Lơh broă tàm gah lơh sơnơm bơh nam 2014, bŭ lah ơm tàm ƀòn dờng Hồ Chí Minh ha là rê tàm càr Dăk Lăk, klao pơnu Y Pốt Niê kung gam kờñ gơboh sùm mờ bơta ƀô thồm kơphe coh is hìu nhă dê. Nhai 8 nam 2019, Y Pốt sơbì broă lơh sơnơm, mŭt lơh broă mờ kơphe.

Bi crơng gơs Kông ty TNHH Êđê Cafe mờ geh Kụk Ai ngui bơta ngăc ngar ai cih khà măt kă bro. Tơnơ̆ mờ 3 nam lơh, khà măt kă bro “Êđê Cafe” geh drà kă bro tàm lơgar mờ lơgar bơdìh kờñ; geh gơnoar atbồ càr dờp phan OCOP 4 sơrmañ. Mblàng bè măt sơn đan Kông ty là “Êđê Cafe”, Y Pốt Niê pà git: “Đơs bè kòn cau Rơđê den geh ờ uă ngan kòn cau Rơđê lơh sa kă bro, añ kờñ là cau sơrnrờp ngan lam lài bè kă bro, dơ̆ 2 tai là kờñ cèng bơta gơrềng bơh kòn cau Rơđê dê, kờñ ai gŏ kòn cau Rơđê gơtùi lơh ală broă mờ kwơ màng rơlao tai là kòn cau Rơđê gơtùi cèng geh phan geh lơh tờm bơh să tờm dê ai jơh gùt dunia in ndrờm git tus. Tus ngai do den añ neh ai gŏ bơta do mờ ngai sơlơ geh uă cau git tus bè Êđê Cafe”.

Nàng geh tơl phan lơh kơphe ƀòk, Y Pốt pơgồp bal blơi kơphe bơh làng bol kis tàm ƀòn mờ khà priă kas rơlao mờ tàm drà kă bro 10 rơbô đong tàm 1 kĭ gar. Bal mờ hơ̆, bi dong kờl sơntìl tờm sầu riêng, ƀơ nàng làng bol in tam bơrlŭ bal, lam sồr làng bol tam gơl tam phan jăt broă lơh hữu kơ. Tus tŭ do, kông ty bi dê neh geh tiah tam rơlao 50 lồ kơphe. Kông ty kung neh ai broă lơh kơl jăp git nđờ jơ̆t nă cau lơh broă là kòn cau Rơđê, mờ priă geh pah nhai bơh 12 tus 20 tơlăk đong. Ồng Y Phen Niê, Củ tịc mpồl làng bol lơh broă sa xã Dray Sap pà git, bơh broă lơh Y Pốt dê, bồ tơngoh kơlôi sơnơng tàm broă lơh sa suơn sre làng bol dê kung neh rơhời tam gơl, rài kis kung ngai sơlơ tơl ngui tơl sa rơlao: “Broă lơh jăt mpồl pơgồp bal bơh Kông ty Êđê Cafe geh uă ngan làng bol tus nàng bơsram bal. Bơh tàm tơngu me hơ̆ neh cèng wơl geh uă broă lơh sa mờ geh uă priă bơh tàm broă tam kơphe, cèng geh cồng nha uă ngan mờ broă pơgồp bal hơ̆ ai geh bơta niam tus mờ broă tơnguh bơtàu ƀòn lơgar dê uă ngan”.

Bơdìh mờ phan geh lơh ƀòk kơphe, Y Pốt jòi, kơlôi sơnơng lơh geh uă bơta phan geh lơh mờ ai geh bơta krơi is bơh phan geh lơh bi dê. Tŭ do, bi neh lơh gơs bơta phan kơphe pơgồp bal mờ ală bơta plai, kơnuh chi mờ geh uă ngan cau kờñ. Bi sùm tus bal mờ ală dơ̆ ràng tơlik, drà kă bro mờ broă lơh bè phan geh lơh bơh broă lơh sa suơn sre hữu kơ, yal phan geh lơh tàm ală pang internet... nàng jòi drà kă bro. Uă mpồl lơh broă neh tus tơn nàng jòi sền mờ lơh broă bal tàm broă kă bro. Bi Vũ Trường Sinh, Kwang atbồ Kông ty Logicstic Tân Phát Địa, bơh càr Đồng Nai tus pơgồp bal kờñ lơh sa kă bro tàm Kông ty Êđê Cafe yal: “Bơh bàr ngai gơlơh ơm tàm do, mờ lơh broă mùl màl bơh tàm đơm anih lơh broă tus tàm tiah lơh broă, añ gơlơh phan geh lơh mùl màl niam. Den tàng kơ̆p kờñ bơh đah añ dê mờ Êđê Cafe là lơh broă bal tàm tơngai tus, añ geh dùl broă lơh jŏ jòng ai phan geh lơh tăc mờ lơgar bơdìh”.

Lơh kơphe bơtăng, Y Pốt lơh geh uă ngan cồng nha lơngồt. Nam 2020, Kông ty Êđê Cafe geh Viện kơlôi sơnơng mpồl lơh sa kă bro di mơ mờ dềt ai sră dờp “Mpồl 10 – Khà măt kă bro geh pin dờn pe tiah, phan broă lơh drơng ala geh bơta bơkah uă”. Nam 2021, kơphe Robusta bơh Kông ty Êđê Cafe geh dờp “Phan lơh sa suơn sre ƀòn lơgar geh pơnrơ kấp càr”, Phan OCOP 4 sơrmañ càr Dăk Lăk dê. Pa do ngan, Y Pốt Niê là dùl tàm ală “Cau lơh sa suơn sre Việt Nam jăk chài ngan nam 2022” geh Mpồl làng bol lơh broă sa Việt Nam pơn jờng. Đơs bè gùng dà broă lơh tus do, Y Pốt yal: “Sơnrờp ngan là tiah tam pal ơnàng mờ geh jơh tơn gùt xã Dray Sap mờ kơnhoàl Krông Ana do ndrờm geh lơh jăt mờ là tiah tơrbŏ bơh Êđê kơphe dê. Jơnau kơ̆p kờñ ngan bơh Êđê Cafe dê là cèng tus phan geh lơh geh kwơ màng ngan, phan geh lơh mùl màl ngan ai jơh gùt dunia in git tus bal”.

Mờ nùs nhơm kờñ gơboh bal mờ broă lơh ngan ờ ơm gời, Y Pốt Niê neh cèng bơta bơkah kơphe bơh kòn cau bi dê gơguh bơtàu ngài.