Nam do là nam sơnrờp ngan, broă lơh rơbòng dà ai dà bơh bơtơ̆t dơng dà Ia Mơr neh lơh gơs, lam dà tus tàm ală ƀlàng sre làng bol kis tàm ƀòn Klah, xã Ia Mơr. Do kung là nam sơnrờp, làng bol kòn cau Jarai kis tàm xã Ia Mơr lơh sre tàm bă ù lài do gơtùi tùc kòi mìr. Ồng Siu Thọ, Kwang atbồ ƀòn pà git, tàm kàl sơnrờp ngan lơh sa, làng bol gam uă bơta ờ hềt git, mơya cồng nha kung geh 4 tấn tàm 1 lồ, uă rơlao 4 dơ̆ mờ lơh kòi mìr. Cồng nha do neh dong kờl ală hìu làng bol tàm ƀòn cham nùs mŭt lơh sa kàl prang: (B)

“Lài do lơh dùl kàl kòi, tơnhào pah nam mìng geh bơh 1 tus 2 tạ kòi mơ, tŭ do geh lơh bàr kàl pah nam, tơnhào geh bơh 7 tus 8 tấn tàm 1 lồ. làng bol tŭ do gam ngui sơntìl kòi pa geh cồng nha uă, làng bol chờ hờp ngan. Ưn ngài Đảng, Dà lơgar neh dong kờl làng bol”.

Bal mờ broă lơh bơtơ̆t rơbòng dà dờng ngui geh cồng nha, drà kă bro kung brồ guh wơl loh làng rơlao, dong kờl ală mpồl lơh sa kă bro lơh sa geh cồng nha, ai tai geh broă lơh mờ kơ̆ kơl jăp broă geh ai cau lơh broă tàm ƀòn in. Bi Rơ Lan Bên, deh nam 1995, kis tàm ƀòn Khôi, xã Ia Mơr chờ hờp pà git, nam do khà priă nhai bơh 2 nă ùr bơklao kơ̆ kơl jăp tàm khà bơh 13 tus 15 tơlăk đong tàm 1 nhai. Bơdìh hơ̆ tai, hìu nhă gam geh 2 sào ù tam kơphe, 6 sào sre lơh kòi mờ ròng 2, 3 kơnrồ, den tàng kung tơl ngui tơl sa: (B)

“Bơh ngai mŭt lơh kông ñân tàm Kông ty kao su, cau jào bol añ còr bơsơ̆t kao su tàm 3 nam, tơnơ̆ mờ 3 nam añ ai priă hơ̆ lơh hìu jơh 200 tơlăk đong. Nam tơnơ̆ tai là añ blơi rơndeh pa 57 tơlăk đong, rơndeh Sonic, hơ̆ sồng tă tai priă ai oh kòn in lòt bơsram. Tàm hìu blơi tơl phan ngui, tŭ do hìu nhă neh tơl ngui tơl sa. Lài do hìu nhă añ kal ke ngan, tŭ do ờ pal gơtìp jơgloh, glar bòl tai”.

Ia Mơr là xã tiah nhàr dà lơgar geh uă bơhiàn ờs mờng kăc màng, gam geh broă bơ̆t bơtàu ală bơta phan bơna gơs niam mờ dờp geh uă bơta niam tơnguh bơtàu pa. Ồng Nguyễn Tuấn Anh, Phó Củ tịc UɃÑZ xã pà git, broă lơh ồs đèng neh geh lơh tàm gùt ƀòn; ală broă lơh bè hìu pơrjum ƀòn, hìu bơsram, hìu sơnơm kung neh geh lơh niam wơl mờ lơh pa ndrờm bal. kwơ màng, broă lơh gùng lòt tus tàm ală ƀòn, ală bă sre tus mờ gùng lòt tus mờ ală tiah ndai ndrờm neh mờ mờr geh lơh gơs, dong kờl Ia Mơr tơrbŏ bal broă kă bro phan mờ tiah ndai geh ƀuơn. Ồng Nguyễn Tuấn Anh đơs: (B)

“Broă lơh gùng lòt tŭ do kung neh di pal, rơcang lơh gơs gùng 665 mờ rơbòng dà tus tàm ală ƀlàng sre. Do là ală broă kwơ màng nàng làng bol in ƀuơn tàm broă pơn diang phan, lơh pràn broă lơh sa tàm xã Ia Mơr tơnguh bơtàu”.

Bŭ lah rài kis bơh Làng bol tàm xã tiah nhàr dà lơgar Ia Mơr, kơnhoàl Chư Prông gam uă kal ke, mơya bal mờ broă sền gròi mờ bơcri priă bơh ală kấp gơnoar atbồ dê, làng bol ală kòn cau kis tàm do gam ngai sơlơ geh uă bơta ƀuơn rơlao, ai geh bơta niam nàng làng bol lơh ngan sơrlèt mờ kal ke bơ̆t bơtàu rài kis hờm ram, tơnguh bơtàu; pơgồp bal tàm broă gàr kơ̆ kơl jăp bơta ring lơngai tàm tiah nhàr dà lơgar hờ đah măt tơngai mŭt Dà lơgar dê.