Mang tus, dùl mpồl dong kờl is tàm càr Gia Lai ờ ru ngan mờ broă lơh tơm bồl wơl gùng lòt. Bi Lê Tuấn Thành, kwang atbồ mpồl dong kờl is yal, lài tơm bồl gùng ală tiah gùng ờ niam, mpồl neh lòt sền mờ dan gơnoar bơh gơnoar atbồ dê, hòi jà tă pơgồp bal priă jền lơh niam wơl. Broă lơh niam wơl gùng lòt lơh tàm trồ mang nàng pleh mờ broă lơh kơryan gùng lòt. Bi Lê Tuấn Thành, đơs:“Lơh dùl bơta lơi hơ̆ geh kwơ ai mpồl bơtiàn in nàng lơh gơrề uă ală bơta kwơ tus mờ tơl nă cau, is ồn là cau kơnòm să. Lơh mờ lam lơh “Gơl gùng lòt lơngăp lơngai” là tơm bồl tiah gơbàn rŭ rơlùn, gơl gùng tàm sơnah ƀòn gơtìp ờ niam nàng dong kờl làng bol in lòt rê niam rlau tai”.

Tŭ mpồl geh nùs nhơm niam dong kờl is sơm bat bal tê mut lơh broă, làng bol neh jơh nùs dong kờl mờ broă dŭi gùng che ồs đèng sòl àng, ƀồm dà drơng broă tàm bơrlŭ sơmang, mờ pà dà hùc, phan sa ai ală ơruh pơnu in tàm tŭ ơm rlô. Ồng Nguyễn Văn Thuyết, kwang atbồ tổ zân phố 10, sơnah ƀòn Ia Kring, đơs:“Làng bol tàm tiah do gùng lòt geh uă tiah gơbàn rơlŭ rơlùn, lòt rê kal ke ngan, ngai do ơruh pơnu dong kờl is tus nàng dong kờl làng bol tơm bồl wơl ală tiah rơlŭ rơlùn, làng bol brờn brài ngan. Kơ̆p kờñ ơruh pơnu pơn jat tai dong kờl ai làng bol in lòt rê gàr niam lơngap lơngai gùng lòt uă rlau tai”.

Ờ mìng lơh niam wơl gùng lòt tàm Pleiku lơm, mpồl dong kờl is gam lơh tàm uă gơl gùng tàm ală kơnhoàl bơh càr Gia Lai dê tai. Chờ hờp ngan tài bơh gùng lòt geh lơh wơl ring niam, bi Trần Trọng Trung, làng bol xã Ia Yok, kơnhoàl Ia Grai, pà gĭt:“Gùng lòt ờ niam uă ngan, lòt rê kal ke ngan, kung geh dơ̆ neh geh cau gơ pừ tàm rơbòng dà. Mpồl dong kờl is tus lơh niam wơl gùng lơh làng bol in brờn brài ngan, mờ bol hi kung lik drơng broă bal mờ oh mi sơl”.

Broă lơh “Gơl gùng lòt lơngăp lơngai” geh lam lơh bơh nhai 09 nam 2023, tus tŭ do neh lơh geh 19 dơ̆ tơm bồl mờ gùng lòt ƀòn lơgar mờ kờp jơh bơta jòng 30 kơi sồ tàm ală kơnhoàl Ia Grai, Đăk Đoa mờ ƀòn dờng Pleiku, càr Gia Lai dê. Broă lơh neh gơ hòi gơ jà gĭt nđờ rơhiang nă cau dong kờl is tus bal. Mò Lê Kiều Thị Minh Thư (ơm tàm xã Tân Sơn, ƀòn dờng Pleiku)- cau tàm mpồl dong kờl is, đơs:“Bol añ bal mờ kòn klau bơh añ dê tus bal lơh “Gơl gùng lòt lơngăp lơngai” dong lơh niam ală gùng lòt nàng tơl nă cau lòt rê ƀuơn ƀoài rlau, dong lơh gơrề uă ală broă lơh niam bơnĕ mờ mpồl bơtiàn, mờ nùs nhơm tă pơgồp dà kơl hề mờ drơng broă”.

 Bulah geh tŭ broă lơh tơm bồl wơl gùng lòt lơh sir tus tàm àng drim gờñ ngai tơnơ̆, ală cau tus bal is ndrờm gơ lơh chờ hờp mờ brờn brài ngan. Broă lơh “Gơl gùng lòt lơngăp lơngai” ờ mìng pơgồp bơnah lơh niam ală gùng lòt ƀòn lơgar, gàr niam lơngăp lơngai gùng lòt lơm mờ gam lơh gơ kờñ rài kis niam, pơgồp bơnah bơt bơtàu dùl mpồl bơtiàn tam klăc bal.