Oh Kpuih Trí, 10 sơnam ơm tàm ƀòn Nú kòn đời mè bơh tàm tŭ dềt. Oh kis bal mờ mò  đah mè neh kra ờ pran mờ rƀah ngan. Rài tơnơ̆ do bơh Trí dê ờ gĭt bè lơi sơl dilah ờ geh bơta dong kờl bơh ală kwang bàng, cau ling pôs đồng ling sền gàr tiah nhàr lơgar Ia Nan, Mpồl ling sền gàr tiah nhàr lơgar càr Gia Lai dê. Oh Kpuih Trí, đơs: “Kòn gơ lơh chờ hờp ngan mờ chờ ngan geh ală wa dờp ròng siam. Bàr pe nă wa bơto bơtê kòn in bơsram sră, bơto kòn in sào sa, guh bĭc, rài kis pah ngai pal niam ngan, sàng goh ngan ờ gŏ di ơm bơ̆”.

Oh Kpuih Trí mìng là dùl tàm uă kơnòm bơsram bơh Hìu bơsram kấp 1 Kơ Pă Kơ Lơng geh rài kis kal ke uă ngan, geh pôs đồng ling sền gàr tiah nhàr lơgar Ia Nan dờp dong kờl. Oh geh ală wa rò rê, ală wa rò rê tus tàm pôs đồng tiah ròng siam, dong kờl, oh geh pôs đồng dong kờl bơnah priă 500 rơbô đong pah nhai nàng pơn jat tai dong kờl ai broă bơsram oh dê. Thiếu tá Rơ Lan Thức, Cíñ trị viên phó Pôs đồng ling sền gàr tiah nhàr lơgar Ia Nan, pà gĭt: “Mpồl ling neh rcang, dong kờl tơn làng bol. Ngan là lam lơh broă lơh kòn ròng pôs đồng ling sền gàr tiah nhàr lơgar, broă lơh tam biăp lòt bal mờ kơnòm bơsram ơm bơsram sa klo ngai, yăng phe bơta nđàc. Kwang bàng, cau ling kung gĭt wă, tơnguh uă kơnòl lơh jat kơnòl broă, ờ rngòt kal ke, bòl glar, jơh nùs lơh ngan lơh jat kơnòl broă geh jàu”.

Hìu bơsram kấp 1 Kơ Pă Kơ Lơng geh 371 nă kơnòm bơsram bơh ơdŭ 1 tus ơdŭ 05, 100% là kơnòm bơsram kòn cau Jrai. Tàm ù tiah do, khà hìu bơnhă rƀah uă ngan, tàm tŭ bơta gĭt wă mờ jơnau kờñ bơsram bơh dùl bơnah làng bol jơi bơtiàn dồ ết nă cau dê gam ờ uă. Rài kis kal ke gơrềng tus broă bơsram sră bơh oh kòn làng bol kòn cau dê. Ùr pơgru Trần Thị Nhung, Kwang atbồ Hìu bơsram đơs: ală nam pa do, hìu bơsram bơsong tơl ală bơta nàng tơnguh uă bơta niam bơto bơtê mờ bơsram. Tài bơh uă hìu bơnhă lơh mìr ờ geh priă jền nàng ai oh kòn in lòt bơsram den uă ngan ală kơnòm bơsram pal lòt jơng tus tàm ơdŭ bơsram. Nàng ƀuơn ngan ai broă bơsram sră bơh ală kơnòm in, hìu bơsram neh ai kơnòm bơsram khôí 1, mờ khối 2 in ơm tàm ală hìu bơsram rềp hìu. Ai ală kơnòm bơsram dờng rlau bơsram tàm hìu bơsram tờm. Uă kơnòm bơsram hìu bơnhă ơm ngài, ală cau pơgru bal mờ ală mpồl ling hòi jà làng bol bơh Pôs đồng ling sền gàr tiah nhàr lơgar Ia Nan lòt tus tơl nơm hìu nàng rò kơnòm bơsram lòt bơsram. Ùr pơgru Trần Thị Nhung gam pà gĭt tai, bơdìh mờ sơlơ tơnguh tơngai bơsram tờm bơto môn Tiếng Việt, pah poh, hìu bơsram bơyai lơh 2 dơ̆ bơsram tai ờ ai priă. Jơh ală kơnòm bơsram ndrờm ià kong tàp, phan ngui bơsram sră nàng pơn jờng ală kơnòm kờñ gơboh hìu bơsram, kờñ mờ ơdŭ bơsram, geh bơta gơn kơnờm tus hìu bơsram pah ngai. Ùr pơgru Trần Thị Nhung, đơs: “Dong kờl bè rơndeh rơndồ, sră giáo khoa, sră cih, phan ngui bơsram, zep cù nàng ală kơnòm bơsram in lòt bơsram. Bồ nam pal rcang sră cih, sră giáo khoa, phan ngui bơsram sră. Kờp dŭ he geh 370 nă kơnòm bơsram den he pal ơn prăp kàr hơ̆ sră giáo khoa, sră cih nàng bol añ in ai ală kơnòm bơsram in yòng là bơsram mơ lơm”.

Tàm ù tiah xã Ia Nan, kơnhoàl Đức Cơ, càr Gia Lai tàm 7 mờ 8 nam do pa do, 100% kơnòm bơsram tàm sơnam lòt bơsram geh lòt bơsram. Bơta pơnđơl pràn lơh ngan bơh hìu bơsram bal mờ ală kấp gơnoar atbồ, ală mpồl cau, mpồl ling sền gàr tiah nhàr lơgar neh pơgồp bơnah dong kờl ală phan nàng lòt bơsram bơh kơnòm bơsram rƀah tiah kơh bơnơm in tơrmù ƀà bơta bòl glar kal ke.