Kơnhoàl Xín Mần, càr Hà Giang tus tơngai tŭ do neh lơh sir geh rlau 80% jơnau kờñ bè dong kờl hìu ơm ai hìu bơnhă jơi bơtiàn dồ ết nă cau mờ tiah kơh bơnơm in. Ờ mìng bè hơ̆ lơm, kơnhoàl do gam kràñ cê jơh nùs tàm broă jòi ală broă lơh drơng broă lơh sa ai làng bol in bơtàu tơnguh lơh sa. Gơnoar atbồ neh ờ rngòt bòl glar kal ke ngai mang jòi cau lơh broă bal, tơnguh uă cồng nha lơh geh bơh phan tam dê. Ală dơ̆ pơrjum geh bơyai lơh sùm. Ală kwang bàng bè Kwang atbồ Phòng Lao động Thương ƀiñ mờ xã hội kơnhoàl Xín Mần Đặng Thu Chang pal yal broă rơndăp lơh lơh jat, tŭ tơngai ai priă dà lơgar mờ hơ dùl poh dùl dơ̆: “Kơnhoàl lơh kràñ cê jơh nùs ngan. Ală xã pal gàr niam mờ geh jơnau yal, pal geh jơnau hơ, sồr geh kơnòl bơh cau lam bồ kong kơnòl broă tàm jơh ală broă lơh jat broă lơh jơnau kờñ Dà lơgar dê. Tàm hơ̆ dờp loh kơnòl  bơh să tờm dê tàm broă lơh, ờ lơh geh jơnau kờñ den dờp is khà sền sơwì lồi nam kung bè là geh jơnau sồr bè broă lơh kwang bàng dê”.

Bơh bơta geh ngan jat sền 3 broă lơh jơnau kờñ Dà lơgar tàm ală tiah, Phó Củ tich Mpồl duh broă Jơi bơtiàn bơh Quôk hội Trần Thị Hoa Ry đơs jơnau gơlam tus bơta geh ngan geh tiah lơh niam ngan mơya kung geh ală tiah den ờ gơtùi lơh:“Ală tiah lơi mờ geh kấp ủy, gơnoar atbồ sền gròi den sồr lơh pràn kơl dang ngan, ai kwang bàng tơl bơta pràn jak. Mờ bơh ai kwang bàng lơh geh tơl bơta pràn jak bè hơ̆, den tàm ală broă lơh đơng lam, sồr lơh, pơgồp bal niam ngan mờ cribơyai bal lơh gơ gơs ală sră nggal gơwèt gơnăp gơnoar bơh gờñ ngan. Añ gŏ bol khi ờ mìng kơ̆p tus ală bơta kal ke, kòl yan hơ̆ sồng nàng tă bơsong mờ ngan là bơh tàm kấp hơđang neh geh bơta rcang lài tơlik mat mpồl lơh broă, geh tŭ at tê sơñio broă ai kwang bàng kấp hơđơm in.”

Rê wơl mờ jơnau yal bơh kơnhoàl rƀah tiah kơh bơnơm lŭ Xín Mần, càr Hà Giang dê. Bơta lơh jat niam gơnoar broă cau tờm, bơceh lơh bơh làng bol dê, bơta lơh krơh lam lài bơh kwang bàng, đảng viên mờ bơta mut lơh broă bal bơh jơh bal anih lơh broă cíñ trị dê là bơta kwơ màng nàng lơh nền lơh geh cồng nha ală broă lơh jơnau kờñ Dà lơgar dê. Jat Củ tịc Ủy ƀan Ñân zân càr Hà Giang Nguyễn Văn Sơn, do kung là jơnau gơbàn nàng càr Hà Giang là dùl tàm 3 càr bơh gùt lơgar dê lam lài dan geh lơh jat broă lơh lơh tơrlòng lài tam pà kấp, tàm pà gơnoar. Củ tịc Ủy ƀan Ñân zân càr Hà Giang Nguyễn Văn Sơn đơs:“Càr ờ gơtùi lơh ala ai kơnhoàl in ờ, kơnhoàl ờ gơtùi lơh ala ai xã in sơl mờ sơlơ̆u wơl, Dà lơgar ờ lơh ala ai càr in ờ. Ngan là tàm càr tŭ do kung rơngòt lơh tìs sơl, geh tŭ khi gam lơh bal bal lơm, den oh mi tàm kơnhoàl kung rơngòt lơh tìs den kung lơh bal bal sơl den jàu ai xã in kung lơh bal bal bè hơ̆ lơm. Den tàng bơt bơtàu broă lơh krơi is bơh Quôk hội, den Cíñ phủ lơh ngan ngồn jơh ală bơta, tam pà ai ală tiah in. Tŭ hơ̆, kwang bàng lơh ờ rngòt tìs tai mờ kwang bàng rơ̆p geh bơta rcang lài nàng lơh jat”.

Tam pà kấp, jàu bơta pin dờn. Ală tiah rơ̆p rcang lài nùs nhơm khin cha lơh, khin cha lơh bơtàu tơnguh uă, khin cha kong kơnòl nàng lơh sir 3 broă lơh jơnau kờñ Dà lơgar dê. Hơ̆ là jơnau đơs nền bơh Phó Kwang atbồ Sở Kế hoạc mờ Đầu tư càr Quảng Bình Mai Hồng Ngọc dê: “Mơya, broă lơh tơrlòng lài tam pà kấp ai kấp kơnhoàl in kung pal sền ngăc, sơlơ tơnguh broă lòt sền jat sền bơh anih lơh broă đơng lam pơgồp bal ală broă lơh dê mờ di tŭ dong kờl, bơto pơlam ai ală kơnhoàl, xã, cau tờm bơcri lơh bơh broă lơh, ring bal, jàu broă rơndăp lơh priă bơcri nàng broă lam lơh jat kung bè lơh jat sền sơwì, tơm priă bơh ală broă lơh, rơndăp broă lơh dê”.

Mờ nùs nhơm rcang lài “jăt sền” pal “nền nòn”, song dơ pă, ờ pleh pồn, di tŭ sền gĭt ală bơta kal ke, kòl yan, Quôk hội pơn jat tai lòt bal mờ Cíñ phủ nàng jòi geh gùng dà broă lơh di pal ngan rlau jơh, ngan là tŭ tơngai lơh jat 3 broă lơh jơnau kờñ Dà lơgar tơngai bơh nam 2021-2025 mìng gam 2 nam tai là pal lơh sir. Ngai 29 nhai 11 nam 2023, Pơrjum dơ̆ 6 Quôk hội khoă 15 neh ring bal Nghị quyết kwơ màng bè tơngume do. Do là dơ̆ sơnrờp dùl mìng dùl tơngume jat sền bơh Quôk hội dê geh lơh nggùl tơngai lơh broă, “ tơngai sền sơ wì” ring bal mờ tŭ tơngai lam lơh. Dơ̆ sơnrờp, dùl mìng dùl tơngume jat sền dờng rlau jơh tơrgùm wơl jơh 3 broă lơh jơnau kờñ Dà lơgar kwơ màng bơh Dà lơgar dê. Jat sền mờ nùs nhơm lơh jat sùm là bơ̆t mờ rcang sơndră, tàm hơ̆, bơt kung gam là kwơ màng ngan rlau jơh nàng tơl broă lơh in ngai sơlơ lơh niam rlau tai. Củ tịc Quôk hội Vương Đình Huệ neh đơs sùm bè hơ̆ tàm uă dơ̆ pơrjum mờ pà gĭt: “Quôk hôi ring bal nàng Cíñ phủ in mhar lơh, yal mờ Quôk hội in tàm pơrjum rềp ngan rlau jơh Jơnau rcang cih Nghị quyết bè lơh tơrlòng lài bàr pe broă lơh, broă lơh krơi is mờ broă tam pà kấp ai kấp kơnhoàl in lơh nền sră cih mat, rơndăp tăp sèng, tam pà mờ ngui priă dà lơgar tàm broă lam lơh jat ală broă lơh jơnau kờñ Dà lơgar”.

Uă kwang bàng Quôk hội kơ̆p kờñ, Nghị quyết bơh Quôk hội dê rơ̆p bơsong geh bơta kal ke ală bơta ờ hềt di pal tàm tŭ lam lơh 3 broă lơh jơnau kờñ Dà lơgar dê. Kwang bàng Rơ Châm Hphik, mpồl Gia Lai đơs: “Nghị quyết geh bơta jal mhar mờ di tŭ, di pal ngan mờ nùs nhơm làng bol dê, kwơ màng là rơ̆p tă bơsong geh ală bơta kal ke tờm gam gơ kòl tàm tŭ tơngai lam lơh 3 broă lơh jơnau kờñ Dà lơgar dê”.

Bal mờ broă ring bal Nghị quyết jat sền dờng ngan rlau jơh bè “Broă lam lơh jat ală Nghị quyết bơh Quôk hội dê bè ală broă lơh jơnau kờñ Dà lơgar bè bơt bơtàu ƀòn lơgar pa tơngai bơh nam 2021-2025; tơrmù rƀah kơ̆ kơl jăp tơngai bơh nam 2021-2025; bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm tơngai bơh nam 2021-2030”, Quôk hội kung neh jàu ai Cíñ phủ in yal mờ Quôk hội tàm pơrjum pa do ngan rlau jơh dùl Nghị quyết krơi is bè tam pà kấp, tàm pà gơnoar, dờp gơnoar, tơrmù sră nggal nàng di tŭ tă bơsong kal ke, kòl yal, dong broă lam lơh ală broă lơh jơnau kờñ Dà lơgar dê lơh geh cồng nha, lơh sir broă lơh di mờ tŭ tơngai pơrgon, lơh geh bơta pin dờn mờ rài kis chờ hờp chờ hờn bơh làng bol dê.