Bơh àng drim gờñ, làng bol kis tàm 3 ƀòn là ƀòn Pa, ƀòn Năng mờ ƀòn Hoang neh rơcang ală phan soh ờs mờng nàng tus tơrgùm bal tềng hìu chài rơgơi ƀòn Pa-do là anih geh bơyai lơh Ngai chờ tam klăc dờng gùt jơi bơtiàn kòn cau mpồl ƀòn xã Cư̆ Prao, kơnhoàl Mdrăk, càr Dăk Lăk dê. Bàr gah gùng là ală bồng bi sơrmañ rơmit gam par mờ càl, săp ntas dròng cing, să đơs crih mpong sùm neh lơh nùs nhơm kòn bơnus sơlơ chờ hờp. Gŏ măt tềng hìu chài rơgơi ƀòn Pa bơh gờñ, ồng Y Li Niê, kwang atbồ ƀòn Hoang yal: “Tŭ do neh chờ bloh, pe ƀòn tơrgùm dùl anih gŏ chờ hờp ngan, sền đơs crih, dròng cing, geh drăp tơrnờm, geh tìp bal oh mi tam jà ñô tơrnờm”.

Pa jơh tamya, lŏ H’ Nhuyn Ksơr, kis tàm ƀòn Năng, xã Cư̆ Prao pà git, ngai do mpồl tamya ƀòn dê chờ hờp ngan tài geh tamya nàng làng bol in sền. Sền gŏ làng bol tus gal ngan, sền ală cau tàm mpồl tamya nền nòn ngan, gơlơh chờ hờp rơlao ngan: “Ngai do bol añ tamya jơnau oh niam bè bơkào Pơlang, kơ̆p kờñ jơnau tamya do geh lơh nàng bol añ in kah tus bơhiàn kòn cau Rơđê dê nàng bơto tai ală rơnàng tơnơ̆ do in tai”.

Jăt ồng Y Linh Niê, Phó Củ tịc Mặt trận Dà lơgar Việt Nam xã Cư̆ Prao yal, ƀòn Pa, ƀòn Năng mờ ƀòn Hoang geh 346 hìu mờ 1 rơbô 440 nă cau. Pe ƀòn do geh 5 jơi bơtiàn kòn cau tàm hìu nhă ală jơi bơtiàn kòn cau Việt Nam ơm kis bal, tàm hơ̆ kòn cau Rơđê geh rơlao 90%. Pah nam, tàm Ngai tam klăc dờng gùt jơi bơtiàn kòn cau, gơnoar atbồ xã bơyai lơh chờ gờm tàm tơl ƀòn, mơya nam do Ủy ƀan xã bơyai lơh pơgồp bal pe ƀòn nàng tơnguh nùs nhơm tam klăc bal ală jơi bơtiàn kòn cau tàm xã. Mờ ai geh bơta niam nàng làng bol in geh tìp bal bơta chài rơgơi: “Ngai 18 nhai 11 pah nam geh bơyai lơh bơnah pơrjum, bơnah lơh chờ tàm ală ƀòn. Pah nam jăt bơhiàn dròng cing mồng hơ̆ sồng ñô tơrnờm, hơ̆ sồng tamya. Làng bol ƀòn lơgar chờ hờp ngan”.

Tus bal Ngai tam klăc dờng gùt jơi bơtiàn kòn cau tàm pe ƀòn xã Cư̆ Prao, kơnhoàl Mdrăk, ồng Y Biêr Niê, Phó Ƀí thư Tỉñ ủy Dăk Lăk pà git, tŭ do tàm uă ƀòn tàm càr Dăk Lăk gam bơyai lơh uă broă lơh chài rơgơi, đơs crih tamya nàng chờ gờm 92 nam Ngai tam klăc dờng gùt jơi bơtiàn kòn cau (18/11/1930 – 18/11/2022). Broă lơh do neh gơs Ngai chờ dờng bơh mpồl bơtiàn ƀòn lơgar dê mờ uă broă lơh, uă bơta niam chài rơgơi ờs mờng bơh ală hìu nhă ală jơi bơtiàn kòn cau Việt Nam dê, pơgồp bal tàm broă lơh uă broă bơ̆t bơtàu nùs nhơm tam klăc gùt jơi bơtiàn kòn cau dê: “Jơnau kờñ bơh ngai chờ là nàng làng bol ngui niam ală bơta chài kòn cau dê mờ tam gơl bal, bơsram bal ală bơta lơi niam bơnĕ. Tàm tơngu me hơ̆ geh pơgồp bal ờ uă gùng dà broă lơh pa nàng lam sồr, bơto bơtê ai làng bol in wă rơlao tai, bơh tŭ hơ̆ làng bol geh tam klăc bal tàm rài kis mpồl bơtiàn pơgồp bal mờ adăt boh lam bơh dà lơgar dê nàng bơ̆t bơtàu ƀòn lơgar ngai sơlơ niam bơnĕ rơlao”.

Tàm ală ngai pa do, ală ƀòn tàm càr Dăk Lăk kung neh bơyai lơh Ngai chờ tam klăc dờng gùt jơi bơtiàn kòn cau, mờ broă tus bal bơh kwang đơng lam kấp ủy, gơnoar atbồ ƀòn lơgar. Geh pơnrơ ngan tàm mpồl sồ 5, xã Ea Bar, kơnhoàl Buôn Đôn pơnyờ să ngan geh wă rò ală ồng Phạm Minh Tấn, Phó Ƀí thư Thường trựk Tỉñ ủy, Y Giang Gry Niê Knơng, Củ tịc Ủy ƀan Mặt trận Dà lơgar Việt Nam càr mờ kwang đơng lam ală sở, gah lơh broă tàm càr, kấp ủy, gơnoar atbồ kơnhoàl. Đơs tàm do, ồng Phạm Minh Tấn, Phó Ƀí thư Thường trựk Tỉñ ủy Dăk Lăk neh dờp mờ pơn jờng ală broă pơgồp bal bơh làng bol ală ƀòn tàm mpồl sồ 05 tàm broă lơh jăt ală broă pơrlòng kờñ gơboh mờ dà lơgar, kung bè ală dơ̆ lam sồr geh kấp ủy, gơnoar atbồ, Mặt trận Dà lơgar bal mờ ală mpồl lơh broă lam sồr tàm tơngai do. Mờ kơ̆p kờñ kấp ủy, gơnoar atbồ, Mặt trận Dà lơgar, ală mpồl lơh broă bal mờ làng bol 05 ƀòn pơn jăt tai ngui niam nùs nhơm tam klăc bal, sơrlèt mờ ală kal ke, bơta lòng nàng tơnguh bơtàu lơh sa, bơ̆t bơtàu ƀòn lơgar tơnguh bơtàu, rài kis làng bol ngai sơlơ hờm ram mờ gơboh gơbài.