Hìu bơnhă gơwèt hìu bơnhă rƀah, ờ tơl ù lơh sa, bơklau neh chơ̆t pơgap mờ do 3 nam tài bơh kòp kơn jơ̆, bi H Rung Mlô (mè Trâm), ơm tàm ƀòn Ea Kjoh A, xã Ea Drông, thị xã Buôn Hồ pal dùl nă să lơh ngan ròng 2 nă kòn gam tàm sơnam lòt bơsram. Tềng đap rài kis kal ke bè hơ̆, bi neh geh dong kờl dùl nơm kơnrồ me mờ dùl yô kòn be sơntìl nàng ròng. Bal mờ hơ̆, bơh rơndap broă lơh “Brồ guh” bi neh geh bơto pơlam bơta chài ròng phan nàng mpồl phan ròng in deh dờng rơ̆ rài. Bi H Rung Mlô, đơs:“Añ geh dong kờl kơnrồ me mờ be me jat hìu bơnhă rƀah, rài kis kal ke uă, ờ geh gùng dà lơi nàng bơtàu tơnguh lơh sa. Den kung kơ̆p gơn là geh tơl pràn kơl dang să jan nàng lơh sa, bơtàu tơnguh phan ròng nàng geh ală bơta ròng siam ai oh kòn in bơsram sră tus gùng tus dà”.

 “Brồ guh” là rơndap broă lơh bơh mpồl dong kờl kòn bơnus rcang sơndră jơgloh rơƀah gùt plai ù mờ dong kờl jal mhar (CARE dunia) tàm lơgar Việt Nam pơgồp bal mờ Anih tờm bơtàu tơnguh mpồl bơtiàn mờ ală mpồl lơh broă dong kờl gam lam lơh tàm càr Dăk Lăk. Jat hơ̆, tàm 2 nam bơh nam 2023-2024, rơndap broă lơh wèt tus broă sơlơ bơtàu tơnguh rài kis lơh broă sa ai hìu bơnhă cau lơh broă sa in, ngan là cau ùr jơi bơtiàn kòn cau dùl ết nă cau ơm tàm 2 xã Ea Drông mờ Cư Bao, thị xã Buôn Hồ.

 Jat mò Vũ Lan Hương, Atbồ rơndap broă lơh bơh mpồl CARE dunia dê tàm Việt Nam yal, rơndap broă lơh rơ̆p lòt bal tơn mờ pơgap 4 rơbô nă làng bol jat broă lơh “at tê sơñio broă lơh” bơh broă lơh wàng rò, tàm bơrlŭ phan sa, rcang sơndră kòp ai phan ròng in; tus ală bơta chài gĭt dơ̆ ngui priă jền, tềm pềr priă ngui sa. Bơto pơlam lơh mờ gàr sùm ală broă lơh tềm pềr, hòi jà tă pơgồp priă mpồl bơtiàn nàng lơh geh priă càn ai làng bol in. Lam lơh ală broă lơh tìp mat, gĭt mờ ală mpồl tăc bro, lơh gơlik uă nàng tơnguh uă bơta kwơ phan bơna dê. Rlau mờ hơ̆ là wèt tus broă bơt bơtàu ală phan bơna OCOP. Mò Vũ Lan Hương pà gĭt, tàm 2 nam, rơndap broă lơh jơnau kờñ pơgồp bơnah bơtàu tơnguh rài kis ai pơgap 15 rơbô nă cau in mờ rề ơnàng bơta kwơ uă rlau ai mpồl bơtiàn in, mờ cau lài ngan geh dong kờl là cau ùr làng bol kòn cau dùl ết nă cau.

Mò Vũ Lan Hương, đơs: “Tàm rơndap broă lơh den bol añ rơ̆p geh 3 bơnah broă lơh tờm, sơnrờp là ală broă geh gơrềng tus tơnguh uă bơta gĭt wă bè bơtàu tơnguh rài kis lơh broă sa, tàm hơ̆ geh ală bơta geh gơrềng tus bơta chài lơh sa, tam phan, ròng phan. Dong kờl nàng làng bol in gơtùi tơnguh uă bơta chài geh gơrềng tus atbồ priă jền mờ tus bal mờ ală khà priă bơcri nàng drơng ai broă lơh sa bơh khi in. Mờ bơta kwơ màng ngan nàng gơtùi bơtàu tơnguh rài kis lơh broă sa kơ̆ kơl jap, hơ̆ là pal gĭt mờ drà kă bro, pal tăc geh phan bơna mờ tàm jơh 3 gah broă hơ̆ den rơ̆p là ală broă lơh lòt bal mờ mpồl bơtiàn nàng lơh mbè lơi sơlơ tơnguh geh bơta lơh bal đah ală cau tàm mpồl bơh mpồl bơtiàn dê mờ sơlơ tơnguh jơnau đơs mờ gơnoar broă bơh cau ùr dê niam rlau tàm jơh ală broă bơh lơh sa tus broă tăc bro”.

 Cư Bao mờ Ea Drông là 2 xã mìng lơh sa suơn sre lơm, mờ rlau 80% khà kờp làng bol là làng bol kòn cau dùl ết nă cau, rài kis bơh làng bol dê gam kal ke uă ngan. Ồng Võ Văn Sự, Kwang atbồ cơldŭ lơh broă Lơh sa thị xã Buôn Hồ pà gĭt, bơh lòt sền pà gŏ 2 xã geh bơta nàng ròng kơnrồ mờ be. Den tàng, broă lam lơh rơndap broă lơh geh kơ̆p gơn pờ geh tŭ tơngai niam nàng làng bol in bơtàu tơnguh lơh sa geh cồng nha rlau tai.

Ồng Võ Văn Sự, đơs: “Bơta geh is bơh Buôn Hồ dê đơs bal mờ 2 xã do đơs is bè trồ tiah, trồ tơngai duh mrềt den ƀuơn ngan nàng ròng uă 2 phan poan jơng do. Ngan là poăc be tŭ do giă tăc tàm drà kă bro gơ kung niam ngan sơl, giă den bè ờs đau. Den tàng bơtàu tơnguh rơndap broă lơh là di pal gơwèt mờ 2 xã do dê. Pin dờn là lài ngan là rơ̆p tam gơl bơta gĭt wă bè broă lơh ròng phan bơh làng bol kòn cau dùl ết nă cau dê, pơgồp bơnah tơn jơh jơgloh, tơrmù rƀah, tơnguh uă bơta niam rài kis làng bol dê. Mờ bơh rơndap broă lơh do rơ̆p lơh gơ rề uă tàm mpồl bơtiàn uă rlau.