Ơ ồng! Là dùl tàm ală kơnhoàl rƀah bơh jơh gùt lơgar dê mơya Dam Rong neh sơrbac mhar ngan bơtàu tơnguh, sơrlèt gan kal ke, ai Lơh sa- mpồl bơtiàn bơh kơnhoàl dê rơhời geh kơ̆ kơl jăp mờ bơtàu tơnguh. Bè hơ̆ cồng nha do geh lơh geh bơh ală bơta gơn kơnờm kwơmàng lơi, ơ ồng?

Ồng Liêng Hót Ha Hai: Kơnhoàl Dam Rong tàm nam 2023 neh lơh geh uă ngan tàm ală gah broă, bè lơh broă lơh sa bơh làng bol dê geh bơta sơlơ ngai sơlơ bơtàu tơnguh, tàm hơ̆ cau jơi bơtiàn dồ êt nă cau bè cau K’Ho, cau M’Nông...geh bơta tam gơl dờng ngan tàm tam gơl rơndăp tăp sèng chi tam, bơtàu tơnguh rlau uă ngan pơndrờm mờ nam 2022. Tài bè hơ̆ den tàng rài kis làng bol dê ngai sơlơ hờm ram, khà hìu jơi bơtiàn dồ êt nă cau gơ ơm tàm hìu rƀah neh gơmù, bơta jơgloh rƀah, bơngơl gơla neh geh tơrmù uă ngan. Kơnờm bơta sền gròi, bơcri priă uă ngan bơh ală kâp Dà lơgar tus ƀòn lơgar neh dong kờl làng bol tàm jơh gùt kơnhoàl đơs bal, làng bol là cau jơi bơtiàn dồ êt nă cau đơs is neh geh bơta tam gơl bè bồ tơngoh kơlôi sơnơng. Làng bol neh gĭt ai sơntìl chi tam phan ròng ngui tàm broă lơh sa, kơnờm bơh hơ̆ mờ lơh geh priă jền lơh sa uă, rài kis lơh sa làng bol dê ngai sơlơ geh bơtàu tơnguh.

Ơ ồng, bulah rài kis lơh sa bal bơh làng bol dê neh geh bơtàu tơnguh rlau uă ngan pơndrờm mờ lài, mơya khà hìu bơnhă rƀah uă gah tŭ do kung gam geh uă ngan sơl, bè hơ̆ nàng broă lơh tơrmù rƀah kơ̆ kơl jăp tàm tơngai tus bơh kơnhoàl Dam Rong dê geh lam lơh geh cồng nha rlau, den kơnhoàl rơ̆p sền gròi uă tàm ală broă lơh lơi taih?

Ồng Liêng Hót Ha Hai: Bulah nam 2023 kung geh bơta bơtàu tơnguh uă ngan mơya sền jăt bơta rƀah uă gah den kòn cau K’Ho, kòn cau M’Nông mờ bàr pe jơi bơtiàn dồ êt nă cau ndai kung uă ngan sơl. Ngan den tàng bè hơ̆, kwang bàng đơng lam bồ kơnhoàl Dam Rong mờ gơnoar ătbồ kâp hơđơm neh gĭt nền tàm tơngai tus rơ̆p tơrgùm sơlơ mblàng yal tai hòi jà tai ală rơnàng làng bol mờ kwơmàng là ală hìu rƀah là cau jơi bơtiàn dồ êt nă cau pal tam gơl bồ tơngoh kơlôi sơnơng tàm broă lơh sa sươn sre, pal lơh ngan uă rlau tai tàm broă lơh sa, sơlơ bơto pơlam bơta chài lơh sa sươn sre. Bơdìh hơ̆ tai, Dam Rong rơ̆p tơrgùm jơh ală priă jền dong kờl bơh Dà lơgar, bơh càr Lâm Đồng nàng dong kờl làng bol là hìu rƀah bè priă, sơntìl chi tam, phan ròng, dong kờl pờ ơdŭ bơto broă lơh ai ală ơruh pơnu jơi bơtiàn dồ êt nă cau in nàng geh broă lơh mờ lơh geh tai priă jền, bơh hơ̆ rơ̆p bal mờ kơnhoàl chồl tơnguh bơta bơtàu tơnguh lơh sa- mpồl bơtiàn tàm tơngai tus.

Ơ ồng, Dam Rong là kơnhòal geh uă ngan làng bol ơm kis là cau jơi bơtiàn dồ êt nă cau bal mờ tơrgùm bơtàu tơnguh lơh sa- mpồl bơtiàn, den broă prăp gàr, ngui niam bơta kwơ niam chài krơi is bơh yau pơgồp bal mờ bơtàu tơnguh lòt nhơl mpồl bơtiàn là kwơmàng ngan. Broă do, den kơnhoàl neh geh ală jơnau rơcăng lơh mờ gùng broă lơh nền bè lơh, ơ ồng?

Ồng Liêng Hót Ha Hai: Bal mờ broă bơtàu tơnguh lơh sa den kơnhoàl kung sền gròi tus bơtàu tơnguh lơh sa gơ jăt bal mờ prăp gàr mờ ngui niam bơta kwơ niam chài krơi is bơh yau jơi bơtiàn dê, sền gàr adat bơhiàn ờs mờng bơh yau bơh cau jơi bơtiàn dồ êt nă cau dê. Kơnhoàl Dam Rong neh bơcri priă rlau 10 tơmàn đong lơh hìu ràng tơlik ơn pơdơng cing yăng drăp, ală phan ngui tàm rài kis lơh broă sa, tàm rài kis pah ngai, tàm broă tam bau gơrềng tus ală dơ̆ lơh chờ bơh cau kòn cau dê. Kơnhoàl kung gam rơcăng lơh wơl dơ̆ lơh chờ Ñô dờng tàm xà Dà Long. Ală adat bơhiàn bơh yau ờ gam dipal tai den hòi jà làng bol rơhời săng tĕ. Jơnau kờñ bơh bơta bơcri priă dê tàm gah broă niam chài là nàng kờñ gơhòi gơ jà năc lòt nhơl tus mờ kơnhoàl, lơh geh broă lơh broă sa ai làng bol tàm tiah do in bơh broă lơh lòt nhơl gơ jăt bal mờ ngui niam bơta kwơ niam chài bơh jơi bơtiàn he dê. Bơh hơ̆ rơ̆p tơnguh uă priă lơh geh, rài kis làng bol dê ngai sơlơ bơtàu tơnguh, mờ bơta kwơ niam chài ờs mờng krơi is bơh kòn cau tàm tiah do dê ngai sơlơ geh ngui dồ bă cồng nha jŏ jòng tàm tơngai tus.

Ơi, dan ưn ngài ồng uă ngan!