Làng bol ơm tàm xã Quảng Điền, kơnhoàl Krông Ana, càr Dăk Lăk neh kwèng ngan mờ rùp hin dùl nă ùr Thiếu tá Kwang àng sùm lòt sền gùt dar xã bơh tŭ 5 jiơ nggùl drim pah ngai. Ồng Trần Văn Hữu, tàm đội 5, thôn 2, xã Quảng Điền yal: làng bol tàm do uă ngan lơh broă sa suơn sre, lơh kòi sre den sùm guh bơh gờñ ngan, tơrgùm hùc kơphê, tơm bơh bơr hơ̆ sồng lòt lơh broă tàm sre. Ală nam lài, bơta tơrgùm den hơ̆ sồng nhơl ƀài, tàm kă gơlik geh kal ke. Uă hìu bơnhă nrah nring, dồs chơ̆t tàm rơndap rơndồl tơnơ̆ ală dơ̆ nhơl ƀài do. Mơya pơgap 3 nam rê wơl hờ ndo, ală tiah sùm nhơl ƀài, tàm kă neh gơmù uă tơn, bơta lơngap lơngai, rơndap tap sèng tàm xã ngai sơlơ geh tam gơl niam. Ồng Trần Văn Hữu đơs: “Bơh ngai mờ Thảo rê lơh kwang atbồ Kwang àng tàm do mờ oh mi Kwang àng kơnhoàl ntrờn rê tàm do ală bơta lơngap lơngai geh gàr niam, rơndap tap sèng, lơngap lơngai mpồl bơtiàn. Kwang àng tàm do kung bal mờ làng bol, ơm rềp mờ làng bol, iăt jơnau đơs bơh làng bol dê. Tàm ƀòn, tàm mpồl den Mpồl atbồ is dùl bă nền nòn den ală broă lơngap lơngai, cau lơh tìs tàm do den ờ geh uă tai”.

Cau mờ ồng Trần Văn Hữu đơs tus hơ̆ là Thiếu tá Lê Nguyễn Hiếu Thảo– Kwang atbồ Kwang àng xã Quảng Điền. Là kòn cau Thái, deh nam 1986, lài do, bi Thảo neh geh 13 nam lơh broă tàm Kwang àng kơnhoàl Krông Ana tàm Mpồl Lơngap lơngai den hơ̆ sồng tus lơh broă tàm Mpồl Kảñ sát Atbồ sră nggal bè rơndap tap sèng mpồl bơtiàn. Bơh lồi nam 2019, bi lam lài rê tàm ƀòn lơgar jat rơndap broă lơh bơh Ƀộ Kwang àng mờ geh Kwang àng kơnhoàl Krông Ana pin dờn ntrờn tiah lơh broă, at gơnoar broă Kwang atbồ Kwang àng xã Quảng Điền. Bi Thảo kung là Kwang bàng cau ùr mìng dùl lơm tàm 5 nă oh mi Kwang àng geh ntrờn rê lơh broă tàm xã.

 Tŭ lòt dờp broă lơh, bi Thảo neh bal mờ ală oh mi tàm mpồl lòt tàm ƀòn lơgar sền gĭt ală bơta. Bơyai lơh bơt bơtàu kơrnoat pal jat broă lơh, lơh broă tơn mờ ală thôn, ƀòn, nàng kờp sền ală cau, ală tiah tờm tàm ù tiah xã dê. Sùm lòt sền, sền gròi tàm ală tiah rềp nhàr; bơyai lơh broă lơh mblàng yal jơnau tàm làng bol in mờ uă broă. Bal mờ hơ̆, Kwang àng xã gam pơgồp bal mờ broă tus tơn tàm hìu bơnhă nàng lùp còp, pơndờm pơnđiang làng bol halà pà phan ală cau geh rài kis kal ke, ală cau pa lik bơh hìu jàm rê wơl gơ rờm bal tàm ƀòn lơgar. Bi Nguyễn Mỹ Hạnh, ơm tàm thôn 4, xã Quảng Điền pà gĭt, kơnờm bơta sền gròi pơndờm pơnđiang bơh kwang àng xã dê, tơnơ̆ tŭ tơn jơh lơh jat glài ơm jàm bơklau bi dê neh mhar ngan gơ rờm bal mờ mpồl bơtiàn, lơh ngan lơh broă sa. Bi Nguyễn Mỹ Hạnh, đơs: "Tŭ mờ rê bơh hìu jàm den bi gơ rờm bal mhar ngan, tus bal lơh broă sa niam ngan, ngan là pơnđơn pràn lơh ngan, lơh ngan uă. Ngan là tŭ rê wơl tàm tiah ơm kis den gơnoar atbồ tiah do, mpồl Kwang àng xã ndrờm là ală oh mi niam ngan, khi pơndrờm pơnđiang sùm, khi dong kờl bè bơta nùs nhơm là uă ngan".

Ờ mìng ơm rềp mờ làng bol, lơh ngan lòt tàm ƀòn lơgar, Thiếu úy Lê Nguyễn Hiếu Thảo gam sùm lam lơh ală broă lơh nùs nhơm niam, dong kờl làng bol. Tŭ kòp Kovid-19 gơlik geh kal ke, Kwang àng xã Quảng Điền neh hòi jà ală cau geh nùs nhơm niam, ală cau geh nùs nhơm niam tă pơgồp gĭt nđờ jơ̆t tấn biăp, phan ngui sa kờñ pal geh pơyoa pà mpồl cau lơh broă lam lài rcang sơndră kòp tàm ƀòn dờng Hồ Chí Minh mờ ală càr tiah đah Jum dà lơgar. Bi Thảo gam hòi jà tơn mờ lam lơh 12 dơ̆ lơh broă wèt rê tàm ƀòn lơgar bè lơh broă dong làng bol, lòt còp mờ pà phan ai ală hìu bơnhă geh màng mờ Dà lơgar, hìu bơnhă cíñ sác, hìu bơnhă geh rài kis kal ke mờ kờp jơh priă jền rlau 200 tơlak đong. Hòi jà tă pơgồp priă jền nàng dong kờl priă tă sơm kòp ai dùl nă kwang bàng xã geh rài kis kal ke in. Ală broă lơh do bơh Kwang àng xã Quảng Điền dê geh làng bol jờng rơ uă ngan, kwang đơng lam bồ tiah do cih dờp mờ jờng rơ ngan. Thượng tá Lê Văn Tuấn, Kwang atbồ Kwang àng kơnhoàl Krông Ana đơs: “Bi Thảo neh lơh jat niam gơnoar broă lơh cau lam bồ Kwang àng kấp xã dê. Bi jơh nùs ngan, ngăc ngar, tryang tryồng, jơh nùs mờ broă lơh. Tàm 3 nam pa do, bi Thảo kung geh Đảng ủy, Kwang atbồ Kwang àng kơnhoàl Krông Ana mờ Đảng ủy, Ủy ƀan Ñân zân xã Quảng Điền jờng rơ uă ngan mờ geh làng bol tàm ù tiah xã Quảng Điền cih dờp, kờñ gơboh, jơm glòm, dong kờl uă ngan ai Kwang àng xã Quảng Điền in tàm broă lơh jat kơnòl broă cíñ trị tàm tiah do dê”.

Mờ ală bơta tă pơgồp tàm tơngai lơh broă, Thiếu tá Lê Nguyễn Hiếu Thảo neh chờ hờp ngan geh dờp sră jờng rơ bơh Kwang atbồ Kwang àng càr Dăk Lăk dê tài bơh neh geh cồng nha jak ngan tàm broă lơh lơh niam wơl sră nggal; pà sră jờng rơ  bơh Ủy ƀan Ñân zân kơnhoàl Krông Ana bè cồng nha jak ngan tàm srơh tàm pơrlòng kờñ gơboh Dà lơgar tơngai bơh nam 2015-2020; Sră jờng rơ bơh Ƀộ trưởng Ƀộ Kwang àng bè cồng nha jak ngan tàm broă lơh pơgồp bal, bơyai lơh mờ tus bal dơ̆ pơrlòng rùp niam, Video clip tơngume “Ală cau ling cèng gơnoar broă sền gàr rài kis lơngap lơngai” nam 2022. Thiếu tá Thảo đơs, gơwèt mờ bi, lơh kwang àng là bơta kờñ ngan bơh tŭ gam dềt. Den tàng bè hơ̆, bulah lòt gan ală kal ke, bòl glar, bi sơlơ kờñ gơboh mờ pơn yờ să mờ dà ào mpha kwang àng gam soh mờ kung gam pơn jat tai pơnđơl pràn lơh ngan tă pơgồp dà kơl hề nàng sền gàr lơngap lơngai ai làng bol in. Thiếu tá Thảo đơs: “Gah broă bơh he dê sac rơwah hơ̆ là bơta kờñ. Rài tơnơ̆ do, he mìng kơ̆p kờñ là he rơ̆p tă pơgồp jơnau đơs mờ rơ̆p geh ală jơnau bơceh lơh sơm bat tê bal tă pơgồp bal mờ bơta pràn nàng ai làng bol mờ xã do in kơryan rềs àr mpồl bơtiàn dùl bă niam ngan rlau jơh. Mờ kơ̆p kờñ ngan là rài tơnơ̆ do làng bol bè tŭ do lơm, lơh jat niam rlau tai, sơm bat tê bal mờ mpồl kwang àng xã tàm srơh gùt làng bol sền gàr lơngap lơngai bơh Dà lơgar dê” .

Bơta tryang tryồng, jơh nùs bơh Thiếu tá Lê Nguyễn Hiếu Thảo dê neh geh làng bol cih dờp mờ jờng rơ uă ngan. Bơh hơ̆, pơgồp bơnah sơlơ lơh niam rlau tai nùs nhơm đềt mềl đah làng bol mờ Kwang àng, tơl nă làng bol kung gơ gơs dùl “nă cau tàm mpồl kwang àng dê” là tê tơn jòng nàng sơm bat tê bal kơryan ală cau lơh tìs, sền gàr kơ̆ kơljap lơngap lơngai tiah ƀòn lơgar.