Hìu bơnhă ồng Hà Văn Tân, ơm tàm thôn 11, xã Ya Tờ Mốt là dùl tàm ală hìu bơnhă lơh kòi geh cồng nha ngan sơntìl kòi Briêt lơh geh jơnau kờñ hữu kơ sơnrờp bơh kơnhoàl Ea Súp dê. Ồng Tân pà gĭt: lơh kòi hữu kơ kal ke rlau mờ lơh sơntìl kòi bè ờs, phơng sih, sơnơm sền gàr phan tam ndrờm ngui mờ siñ họk lơm. Tam pơgơl là pràn kơl dang să jan niam tài bơh ờ gŏ ngui mờ ală dà sơnơm ờ. Priă tă ngui bơh chờm gơmù tus 40%, mơya tăc bro ƀuơn ngan mờ giă tăc jơnhoa rlau 1 dơ̆ nggùl pơndrờm mờ giă kòi bè ờs. Ồng Hà Văn Tân, đơs:“Bơh broă lơh lơh bal mờ Hợp ták xã tơrmù rƀah Ea Súp lơh geh ală bơta ai hìu bơnhă añ dê lơh kòi hữu kơ Briêt, dơ̆ 1 là sền gàr tiah ơm kis, dơ̆ 2 là sền gàr pràn kơl dang să jan mờ dơ̆ 3 là cèng wơl priă jền ai hìu bơnhă in. Tus tŭ do, bol añ neh lơh bơh dềt tus dờng. Tus ndo bol añ pơndờm pơnđiang ală hìu bơnhă nàng lơh uă rlau tai”.

Briêt là bơta kòi phe bơkah bơh Tây Nguyên dê, gam geh sơnđan là phe lứt jù Briêt. Bơta phe do, geh uă bơta pràn ai să jan in, geh uă săt, xơ, vitamin mờ ală bơta lơh ờ niam ơxy hoá den ngai sơlơ geh cau ngui sa kờñ ngan. Ồng Nguyễn Việt Đức, Kwang atbồ Hợp ták xã Tơrmù rƀah Ea Súp, kơnhoàl Ea Súp, càr Dăk Lăk pà gĭt: ai bơta mờng chài lơh broă bơh uă kàl lơh kòi lài do dê, Hợp ták xã pơn jat tai pơgồp bal mờ làng bol, sac rơwah tiah tam gơ dờp nàng sih tam sơntìl kòi Briêt. Tàm hơ̆, bơta bè dà, ù tiah, nhơm trồ tiah sàng goh geh ai lơh lam lài. Nam lài, Hợp ták xã neh lơh geh cồng nha broă lơh tam kòi Briêt jat broă lơh hữu kơ lơh geh jơnau kờñ JAS, lơgar Nhờk dê, lơh pơgap 3 lồ mờ phan bơna phe Briêt lơh geh jơnau kờñ phan bơna OCOP 3 sơmañ kấp càr dê. Jat ồng Nguyễn Việt Đức, Kwang atbồ Hợp ták xã Tơrmù rƀah Ea Súp, tàm tơngai tus, Hợp ták xã rơ̆p pơn jat tai lơh bal mờ làng bol nàng tơnguh bă ù lơh kòi hữu kơ, hời rơ hời tam gơl bồ tơngoh kơlôi sơnơng, broă lơh bơh làng bol dê, pơgồp bơnah yờ tơnguh uă bơta bơkah niam mờ bơta kwơ kòi, phe tiah do dê. Ồng Nguyễn Việt Đức, đơs:“Dơ̆ 1 là bol añ tơrgùm tàm ală phan bơna neh lơh geh sră jàu hữu kơ neh geh mat kă bro. Dơ̆ 2, bol añ rề ơnàng tai bă tiah lơh kòi jat jơnau kờñ Global GAP nàng rề ơnàng bă tiah tam nàng uă cau lơh broă sa in geh dờp bơta kwơ rlau tai”.

Jat ồng Nguyễn Bá Bân, Kwang atbồ Phòng Nông nghiệp mờ Phát triển Nông thôn kơnhoàl Ea Súp yal, bulah bă tiah lơh kòi ờ hềt uă mơya phan bơna phe Briêt geh sră jàu hữu kơ là cơng tàng ai bơta tam gơl tàm broă kơlôi sơng lơh sa bơh cau lơh broă sa tàm tiah nhàr lơgar Ea Súp dê, đơs ờ mờ dà sơnơm, lơh gơlik phan bơna ngui sa sàng goh. Mơkung pà gŏ, broă tam gơl rơndăp tăp sèng lơh sa suơn sre jat gùng dà hữu kơ bơh càr Dăk Lăk dê gam là gùng lòt di ngan, cèng wơl bơta priă jền lơh sa uă pơgồp bơnah lơh tam gơl rài kis làng bol tàm tiah nhàr lơgar dê. Ồng Nguyễn Bá Bân, đơs: “Broă Hợp ták xã Tơrmù rƀah Ea Súp neh geh dờp sră dờp lơh sa hữu kơ, hơ̆ là broă lơh bơh sơnrờp bơh broă lơh wèt tus tam kòi hữu kơ dê. Tàm tơngai tus, rơ̆p geh uă mpồl cau, cau dùl nă să dong kờl ală hợp ták xã, mpồl lơh sa kă bro lơh geh jơnau kờñ hữu kơ ngai sơlơ uă rlau tai nàng cèng wơl phan bơna lơh geh jơnau kờñ bơh phan bơna dê”.