Mờ rlau 10 tơmàn đong bơh priă broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau, xã tiah 3 Ea Hiu, kơnhoàl Krông Pách, càr Dăk Lăk neh lơh bê tông jơh 9 gơl gùng lòt ƀòn lơgar mờ bơta jòng mờr 4,5 kơi sồ. Broă lơh niam wơl, pờ ơnàng ală gơl gùng lòt ờ mìng drơng niam rlau tai tàm broă lòt rê, jun pơndiang phan lơh geh bơh suơn sre lơm mờ gam pơgồp bơnah tàm tơrbŏ bal kă bro đah ală thôn, ƀòn. Mò H’Ninh Êban, làng bol tàm xã Ea Hiu pà gĭt:“Lài do, gùng lòt rê lơm bè, geh broă lơh do añ brờn brài ngan, oh kòn lòt bơsram, lòt rê ƀuơn ngan mờ tàm tơngai toès kòi do làng bol pơndiang kòi halà pơn diang phan lơh geh bơh suơn sre ƀuơn rlau”.

Broă lơh gùng lòt bơh Gùng rơndeh dờng 27 tus tơnau dà ƀòn Biếp, xã Yang Tao, kơnhoàl Lăk, càr Dăk Lăk kung geh bơcri priă lơh bơh priă broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau dê. Broă lơh geh bơta jòng mờr 3 kơi sồ gơ mut tus liang dà Bìm Bịp, dùl tàm ală tiah niam tiơng pơn rơ ngan bơh kơnhoàl Lăk dê. Broă lơh geh lơh sir nam 2023. Ồng Y Mra Liêng, làng bol tàm xã pà gĭt, bơh tŭ gơl gùng lơh sir ală rơndeh rơndồ lòt rê tàm gùng gơtùi mut tơn tàm jơng liang dà dê, ƀuơn ngan lòt rê den mpồl năc tus mờ liang dà sơlơ gơguh uă pơndrờm mờ lài do, pơgồp bơnah tàm bơtàu tơnguh lơh sa bơh tiah do dê. Ồng Y Mra Liêng, đơs: “Geh gùng lòt he lòt rê ƀuơn ƀoài ngan. Ƀòn lơgar bơh he dê tam gơl niam bơnĕ bè do, añ kung brờn brài ngan sơl”.

Bơh nam 2022 tus tŭ do, mờ priă bơh broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau, kơnhoàl Lăk, càr Dăk Lăk neh lơh mờ lơh niam wơl 37 broă lơh bơt bơtàu kwơ màng nàng drơng broă lơh sa, rài kis tàm tiah làng bol jơi bơtiàn dồ ết nă cau mờ kờp jơh priă bơcri lơh rlau 75 tơmàn đong. Ală broă lơh neh hời rơ hời gơ gơs broă lơh bơt bơtàu dồ ròt bal, lơh geh ală bơta nàng ngui ală bơta ƀuơn, bơta pràn bơh ală tiah dê tàm bơtàu tơnguh lơh sa suơn sre mờ lòt nhơl. Ồng Nguyễn Anh Tú, Phó Củ tịc Anih duh broă làng bol kơnhoàl Lăk, càr Dăk Lăk, đơs nền:“Gùng lòt ƀuơn ngan pơgồp bơnah jun pơndiang phan bơna ƀuơn ngan. Dơ̆ 2 là tơrmù ƀà priă tă jun pơndiang phan. Be hơ̆, cồng nha bơh bơcri priă bơt bơtàu phan bơna ƀòn lơgar neh cèng wơl priă lơh geh. Bè ù tiah den sền sàng goh, niam ngan rlau”.

 Broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm pơgồp bơnah tơnguh uă bơta niam rài kis tiah làng bol jơi bơtiàn dồ ết nă cau mờ tiah kơh bơnơm càr Dăk Lăk dê. Nam 2023 hìu bơnhă rƀah jơi bơtiàn dồ ết nă cau gơmù bơh 26,7% gơmù gam 19,7%, gơmù 7% pơndrờm mờ lồi nam 2021. Is ồn, ală broă lơh bơt bơtàu gùng lòt geh bơcri priă lơh tàm tiah làng bol jơi bơtiàn dồ ết nă cau, tiah kal ke uă tàm càr gam lơh geh bơta gơn kơnờm nàng làng bol in bơtàu tơnguh lơh sa, mpồl bơtiàn, pơgồp bơnah lơh jat jơnau kờñ tơrmù hìu bơnhă rƀah tàm làng bol jơi bơtiàn dồ ết nă cau bơh 3% tus 4% dùl nam.

Bồ nhai 08 pa do, tàm ƀòn dờng Buôn Ma Thuột, càr Dăk Lăk, Mpồl Sồr lơh Dà lơgar ală broă lơh jơnau kờñ dà lơgar bơyai lơh pơrjum pờ tơlik tơn tàm internet mờ ală càr tàm tiah Tây Nguyên bè bơta lam lơh jat ală broă lơh jơnau kờñ dà lơgar, đơs nền: Kes priă dà lơgar nam 2024 dong kờl lơh jat 3 broă lơh jơnau kờñ dà lơgar (broă lơh bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm; Broă lơh tơrmù rƀah kơ̆ kơl jăp mờ Broă lơh bơt bơtàu ƀòn lơgar ) tiah Tây Nguyên là rlau 5 rơbô 500 tơmàn đong. Tus tŭ do, tiah Tây Nguyên geh pơgap 373 xã geh jơnau lơh nền dờp xã lơh sir broă lơh ƀòn lơgar pa. Phó Thủ tướng ồng Trần Lưu Quang đơs sùm, nàng lam lơh jat geh cồng nha ală broă lơh jơnau kờñ dà lơgar, ală càr pal sền hơ̆ là dùl broă lơh niam dong kờl kòn bơnus, dong ai làng bol ală tiah kal ke geh rài kis niam rlau tai den tàng pal lơh jơh kơnòl broă, jơh nùs, kràñ cê jơh nùs rlau tai tàm tơngai tus. Phó Thủ tướng sồr ală tiah pal bơsram bal mờ gơ̆p, tiah lơi lơh ờ hềt gơtùi den pal bơsram mờ ală tiah neh lơh niam nàng bal mờ gơ̆p lơh tus geh kơnòl broă geh jàu. Phó Thủ tướng ồng Trần Lưu Quang, đơs:“Sồr ală kwang bàng lơh tĕ, lơh mơ ală broă gơtùi lơh. Priă do gơwèt mờ 5 càr tàm tiah Tây Nguyên digơlan ờ uă mờ priă bơcri dà lơgar dê, mơya gơ kwơ màng uă ngan tài bơh gơ mut jrô ngan tus tơl ƀòn lơgar. Ală kwang bàng đơs 1 rơbô bơta kal ke, cih dờp jơh, mơya bè đah ală kwang bàng pal jơh nùs rlau tai, ală broă bol he geh lài jơh lơm mờ ờ lơh sir den kơnòl bơh cau lơi tiah” Đơs ngan là tus nhai 09 ală kwang bàng ờ gŏ lơh den mìng geh broă lơh pal sền is tìs di lơm mờ dilah tơngai lơh broă tơnơ̆ do tàm pà priă ai ală tiah in jat jơnau đơs lam lơh niam 3 broă lơh do bơh tơngai lơh broă do dê bol añ rơ̆p jàu uă phan lơh rlau tai ai ală cau gĭt lơh mờ lơh jak in”.