Ală ngai lồi nam, làng bol kis tàm thôn Chiềng mờ thôn Đừng Nhạp, xã tiah nhàr dà lơgar Ia Lốp, kơnhoàl Ea Súp, càr Dăk Lăk chờ hờp ngan tŭ tus 6 jơ mang, broă lơh ồs đèng àng tàm gùng pa geh cau ling sền gàr tiah nhàr dà lơgar crăp lơh àng tàm gùt ƀòn. Ồng Lang Văn Tuyển, Ƀí thư Ci ƀộ thôn Chiềng pà git, bơta àng ồs đèng neh lơh tơn jơh bơta klam jơngo, lơh broă rê tàm hìu cau lơi git hìu cau hơ̆ bơh ngai lài. Ala mờ hơ̆, geh ồs đèng tàm gùng, tŭ trồ mang làng bol lik tàm gùng, boh bơr nhơl chờ geh uă ngan, nùs nhơm ƀòn lơgar gơguh đềt mềr rơlao, broă lòt rê kung ring lơngai rơlao: “Geh ồs đèng àng tàm ală gơl gùng den gơmù uă ngan bơta rềs àr tàm gùng lòt, gùng do tơngai lơh neh jŏ, den tàng tŭ do neh ờ niam uă ngan, tŭ do geh broă lơh sòl àng do, den broă lòt rê kung ƀuơn rơlao. Dơ̆ bàr là bơta lơngăp lơngai ờ do ờ dă geh gàr niam rơlao. Broă lơh do geh kwơ màng mờ làng bol ƀòn lơgar kơ̆p gơn ngan”.

Thiếu tá Vũ Văn Dương, Cíñ trị viên phó pôs ling sền gàr tiah nhàr dà lơgar Ea H’ Leo pà git, broă lơh “sòl àng tiah nhàr dà lơgar” tàm thôn Chiềng mờ thôn Đừng Nhạp là broă lơh dơ̆ 4 geh Pôs ling sền gàr tiah nhàr dà lơgar Ea H’ Leo đơng lam lơh tàm xã Ia Lốp. Tơl broă lơh geh ñjrong lòs mờ ală ƀong đèng sòl àng 200W, ngui phan lơh broă bơh bơta pràn măt tơngai, geh crăp sòl àng di jăt mờ tơngai pơrgon neh geh ai. Tŭ do, mpồl do gam pơn jăt tai hòi jà ală mpồl lơh sa kă bro, cau geh nùs nhơm niam nàng tus bal lơh tai ală broă lơh sòl àng tiah nhàr dà lơgar, pơgồp bal tàm broă lơh pràn broă tơnguh bơtàu lơh sa mpồl bơtiàn, gàr niam bơta lơngăp lơngai ờ do ờ dă tàm thôn: “Tàm tơngai tus, mpồl do pơn jăt tai lơh jăt jơnau đơng lam bơh Đảng ủy, Mpồl đơng lam ling sền gàr tiah nhàr dà lơgar càr kung geh pơgồp bal mờ ală mpồl lơh broă, ală tiah nàng hòi jà ală mpồl lơh broă, cau geh nùs nhơm niam ai geh lơh bè lơi sơlơ geh uă sơlơ niam ală broă lơh sòl àng tàm tiah nhàr dà lơgar. Tài gùng lòt tàm xã ngai sơlơ ờ niam, nàng gàr niam bơta lơngăp lơngai, ờ do ờ dă, pơgồp bal tàm broă gàr niam bơta lơngăp lơngai ờ do ờ dă tàm ƀòn lơgar den bol añ geh pơgồp bal nàng lơh broă sòl àng tiah nhàr dà lơgar”.

Lơh broă bal mờ cau ling sền gàr tiah nhàr dà lơgar càr Dăk Lăk tàm broă lơh ală broă sòl àng tiah nhàr dà lơgar tàm tơngai do geh uă ngan mpồl lơh broă, cau dùl nă să mờ ală mpồl lơh broă nùs nhơm dong kờl. Lŏ Bùi Thị Nữ, ala măt mpồl lơh broă nùs nhơm dong kờl is NDG bơh ƀòn dờng Hồ Chí Minh neh tus tàm xã tiah nhàr dà lơgar Ia Lốp pà git, gŏ bơta gơtìp glar bòl bơh làng bol bal mờ bơta glar bòl bơh ală kwang bàng, cau ling tàm do, mpồl do neh mờ gam hòi jà, lam sồr nàng dong kờl tai uă broă lơh geh kwơ: “Añ gŏ cau ling sền gàr tiah nhàr dà lơgar den niam ngan mờ sùm lơh broă bal mờ làng bol. Làng bol kis tàm tiah nhàr dà lơgar den kal ke ngan, kis tàm tiah kal ke ờ geh bơta bơtoah bè añ dê kis tàm ƀòn dờng den tàng añ neh rơwah tiah nhàr dà lơgar nàng dong kờl làng bol geh tơmù bơnah lơi kal ke. Mờ mpồl bol añ rơwah cau ling sền gàr tiah nhàr dà lơgar tài ală cau ling ñhăp ñhar ngan tàm broă dong kờl làng bol. Bơdìh mờ broă lơh sòl àng geh uă broă lơh ndai tai den tàng mpồl bol añ geh tap sèng tơngai nàng tus sền tai”.

Bơh 3 nam lơh jăt broă lơh “sòl àng tiah nhàr dà lơgar” tus tŭ do, cau ling sền gàr tiah nhàr dà lơgar càr Dăk Lăk neh lơh geh rơlao 10 broă lơh ồs đèng àng tàm gùng ai ală ƀòn tàm 4 xã tiah nhàr dà lơgar bơh 2 kơnhoàl Ea Súp mờ Buôn Đôn, mờ khà priă git nđờ rơhiang tơlăk đong. Đại tá Đỗ Quang Thấm, Phó Cíñ ủy mpồl ling sền gàr tiah nhàr dà lơgar càr Dăk Lăk pà git, broă lơh do gam geh rề ơnàng lơh tàm uă tiah, bal mờ broă lơh bơh ală cau ling sền gàr tiah nhàr dà lơgar, den geh uă mpồl lơh broă, cau dùl nă să kung neh mờ gam pơgồp bơnah ai ală broă lơh ồs đèng àng tàm gùng tus mờ ală thôn. Ală broă lơh do gam pơgồp bal bơnah tam gơl muh măt ƀòn lơgar, bơ̆t bơtàu ƀòn lơgar pa tàm tiah nhàr dà lơgar. Bơh tŭ hơ̆, dong kờl broă atbồ, sền gàr gơnoar tờm ù tiah, bơta lơngăp lơngai tiah nhàr dà lơgar geh niam rơlao: “Lơh jăt broă bơ̆t bơtàu ƀòn lơgar pa, den bol añ pơgồp bal mờ xã lơh jăt broă lơh sòl àng tiah nhàr dà lơgar. Tŭ do bol añ kung neh lơh ờ uă broă lơh tàm ală xã tiah nhàr dà lơgar, pơgồp bal bơnah broă lơh jăt niam ală jơnau kờñ bơ̆t bơtàu ƀòn lơgar pa. bơh tŭ hơ̆, lơh niam broă lam sồr làng bol lơh jăt niam gùng dà broă lơh bơh Đảng, adăt boh lam bơh Dà lơgar, tàm hơ̆ uă ngan là ngui gơnoar tờm bơh làng bol gơwèt mờ broă bơ̆t bơtàu, atbồ, sền gàr gơnoar tờm ù tiah, bơta lơngăp lơngai tiah nhàr dà lơgar”.

Ală broă lơh sòl àng tiah nhàr dà lơgar bơh cau ling sền gàr tiah nhàr dà lơgar gam cèng tus bơta chờ ai làng bol kis tàm tiah nhàr dà lơgar càr Dăk Lăk in. Ờ mìng dong kờl lơh muh măt ƀòn lơgar tàm tiah nhàr dà lơgar niam, ală broă lơh do gam dong kờl nùs nhơm tam klăc bal ling klàng bal mờ làng bol ngai sơlơ đềt mềr, broă atbồ, sền gàr tiah nhàr dà lơgar ngai sơlơ geh cồng nha rơlao.