Tàm rlau 1 poh lòt ròng pơ ùr sơm kòp tàm Hìu sơnơm dờng càr Gia Lai, pah tŭ di 11 jiơ klo ngai, ồng Nguyễn Thanh (75 sơnam, ơm tàm  thôn 2, xã Ia Hlốp, kơnhoàl Chư Sê) den tus tàm anih tăc piang Thị Huy nàng sào piang. Ồng pà gĭt, dơ̆ sa geh tơl bơta pràn bơkah mờ pa gơm lơm, geh piang, đậu phụ, tăp, biăp, geh bal phan sa tơnơ̆ neh jơh sào piang là prìt (halà plai thañ long, dà toh khoah nàñ) mơya giă mìng 2 rơbô đong lơm. Dilah ngai lơi hŭi cèng priă, den ờ duh plai tong priă ờ.

Ồng Nguyễn Thanh đơs, ờ mìng dồ nă ồng lơm, mờ tơl dơ̆ sa klo ngai pah ngai gam geh gĭt nđờ rơhiang nă cau kòp, cau sơm kòp ơm bĭc wơl tus sa tàm anih tăc piang do dê:“Añ gŏ geh anih tăc piang bè do dong cau kòp mờ hìu bơnhă cau kòp in là kwơ ngan, ờ hoan roh uă ir priă jền, piang sa wèr den sàng goh. Piang lơbơn, duh, piang kờñ sa kàr lơi kung di lơm. Geh dà hùc sàng goh, kƀàng, cơghĕ sàng goh”.

Bal mờ anih tăc piang 2 rơbô đông, tàm Pleiku gam geh dơ̆ sa klo ngai ờ sa priă dong cau kòp rƀah in bơh Mpồl dong kờl is Mpồl lơh sa GEM dê pà. Bi Trần Thị Mỹ Hằng- cau tờm Mpồl pà gĭt: 2 nam do, 200 nă cau tàm mpồl là cau lơh sơnơm ndrờm tă priă nhai pah nhai jat jơnau sồr “jat nùs nhơm is he dê”. Bơh kes priă do, Mpồl tă 20 tơlak đong dùl nhai nàng blơi ală bơnah phan sa pà gời dong ală cau geh rài kis kal ke in. Bi Trần Thị Mỹ Hằng, đơs:“Bol añ geh dùl nơm tùh ƀañ bùñ, ngai lơi kung geh lơm. Tàm hơ̆ den geh bơh 300 tus 400 nơm ƀañ bùñ. Cau lơi tus kham ndrờm geh dờp lơm. Ai klo ngai den bol añ hòi điện thoại mờ anih tăc piang. Geh ngai geh bơh 30 tus 40 hộp piang, geh ngai den geh bơh 50 tus 60 hộp piang nàng dong kờl ală cau tàm ƀòn lơgar, cau tiah sar lơgar ngài in”.

Broă lơh dong kờl is dong cau kòp rƀah lơh gơ rề uă ngan tàm ală hìu sơnơm tàm ƀòn dờng Pleiku, càr Gia Lai dê, gơ hòi gơ jà uă ngan làng bol tus bal. Bơdìh anih tăc piang 2 rơbô đồng, tùh ƀañ bùñ, hộp piang sa ờ sa priă, gam geh uă mpồl dong kờl is pà pòr ai cau kòp là kơnòm dềt, cau kòp leh in... Uă cau lơh jat bal mờ broă tă pơgồp bal phe, phan tĕ ai ală hìu bềp trŭ gơm phan sa, mpồl geh nùs nhơm niam in. Bi Nguyễn Thị Dung, ơm tàm sơnah ƀòn Ia Kring, ƀòn dờng Pleiku, pà gĭt: “He geh phan lơi den dong phan hơ̆. He tă pơgồp bal ai hìu bềp trŭư gơm phan sa in 1 khàr dơngi 5 lĭt, 2 kĭ ƀòk nêm mờ 2 kĭ ƀòk ngòk. Tơl nă cau sơm bat tê bal tam pà bal den ală cau kòp tàm tiah ngài, cau hìu bơnhă cau kòp kung tơrmù ƀà dùl bơnah lơi bơta kal ke”.

Bal mờ bơta sơm bat tê bal bơh làng bol dê, gơnoar atbồ ală xã, sơnah ƀòn tàm ƀòn dờng Pleiku, càr Gia Lai dê kung dong kờl, lơh geh ală bơta nàng broă lơh geh nùs nhơm niam geh lam lơh ƀuơn ƀoài mờ nền nòn uă rlau tai. Ồng Đỗ Trung Hùng- Củ tịc Ủy ƀan Ñân zân sơnah ƀòn Phù Đổng- ƀòn dờng Pleiku, tiah geh uă hìu sơnơm mờ ală broă lơh nùs nhơm niam, pà gĭt:“Bol añ kung neh tus bal, bơto pơlam anih trŭ gơm phan sa pal lơh sàng goh nàng sền gàr niam sàng goh phan ngui sa, mờ blơi phan ngui sa. Mpồl cau trŭ gơm phan sa pal cih mat dan tus bal pơlam tàp nàng geh sră dờp sàng goh phan ngui sa. Geh uă hìu bơnhă kal ke uă ngan . Uă cau dồ nă să, mpồl bơtiàn geh nùs nhơm dong kờl kis neh dong kờl ai cau kòp in là bơta niam ngan, kwơ màng ngan”.