Mò Đinh Thị Ngoại- Kwang atbồ Mpồl cau ùr ƀòn Lơk, xã Nghĩa An, kơnhoàl K’Bang pà gĭt, lơh jat srơh sơm bat tê bal bơt bơtàu ƀòn lơgar pa, 5 nam do, làng bol tàm ƀòn pơgồp gĭt nđờ rơhiang ngai lơh broă mờ rlau 1 tơmàn đong, tă sờr is pơng gàr nàng pờ ơnàng gơl gùng lòt tàm thôn, lơh pa 4 gơl gùng lòt tàm ƀlàng sre. 5 hìu bơnhă rƀah geh dong kờl tơn jơh hìu ơm sèt mìu nhăt. Nam 2022, priă lơh geh kờp bal geh 41 tơlak đong dùl nă cau, ală hìu bơnhă rƀah gơmù uă, tàm ƀòn ờ gam geh hìu ơm ing tai.

Mò Đinh Thị Ngoại pà gĭt: “Tàm srơh bơt bơtàu ƀòn lơgar pa, làng bol tàm ƀòn Lơk neh lơh ngan tus bal, lơh jat srơh, tam klăc bal mờ gơ̆p, lơh gùng lòt mờ bê tông, gùng lòt tàm ƀòn lơgar. Tơnơ̆ tŭ gĭt ngui bơta chài măy mok pa tàm broă lơh sa den priă lơh geh neh gơguh uă rlau, ƀòn lơgar sàng goh niam, lơh sa bơtàu tơnguh rlau pơndrờm mờ lài do”.

Ƀòn Lơk là 1 tàm 206 thôn, ƀòn làng bol kòn cau dùl ết nă cau tàm càr Gia Lai dê neh tam gơl tơl bơta tŭ lam lơh jat Cỉ thị sồ 12 bơh Ƀan Thường vụ Tỉñ ủy càr Gia Lai dê bè sơlơ tơnguh bơta đơng lam bơh ală kấp ủy bè bơt bơtàu ƀòn lơgar pa tàm tiah làng bol kòn cau dùl ết nă cau dê. Jat hơ̆, mờ priă bơh kes priă dà lơgar mờ mpồl bơtiàn tă pơgồp bal mờr 1 rơbô 500 tơmàn đong, bal mờ bơta tă pơgồp rlau 96 rơbô 500 ngai lơh broă, mờ làng bol pà is rlau 400 rơbô thơk vuông ù. Tơnơ̆ 5 nam, tŭ do jơh gùt càr geh 110 thôn, ƀòn làng bol kòn cau dùl ết nă cau lơh geh jơnau kờñ ƀòn lơgar pa, rài kis làng bol dê ngai sơlơ bơtàu tơnguh.

Nàng pơn jat tai lơh jat niam geh cồng nha ală priă jền mpồl bơtiàn nàng dong làng bol tơrmù rƀah kơ̆ kơljap, tàm pơrjum tơn jơh 5 nam lơh jat Cỉ thị sồ 12, ồng Hồ Văn Niên- Ƀí thư Tỉñ ủy càr Gia Lai sồr: “Ală anih lơh broă cíñ trị pal mut lơh bal kràñ cê jơh nùs, dùl ròt bal, geh cồng nha, sùm sùm, pơn jat sùm mờ geh ngan; hòi jà tă pơgồp mờ ngui geh cồng nha, tàm bơrlŭ bal ală priă jền bơh ală broă lơh, rơndap broă lơh; dong làng bol gĭt ală priă càn dong kờl. Ală sở, ƀan, ngàñ bơh càr dê di tŭ gĭt loh bơta kal ke, kòl yan nàng bơto pơlam halà di tŭ dan mờ kấp geh gơnap gơnoar in sền sơ wì mờ bơsong. Jơh nùs lơh ngan, lơh jat kràñ cê jơh nùs rlau tai, nàng lơh geh cồng nha bơh Cỉ thị sồ 12 dê ngan ngồn tus mờ làng bol”.