Rơlĕ rơlùn lòt tàm gơl gùng lơh mờ bê tông bềng lìu bơkàu geh tam song sèng ngan jăt kềng 2 gah gùng lòt dê, mò K’Puih Hạnh, Ƀí thư Ci ƀộ mơkung là Kwang ătbồ thôn Neh Xo, xã Ia Tôr, kơnhoàl Chư Prông pà gĭt, gùng bơkàu do geh ală hìu làng bol tàm ƀòn lơh gơs bơh gùl  nam lài mờ là dồ bơnah cồng nha lơh geh bơh broă lơh bơ̆t bơtàu ƀòn lơgar pa tàm tiah do dê. Bal mờ muh mat ƀòn lơgar jak chài, sàng goh niam bơnĕ, tŭ lơh jơh ală broă jàu bơ̆t bơtàu ƀòn lơgar pa, rài kis làng bol ƀòn Neh Xo dê kung geh tơnguh tai loh làng ngan, mìng gam wơl 6 hìu lơm (tàm kờp jơh 150 hìu) gam tàm hìu rƀah. Jăt mò K’Puih Hạnh yal, gơ wèt mờ dồ ƀòn jơh ală là làng bol jơi bơtiàn dồ êt nă cau lơm bè Neh Xo do, nàng jà geh làng bol tơrgùm bal pràn, dồ nùs bal, den broă lơh krơh bơh kwang bàng, đảng viên dê là kwơmàng ngan. Mò K’Puih Hạnh, đơs: Đảng viên lòt lài, làng bol lòt jăt tơnơ̆. Lài ngan Đảng viên pal lơh jăt lài ală broă bè tam bơkàu kềng 2 gah gùng, pơnggàr tơlir, tờ bơtô tuh sồ siă, lơh hìu jă brê sàng goh, lơh jăt niam ală jơnau sồr, gùng dà, broă lơh, adăt boh lam Dà lơgar dê; mblàng yal hòi jà làng bol lơh sa jak, tơnguh tai priă lơh geh, tam gơl bơta mờng kwèng kơlôi sơnơng, broă lơh; ờ lời jơnau bau gờñ gơlik geh, ai oh kòn lòt bơsram tus gùng tus dà.

Ndrờm bè hơ̆ sơl, tàm ƀòn Bang, xã Ia Tôr, 11 nă đảng viên tàm Ci ƀộ hòi jà hìu bơnhă, cau pròc mhàm tờm tă pơgồp priă tă lơh, ngai lơh broă nàng lơh gùng mờ lơh jăt ală broă jàu bè tiah ơm kis, lơh sơnơm, bơto bơtê. Ci ƀộ thôn bal mờ gơnoar ătbồ, mặt trận mpồl cau tàm xã Ia Tôr hòi jà làng bol jơh nùs tam pa wơl kơphê, ờ gŏ di koh kơl chi jŏ nam, tàm lùp bơsram bal mờ gơ̆p tuh dà tềm pềr mờ ngui măy mok lơm tàm broă lơh sa. Bơh gùl nam 2023, uă bơta chi tam jŏ nam geh tơnhàu uă, tăc geh giă, neh dong ală hìu tàm thôn geh phan sa, phan prăp pềr. Ồng Puih Pak là làng bol ơm tàm ƀòn Bang, pà gĭt: Rài yau kal ke rlau, tŭ do neh đơh đau rao. Bàr pe hìu bơnhă lơh sa jak là hìu đam, geh rơndeh lơm rao, ờ geh hìu ja, hìu mpìr bè lài tai ờ. Tŭ do rài kis bơtàu tơnguh rlau mờ rài yau rao.

Tŭ do, xã Ia Tôr, kơnhoàl Chư Prông geh rlau 1 rbô 100 hìu làng bol, bal mờ 5 rbô 79 nă làng bol. Tàm hơ̆, làng bol jơi bơtiàn dồ êt nă cau geh mờr 50%. Tàm uă nam bơ̆t bơtàu ƀòn lơgar pa, Đảng ủy xã neh lam bồ, sồr lơh, đơng lam ală anih lơh broă cíñ trị bơh xã tus ală thôn, ƀòn, tam gơl pa gùng dà lơh broă; tơrgùm mblàng yal, hòi jà làng bol jơh nùs tus lơh bal, rơhời lơh sir ală broă jàu.

Lồi nam 2023, xã geh 19 tàm 19 broă jàu bơ̆t bơtàu ƀòn lơgar pa. Jơh ală bơta tàm rài Làng bol dê neh geh tam gơl uă ngan. Tŭ do, khà hìu bơnhă rƀah mờ mờr ndrờm bè hìu rƀah jơh gùt xã gơmù gam hơđơm 8%; priă lơh geh kờp bal dồ nă cau geh 47 tơlak đong dồ nam; Broă lơh bơto bơtê, lơh sơnơm, sền gàr pràn kơldang să jan, sền gàr tiah ơm kis, kis gĭt jơnau gĭt adăt, bơ̆t bơtàu bơta mờng kwèng kis niam chài tàm tiah làng bol ơm kis geh sền gròi; Bơta lơngăp lơngai cíñ trị, rơndăp tăp sèng lơngăp lơngai gùt mpồl bơtiàn geh gàr kơ̆.

Ồng Nguyễn Quang Phương, Phó Ƀí thư Duh broă sùm Đảng ủy xã Ia Tôr, pà gĭt, Đảng ƀộ xã rơ̆p pơn jăt tai lam bồ ală anih lơh broă cíñ trị bơh xã tus thôn, ƀòn lơgar nàng kờñ gàr kơ̆ mờ tơnguh uă ală broă jàu ƀòn lơgar pa. Tàm hơ̆ rơ̆p pơn jăt tai yờ tơnguh kơnòl lơh krơh bơh đảng viên dê nàng lòt bal bal mờ Làng bol tơnguh uă priă lơh geh. Ồng Nguyễn Quang Phương, Phó Ƀí thư Duh broă sùm Đảng ủy xã Ia Tôr, đơs:  Ƀan Lơh kơnòl broă sùm Đảng ủy xã neh geh broă rơndăp lơh mblàng yal bơsram ală kơrnoăt jơnau sồr ai jơh tơl nă đảng viên, kwang bàng mờ làng bol tàm ù tiah xã dê in. Bơh broă bơsram lơh jăt bồ tơngoh nùs nhơm, broă lơh, rài kis Hồ Chí Minh dê den đảng viên rềp mờ làng bol rlau, gĭt wă làng bol rlau, iăt kơno jơnau đơs, bơta kơlôi sơnơng, jơnau kơ̆p kờñ bơh Làng bol dê, yal wơl ai Đảng ủy, gơnoar ătbồ xã in.

Mờ bơta tam klăc bal tàm tŭ lơh jăt ală kơrnoăt, broă lơh, broă rơndăp lơh, Đảng ủy, gơnoar ătbồ mờ Làng bol gam bal mờ gơ̆p bơ̆t bơtàu rài kis ngai sơlơ tam gơl pa bơtàu tơnguh tàm tiah nhàr lơgar càr Gia Lai dê.