Bơh àng drim gờñ, git nđờ rơhiang nă làng bol kis tàm xã tiah nhàr dà lơgar Ia Rvê neh tơrgùm tàm hìu lơh broă bơh xã dê nàng tus bal broă lơh “Nam pa tiah nhàr dà lơgar ram nùs làng bol ƀòn lơgar” mờ uă broă lơh geh kwơ bè: “Ngai chờ mbar tơlir”, “bơyai lơh kham kòp, pà sơnơm ờ sa priă, sền gàr bơta pràn kơl dang să jan làng bol in”, “hìu tăc phan 0 đong” mờ ală jơnau nhơl ờs mờng jăt bơhiàn tàm tiah do dê.

Tus bal broă lơh mờ geh kham kòp mờ pà sơnơm ờ sa priă, ồng Trần Kế Toán, kis tàm ƀòn 11, xã Ia Rvê chờ hờp pà git, broă lơh neh lơh niam rơlao tai nùs nhơm tam klăc bal ling klàng mờ làng bol tàm tiah nhàr dà lơgar. Mờ lam sồr, pơn dờm pơn điang nùs nhơm nàng làng bol chờ hờ wă rò satềp, lơh ngan rơlao tai tàm broă tơnguh bơtàu lơh sa mpồl bơtiàn, bơ̆t bơtàu tiah nhàr dà lơgar pràn kơl dang rơlao: “Bơyai lơh broă “Nam pa tiah nhàr dà lơgar ram nùs làng bol ƀòn lơgar” do geh kwơ màng ngan, tơlik broă sền gròi bơh Đảng, Dà lơgar, ală kấp mờ do kung tơlik bơta đềt mềr đah ling klàng mờ làng bol. Jơh ală cau kis tàm do ndrờm chờ hờp, lam sồr bal làng bol tơmù ală bơta kal ke, lơh ngan tơnguh bơtàu lơh sa mpồl bơtiàn, tơn jơh jơgloh tơmù rơƀah”.

Đại tá Phạm Hữu Chiến, Ƀí thư Đảng ủy, Cíñ ủy Mpồl ling sền gàr tiah nhàr dà lơgar càr Dăk Lăk pà git, broă lơh “Nam pa tiah nhàr dà lơgar ram nùs làng bol ƀòn lơgar” geh bơyai lơh pah nam nàng tam pà bal ală kal ke, dong kờl làng bol ală kòn cau kis tàm tiah nhàr dà lơgar geh satềp hờm ram.

Nam do, broă lơh geh jào pà 3 nơm hìu “hìu ram tiah nhàr dà lơgar” klơm 2 rơbô 800 nơm mbar tơlir; pà 220 pò phan ai ală hìu nhă geh sră dong kờl bơh dà lơgar, hìu gơtìp kal ke; mờ pà 57 nă kơnòm dềt gam geh Cau ling sền gàr tiah nhàr dà lơgar dong kờl tàm broă lơh “dong kờl oh lòt bơsram” mờ “kòn ròng pôs ling sền gàr tiah nhàr dà lơgar”; kham, sơm kòp, pơlam sền gàr bơta pràn kơl dang să jan, pà sơnơm ờ sa priă ai di pơgăp 300 nă cau in. Đại tá Phạm Hữu Chiến đơs tờm, broă lơh là kờñ tam pà bal mờ kờñ ưn ngài bơh cau ling sền gàr tiah nhàr dà lơgar dê gơwèt mờ làng bol kis tàm tiah nhàr dà lơgar: “Broă lơh “Nam pa tiah nhàr dà lơgar ram nùs làng bol ƀòn lơgar” gam là broă kờñ ưn ngài làng bol ală kòn cau kis tàm tiah nhàr dà lơgar tàm broă bơ̆t bơtàu, atbồ, sền gàr gơnoar tờm ù tiah, bơta lơngăp lơngai tiah nhàr dà lơgar tàm ală nam do. Broă lơh geh bơyai lơh tàm xã Ia Rvê ngai do là broă lơh sơnrờp ngan, sơn đờm ală broă lơh bơh kwang bàng, cau ling sền gàr tiah nhàr dà lơgar tàm 4 xã tiah nhàr dà lơgar, tus bal tài dùl nam pa hờm ram, dùl satềp tơrgùm bal ai làng bol ală kòn cau kis tàm tiah nhàr dà lơgar in”.

Chờ hờp tŭ tus Broă lơh “Nam pa tiah nhàr dà lơgar ram nùs làng bol ƀòn lơgar” bal mờ kwang bàng, cau ling mờ làng bol tàm xã Ia Rvê, ồng Y Biêr Niê, Phó Ƀí thư Tỉñ ủy Dăk Lăk pà git, broă lơh mùl màl là ngai chờ bơh làng bol ală kòn cau tàm tiah nhàr dà lơgar dê; ai geh broă lơh chài rơgơi geh kwơ, geh uă bơta niam chài rơgơi kòn cau, cèng geh bơta chờ, nùs nhơm chờ hờp ai làng bol tŭ nam pa tus. Ồng Y Biêr Niê pơn jờng ală kwang bàng, cau ling sền gàr tiah nhàr dà lơgar càr neh sùm ai gŏ gơnoar bơh mpồl ling tam dră, mpồl ling lơh broă, mpồl ling lơh sa, tàm tiah lơi kờñ cau ling geh, broă lơi kal ke geh cau ling. Cau ling sền gàr tiah nhàr dà lơgar càr lơh gơs niam kơnòl atbồ, sền gàr gơnoar tờm ù tiah, bơta lơngăp lơngai tiah nhàr dà lơgar, mờ là mpồl lam lài tus bal tơn jơh jơgloh tơmù rơƀah, drơng gàr bơta pràn kơl dang să jan làng bol in, tơnguh bơtàu lơh sa mpồl bơtiàn tàm tiah nhàr dà lơgar gam uă kal ke: “Bơta kwơ mùl màl mờ Broă lơh “Nam pa tiah nhàr dà lơgar ram nùs làng bol ƀòn lơgar” cèng geh bơta tờm là tơlik kơnòl, nùs nhơm niam, broă kờñ ưn ngài bơh ală cau ling sền gàr tiah nhàr dà lơgar dê gơwèt mờ làng bol ngai mờ mang bal mờ cau ling sền gàr tiah nhàr dà lơgar geh sùm, lơh “ñjrong nhàr dà lơgar kis” tàm tiah nhàr dà lơgar; ai tơngŏ nùs nhơm tam klăc bal ling klàng mờ làng bol, lgơguh bơta pràn, nùs nhơm pin dờn, bồ tơngoh ngăc ngar lơh ngan sền gàr kơl jăp gơnoar tờm ù tiah nhàr dà lơgar dê”.