơnàng 3 lồ. Tŭ do, suơn chi hòn gơs niam ngan, hơ pơrgon lơh geh cồng nha uă. Bi Điểu Jâng, đơs:“Bơh tŭ geh priă càn dong kờl ờ sa priă cồng uă bơh Ngân hàng Nông nghiệp mờ Phát triển Nông thôn dê, añ neh bơcri priă tàm broă tam, sơngka sền gàr kơphê, tiêu, sầu riêng... uă ngan là añ blơi phơng sih ai tiêu, kơphê, mắc ca mờ sầu riêng in... Bơh priă càn do geh cồng nha ngan gơwèt mờ bol añ, priă cồng ờ uă den làng bol iang nùs ngan”.

Phó Kwang atbồ Argribank, anih lơh broă tàm càr Dăk Nông Thân Văn Chí pà gĭt: Argribank càr Dăk Nông geh ală broă lơh tus jơh ală kơnhoàl tàm càr mờ 14 mpồl lơh sa kă bro. Kwang bàng ai càn priă gĭt loh ù tiah, den ai càn di cau mờ khi ngui priă càn di mờ jơnau kờñ, ngui geh cồng nha. Tus tŭ do neh geh 3 rơbô 500 hìu bơnhă jơi bơtiàn dồ ết nă cau tàm tiah do càn priă bơh Argribank càr Dăk Nông dê mờ khà priă gam dồs gơguh tus 570 tơmàn đong. Phó Kwang atbồ Argribank, anih lơh broă tàm càr Dăk Nông Thân Văn Chí, đơs:“ Bơh priă càn bơh hi dê, bol  añ dong kờl tơrmù ƀà broă càn priă sa priă cồng uă tàm đah bơdìh mờ bol añ gŏ tàm tơngai pa do neh lơh gơbàn uă bơta ờ niam ngan ai ală hìu bơnhă in. Bơdìh mờ broă ai càn priă, den bol añ geh broă rơndăp lơh ală broă lơh sền gàr niam rài kis mpồl bơtiàn, lơh ală hìu ơm ai ală hìu bơnhă geh rài kis kal ke in. Tơngai pa do bol añ lơh niam ngan broă dong kờl do. Geh uă ngan hìu bơnhă làng bol jơi bơtiàn dồ ết nă cau neh geh lơh hìu ơm nàng iang nùs lơh broă sa. Tàm tơngai tus bol añ rơ̆p pơn jat tai lơh jat geh cồng nha ală broă lơh nàng ai càn priă geh uă rlau tai mờ làng bol nàng pơgồp bơnah dong làng bol geh rài kis mờ ală bơta lơh sa ngai sơlơ niam rlau tai”.