Jơnau ntas cing hô hơng ngan tềng hơ đơm chi dờng tơlir niam lơh jơh gơl gùng Trần Quang Khải, kền gah ƀlàng dờng 10/03, ƀòn dờng Buôn Ma Thuột, càr Dăk Lăk ờ hoan duh đau tàm trồ tơngai kàl prang uă ngan tàm ală ngai ơm rlô pa do. Tam ya xoang lơbơn niam mờ gùng đơs crih tam ya iăt bơkah tồr ngan bè geh bơta pràn gơ hòi gơ jà làng bol mờ năc lòt nhơl lòt gan tàm tiah do ndrờm ơm wơl sền. Mò Nguyễn Thị Oanh, năc lòt nhơl bơh tàm càr Nam Định, đơs: “Tus ndo lòt nhơl nisơna tìp dơ̆ bơyai lơh dròng cing jañ mồng Tây Nguyên den añ ơm sền tơn. Cing mồng Tây Nguyên là niam ngan rlau jơh rau, jơh gùt lơgar mìng tàm Tây Nguyên geh cing mồng lơm. Cing mồng Tây Nguyên tiah lơi kung hô hơng lơm”.

Broă lơh bơyai lơh dròng cing jañ mồng mờ tìp mat lơh kwèng đơs crih tam ya mờ tơngume “Dà lơgar wil tơl bơta chờ hờp” là broă lơh bơh Anih tờm Niam chài- Tàp pràn să jan ƀòn dờng Buôn Ma Thuột dê bơyai lơh tàm Ƀlàng dờng Anih tờm ƀòn dờng dê di dơ̆ ơm rlô ngai 30/04 mờ ngai 1/05 nam do. Mờ bơnah ràng tơlik dròng cing jañ mồng, đờng goòng jơi bơtiàn bơh ală mpồl cau chài kơnòm să bơh ƀòn Ky, ƀòn Kô Tam, Mpồl đơs Then ƀòn dờng Buôn Ma Thuột, tamya bal bơyai lơh bal bơh Mpồl Phan lời wơl ào kăp Việt Nam càr Dăk Lăk, Mpồl tam ya Doremi Kid dê... neh lơh geh dùl broă lơh đơs crih tam ya li la uă ngan mờ duh hồl ngan. Ồng Trương Ngọc Bảy, ơm tàm xã Ea Kuăng, kơnhoàl Krông Pách, càr Dăk Lăk tus sền broă lơh, đơs: “Geh ală jơi bơtiàn kòn cau Rơđê, kòn cau Tày mờ ală jơi bơtiàn ndai ndrờm geh bơhiàn niam chài krơi is bơh khi dê. Rài niam chài hơ̆ là bơta pơn yờ să ngan bơh làng bol dê, den tàng tìp mat lơh kwèng ală rài niam chài nàng ai làng bol bè bol añ in ngai sơlơ gĭt wă rlau tai bè rài niam chài geh lơh làm uă tiah rlau tai”.

Ờ mìng tàm Ƀlàng dờng 10/03 lơm, tàm dơ̆ ơm rlô ngai 30/04 mờ ngai 1/05 pa do, uă tiah lòt nhơl tàm càr Dăk Lăk ndrờm bơyai lơh ală broă lơh niam chài, đơs crih tam ya cèng bềng bơhiàn niam chài Tây Nguyên dê, bè: tìp mat lơh kwèng cing mồng, đơs then đờng tíñ, mòn lơh đờng goòng, ñô tơrnờm, phan sa ală jơi bơtiàn kòn cau Rơđê, M’nông, Lào dê... neh lơh năc lòt nhơl in ală bơta sền gĭt gơ kờñ ngan mờ niam ngan.

Bi Lý Thế Quân, năc lòt nhơl bơh ƀòn dờng Hồ Chí Minh pà gĭt, añ gơ kờñ ngan mờ broă lơh bơyai lơh đờng lŭ mờ đờng goòng jơi bơtiàn dê tŭ tus mờ Gùng sră kơphê Buôn Ma Thuột tàm dơ̆ lòt nhơl tus tàm càr Dăk Lăk dơ̆ do dê: "Añ gŏ là dơ̆ ràng tơlik tàm bơrlŭ bal ală bơta lơh geh bơta gơ kờñ ngan, tơngŏ bơhiàn niam chài kơnhoàl ù tiah loh làng, kwơ màng là niam chài bơh kòn cau Rơđê dê. Bơh ală săp đơs, jơnau đơs den pơn rơ ngan là ală săp đơs bơh ală gơp bơyô dê pràn ngan, mpoong ntas uă ngan, gơ lơh brê bơnơm ngan. Bơta do añ gŏ là tàm ală tiah ndai ờ gŏ geh ờ”.

Ờ mìng năc lòt nhơl bơh ală tiah ndai lơm mờ ngan là ală làng bol gam ơm kis tàm càr Dăk Lăk kung gơ lơh rnơ̆t mờ gơ kờñ ngan mờ ală broă lơh niam chài đơs crih tam ya cèng bềng bơhiàn niam chài Tây Nguyên dê geh bơyai lơh tàm ală ngai pa do. Bi Trần Thị Đan Phương, ơm tàm sơnah ƀòn Tân Lập, ƀòn dờng Buôn Ma Thuột pà gĭt: “Dùl dơ̆ ơm rlô jŏ ngai mơya hìu bơnhă añ lơh nền ơm wơl tàm ƀòn dờng Buôn Ma Thuột, ơm wơl tàm hìu bơnhă bơh he dê mờ sền ală bơta niam chài gùt dar. Mờ sền gĭt là gùt dar he dê geh uă ngan ală bơta niam krơi is ngan bè hơ̆. Kơ̆p kờñ là càr Dăk Lăk he rơ̆p geh ală broă lơh niam bơnĕ ngan rlau tai ai uă hìu bơnhă in, geh ală hìu bơnhă ờ geh priă jền mờ geh ală hìu bơnhă khi kờñ ngan tus sền tai den kung ờ duh pal muăt jrùm mờ gơ lơh chờ hờp ngan”.

Là dùl ù tiah geh uă bơta niam chài mờ 49 jơi bơtiàn ơm kis bal, bơdìh mờ ală bơta ƀuơn, bơta pràn bè ù tiah brê bơnơm niam ngan den tềl lời wơl niam chài ală jơi bơtiàn tàm tiah do dê là bơta tờm lơh geh bơta krơi is bơh lòt nhơl Dăk Lăk dê. Ngui ală bơta ƀuơn, bơta pràn hơ̆, ờ mìng tàm dơ̆ ơm rlô pa do lơm, mờ ală mpồl lơh broă lơh gah lòt nhơl tàm càr Dăk Lăk tàm tơngai pa do neh khin cha lơh geh ală bơta sền gĭt gơ kờñ ngan nàng gơ hòi gơ jà mờ gơ dŏ jơng năc lòt nhơl tus mờ càr. Bơh ală broă lơh do pờ tơlik ală tŭ tơngai niam ai gah lòt nhơl Tây Nguyên dê ngui bơhiàn niam chài mpồl bơtiàn lơh geh bơta tờm is mờ ală tiah ƀòn lơgar kơh bơnơm bềng tơngai mờ càl dê.