Tŭ do, rài kis làng bol tàm ală ƀòn lơgar tàm tiah sar lơgar ngài, tiah làng bol kòn cau dùl ết nă cau càr Lâm Đồng dê neh geh bơta bơtàu tơnguh tơl ngai.

Uă nam do, broă lơh tam cê, kơphê bơh hìu bơnhă ồng K’ Kras dê, ơm tàm thị trấn Lộc Thắng, kơnhoàl Bảo Lâm, càr Lâm Đồng sùm geh năc rềp ngài tus sền, jòi gĭt mờ bơsram bơta mờng chài tam phan. Ồng là làng bol kòn cau dùl ết nă cau rlau 10 nam sùm geh sac rơwah là cau lơh broă sa jak ngan. Kơnờm khin cha tam gơl kơlôi sơnơng tàm broă tam phan, hời rơ hời ai ală bơta sơntìl phan tam pa tàm broă lơh sa nàng ala rơ hời ală bơta sơntìl phan tam yau ờ hoan geh cồng nha, bal mờ ngui di broă lơh sơng ka sền gàr, ngui sơnơm sền gàr phan tam jat bơta bơto pơlam bơh kwang bàng gah lơh sa suơn sre dê, sươn cề mờ kơphê ơnàng mờr 4 lồ bơh hìu bơnhă ồng dê sùm hòn gơs mờ dờng niam, cèng wơl priă jền geh sùm gĭt nđờ rơhiang tơlak đong dùl nam. Rài kis, lơh sa bơh hìu bơnhă ồng dê sùm bơtàu tơnguh sùm.

Ồng K’ Kras đơs:“Geh bơta sền gròi bơh Đảng mờ Dà lơgar, bơta dong kờl bơh gah lơh sa suơn sre, gơnoar atbồ kơnhoàl Bảo Lâm dê... ai añ in tus bal tàm uă broă lơh bơto pơlam, dơ̆ cribơyai, blơi phơng sih tơm priă tơnơ̆... Añ neh lơh ngan bơcri priă lơh sa, ngui bơta chài mok pa tàm broă tam phan tàm suơn cê, kơphê den sùm cèng wơl cồng nha tơnhào uă, cèng wơl priă lơh geh sùm ai hìu bơnhă in”.

Ờ mìng is ồng K’ Kras lơm mờ uă ngan làng bol kòn cau dùl ết nă cau bơh càr Lâm Đồng dê neh brồ guh lik klàs rƀah, bơt bơtàu rài kis hờm ram, chờ hờp. Dilah 10 nam lài, mờr 100 hìu bơnhă làng bol kòn cau dùl ết nă cau là cau K’Ho ơm tàm thôn 4, xã Dà Ploa, kơnhoàl Dà Oai, càr Lâm Đồng geh rlau 60% gơwèt hìu bơnhă rƀah, den tŭ do ờ gam hìu bơnhă lơi rƀah tai mờ uă ngan neh pas gơs mờ tơl ngui tơn sa. Jat mò Ka Rom, Kwang atbồ thôn 4, xã Dà Ploa yal, cồng nha do là kơnờm Đảng mờ Dà lơgar neh lài ngan tơrgùm lam lơh jat dùl ròt bal uă broă lơh, rơndap broă lơh, broă lơh dong kờl ai làng bol kòn cau dùl ết nă cau in tàm tiah do dê. Ngan là ală broă lơh bơcri priă lơh phan bơna, tơrmù rƀah kơ̆ kơljap, dong kờl giă dong kờl priă jền blơi sơntìl phan tam, phan ròng, tàm jàu bơta chài tam phan... neh lơh geh cồng nha ngan. Kơnờm bơh hơ̆, ƀòn lơgar neh geh bơta tam gơl loh làng ngan, rài kis phan bơna mờ nùs nhơm bơh làng bol dê neh tam gơl uă ngan pơndrờm mờ lài do.

Mò Ka Rom, đơs: “Geh Đảng mờ Dà lơgar sền gròi bơcri priă, dong kờl sơntìl phan tam, phan ròng, pờ uă ơdŭ bơto pơlam tàm jàu bơta chài ngui măi mok pa, broă sơng ka sền gàr phan tam, làng bol neh mut ngui mờ lơh jat. Bơh hơ̆, rài kis làng bol tiah do dê neh tam gơl uă ngan, bơta gĭt wă bơh làng bol dê kung tam gơl niam ngan, ală bơhiàn yau bơrngơl gơla neh geh sang tĕ, tơn jơh jơgloh rƀah rao. Broă bơsram sră bơh oh kòn kòn sau dê geh sền gròi, ƀòn lơgar bơt bơtàu bal rài kis pa mờ bơtàu tơnguh”.

Bơh nam 2016 tus nam 2020, càr Lâm Đồng neh bơcri priă mờr 630 tơmàn đong ai ală xã, thôn kal ke uă in. Ồng K’Bát, Ƀí thư Ci ƀộ thôn Păng Dung, xã Dà K’Nàng, kơnhoàl Dam Rông pà gĭt, bơh ală priă bơcri do, rài kis làng bol tàm ală tiah làng bol kòn cau dùl ết nă cau neh geh bơta tam gơl loh làng, ờ gam geh bồ tơngoh kơ̆p gơn wơl, kơldìng wơl tàm bơta dong kờl bơh Đảng mờ Dà lơgar dê tai, mờ lơh is bơtàu tơnguh lơh sa, ờ mìng tơn jơh geh jơgloh rƀah mờ uă hìu bơnhă neh brồ guh lơh pas, bơt bơtàu ƀòn lơgar bơtàu tơnguh.

Ồng K’Bát, đơs: “Bơh tŭ lam lơh uă broă lơh bơcri priă bơh Đảng mờ Dà lơgar dê, ngan là ală broă lơh geh ngan bơh kơnhoàl dê lơh jat tàm ù tiah do dê neh cèng wơl cồng nha niam ngan. Làng bol tàm tiah do lơh jat jơh nùs ngan, tus bal bơt bơtàu, tă pơgồp ngai lơh broă, pà is ù lơh gùng, lơh bal lơh broă sa, bơtàu tơnguh lơh sa. Bơh hơ̆, muh mat ƀòn lơgar neh geh bơta bơtàu tơnguh, tam gơl uă ngan pơndrờm mờ lài do”.

Càr Lâm Đồng geh 1 tơlak 300 rơbô nă làng bol, tàm hơ̆ làng bol kòn cau dùl ết nă cau geh rlau 25%. Uă nam do, kơnờm geh bơta sền gròi bơcri priă bơh Đảng mờ Dà lơgar dê bè tơl bơta, rài kis làng bol tàm tiah sar lơgar ngài, tiah làng bol kòn cau dùl ết nă cau tàm càr neh geh bơta bơtàu tơnguh pa, tơl làm tàm jơh ală gah broă. Tàm tơngai bơh nam 2022 tus nam 2025, càr Lâm Đồng neh geh jơnau lơh nền pơn jat tai bơcri priă mờr 1 rơbô 700 tơmàn đong nàng lơh jat broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol kòn cau dùl ết nă cau. Do là bơta sền gròi bơcri priă kwơ màng ngan bơh Đảng mờ Dà lơgar dê nàng dong ală tiah làng bol kòn cau dùl ết nă cau tàm càr Lâm Đồng in geh tai bơta gơn kơnờm sùm bơtàu tơnguh rlau tai