Lòt tàm gùng bê tông jòng mờr 1 kơi sồ, ơnàng 4 thơk, tàm tơrbŏ bơh ƀòn Myah tus tiah lơh broă sa, ồng Ksor Jinh (deh nam 1950, ơm tàm xã Ia Krai, kơnhoàl Ia Grai) pà gĭt, mìng pơgap mờ do 1 nam, do là gùng ù dềt, ơnàng mìng 2 thơk lơm, kơmbuh bơ̆ tàm ngai trồ tơngai, lòt ntiar lơh uă cau đì rơndeh gơ pừ tŭ pơndiang phan lơh geh bơh suơn sre tàm kàl mìu.

Tŭ geh gơnoar atbồ xã yal bè broă dà lơgar dong kờl làng bol lơh gùng bê tông, ồng Ksor Jinh neh lam lài pà is 100 thơk vuông ù, uă làng bol tàm ƀòn pin dờn, pà is gĭt nđờ rơhiang thơk vuông ù nàng pờ ơnàng mờ lơh sir gùng lòt. Ồng Ksor Jinh, đơs:“Lài do gùng lòt rê kal ke ngan, oh kòn lòt bơsram glar ngan, cau dờng ală dơ̆ lòt drà blơi phe àñ rê gùng lòt lơmbè ntiar là lòt rê kal ke ngan. Tơnơ̆ dơ̆ tìp mat mờ cau tĕ khà, xã kung lòt tus tàm tiah do nàng sền mờ bơh dơ̆ lòt sền geh ngan, xã kung neh geh rơndăp broă lơh lơh gùng, tơnơ̆ hơ̆ hòi jà làng bol pà is ù, kơl ƀà tờm kơphê, điều nàng pờ ơnàng gùng lòt, bol añ kung chờ hờp lơh jăt. Ai tus tŭ do gùng lòt neh geh pờ ơnàng, sền oh kòn lòt bơsram kung iang nùs mờ ƀuơn ngan ai làng bol lơh broă sa in jun pơndiang phan lơh geh bơh lơh sa suơn sre, bơta do lơh ai tơl nă cau in chờ hờp ngan”.

 Ai tàm ƀòn Nú, xã Ia Khai, kơnhoàl Ia Grai, kung bơh srơh pà is ù lơh gùng, mờ bồ nam 2023, gùng lòt bê tông jòng 800 thơk, ơnàng 4 thơk neh di tŭ lơh sir lài mờ tơngai tơnhào điều. Ồng Rơ Châm H'Monh, cau geh bơngă pin dờn ƀòn Nú pà gĭt, tŭ gơnoar atbồ ală tiah hòi jà làng bol pà is ù, pờ ơnàng gùng lòt, uă hìu bơnhă ờ bài dờp tài bơh pà is ù den pal kơl sang gĭt nđờ rơhiang tờm điều gam tơnhào plai pah nam. Ồng H'Monh lam lài lơh krơh, kơl 19 tờm chi bơh hìu bơnhă dê, den hơ̆ sồng hòi jà oh mi, oh kòn kòn sau tàm jơi nòi lơh jăt bal. Bơh hơ̆, bal mờ bơta hòi jà jơh nùs bơh mpồl hòi jà làng bol thôn dê, 20 hìu bơnhă làng bol neh kơl 300 tờm điều jat 2 gah nàng gùng lòt dờng ơnàng geh lơh sir. Ồng H'Monh pà gĭt:“Bơh ngai bơt bơtàu ƀòn lơgar pa, tàm ƀòn geh uă ngan tam gơl pa, geh dà lơgar sền gròi, dong kờl bơt bơtàu pờ ơnàng gùng lòt rê. Tŭ do, uă gùng lòt tàm thôn, ƀòn geh lơh bê tông. Mìng is hìu bơnhă añ kung neh ai is dùl bơnah ù mờ neh kơl sang gĭt nđờ jơ̆t phan tam nàng pờ ơnàng gùng lòt. Ai ală hìu bơnhă ndai dilah gơnoar atbồ sồr pà is ù, kơl sang tờm chi den làng bol kung ndrờm lơh jăt is sơl, tài bơh làng bol wă là dà lơgar kung kờñ ai geh ală bơta nàng làng bol in geh gùng lòt rê sàng goh. Añ chờ hờp mờ ưn ngài ngan bơta sền gròi bơh gơnoar atbồ dê”.

 Nàng kờñ lơh jăt ală broă lơh jơnau kờñ dà lơgar bè bơt bơtàu ƀòn lơgar pa mờ bơtàu tơnguh lơh sa- mpồl bơtiàn tiah jơi bơtiàn dùl ết nă cau, uă nam do, kấp ủy, gơnoar atbồ kơnhoàl Ia Grai, càr Gia Lai neh hòi jà bơta mut lơh broă bal bơh jơh ală anih lơh broă cíñ trị, làng bol mờ mpồl lơh sa kă bro. Tàm hơ̆, jơnau kờñ tờm bơh kơnhoàl dê là ai lài tiah jơi bơtiàn dùl ết nă cau, tiah kal ke; ai lài bơtàu tơnguh phan bơna gùng lòt, lơh bơnàng jă nàng bơtàu tơnguh lơh sa, mpồl bơtiàn. Bơh hơ̆, srơh pà is ù lơh gùng, nàng lơh ală broă lơh, geh làng bol dùl nùs bal, lơh jăt. Mìng is bơh nam 2020 tus tŭ do, jơh gùt kơnhoàl kờp dŭ lài neh hòi jà gĭt nđờ jơ̆t hìu bơnhă làng bol, pà is ù kờp jơh rlau 20 rơbô thơk vuông ù. Tàm khà hơ̆, ală xã geh uă làng bol jơi bơtiàn dùl ết nă cau bè: Ia Krai, Ia Khai, Ia Yok, Ia O,... là ală tiah geh uă broă lơh niam mờ geh cồng nha. Jăt hơ̆, kwang bàng, đảng viên, cau geh bơngă pin dờn, kra ƀòn pơn rơ sùm là mpồl lam lài tàm srơh hòi jà, bơh hơ̆ lơh geh bơta dùl nùs bal, pin dờn bal mờ lơh jăt bơh làng bol dê.

Mò Nguyễn Mai Lương- Củ tịc Ủy ƀan Ñân zân xã Ia Khai, kơnhoàl Ia Grai pà gĭt:“Xã neh pơrjum kung jà kra ƀòn, Ƀí thư Ci ƀộ mờ ngan là cau geh bơngă pin dờn tàm ù tiah do dê. Tàm tŭ lơh jăt, gùng dà broă lơh là mìu jŏ sù uă, ngai do khi ờ hềt wă den ngai hìng bol añ lòt tai, ngai do sồr kwang bàng do lòt pơndờm pơnđiang den ngai hìng sồr tai kwang bàng ndai lòt. Dilah hìu bơnhă hơ̆ geh cau tàm Mpồl Cau lơh broă sa den bol añ jà Mpồl Cau lơh broă sa, cau tàm mpồl cau ùr den añ sồr kwang atbồ mpồl cau ùr, mblàng yal loh làng ai làng bol in wă”.

Phan bơna gùng lòt ngai sơlơ dờng niam neh dong broă lòt rê kă bro phan đah ală thôn, ƀòn tiah sar lơgar ngài, tiah jơi bơtiàn dùl ết nă cau ƀuơn ƀoài rlau, là bơnàng jă nàng đảng ƀộ, gơnoar atbồ mờ làng bol tiah nhàr lơgar Ia Grai in pơnđơl pràn lơh ngan bơt bơtàu rài kis ngai sơlơ hờm ram, niam bơnĕ...