Ờ gam pal hòi điện thoại ai tơl nă cau in tai, hala tus tơn tàm hìu đảng viên nàng yal tơngai pơrjum Ci ƀộ kung bè ală broă lơh kờñ lam lơh, tŭ do, mìng mờ tàm mpồl Zalo, ồng Lò Văn Oai, Ƀí thư Ci ƀộ mơkung là kwang atbồ ƀòn Mạt, xã Mường Lèo, kơnhoàl Sốp Cộp, càr Sơn La, neh gơtùi ƀuơn ngan tơrgùm đảng viên. Ồng Lò Văn Oai, đơs:“Ờ hềt geh bơto bơtê bè kông nghệ thông tin, mơya bol añ kung pơnđơl pràn lơh ngan blơi 1 nơm măi tíñ, 1 nơm măi in nàng bơsram rơ hời. Ci ƀộ bol añ neh lơh mờ tơrgùm geh 31 nă cau tàm mpồl Zalo, ờ kờp đảng viên sơnam neh kra rơ̆p yal jat broă lơh krơi is. Geh mpồl Zalo bơh Ci ƀộ tŭ do, yal di tŭ ai đảng viên mờ bàr pe broă lơh ndai kung ƀuơn ngan sơl”.

Nùs nhơm pơrjum bơh Ci ƀộ ƀòn Mạt dê kung ngai sơlơ tam gơl bơh tŭ cau lam bồ kấp ủy gĭt ngui kông nghệ. Ală tơngume đơng lam, sồr lơh tàm broă bơt bơtàu ƀòn lơgar pa, tam gơl rơndăp tăp sèng phan tam, phan ròng lài do kal ke ngan bè broă lơh, den tŭ do mờ bơta gĭt wă uă ngan, bơta chài bơh tàm internet lơm.

Ƀòn Mạt, xã Mường Lèo lài do kal ke uă ngan, tŭ do làng bol gĭt đòm jat măi mok pa tàm broă tam phan, lơh rlau 50 lồ kòi, 25 lồ bùm blàng, 25 lồ tờm chi sa plai; ròng  mờr 4 rơbô nơm phan poan jơng, iar, ada; tơlik mat geh 2 Hợp ták xã lơh sa suơn sre... khà hìu bơnhă rƀah, hìu bơnhă ndrờm bè rƀah bơh ƀòn dê kơnờm bơh hơ̆ gơmù uă ngan, tus tŭ do mìng gam 6% lơm. Bi Lường Thu Hương, đảng viên Ci ƀộ ƀòn Mạt, đơs:“Añ neh ngui bơta chài, lùp bơsram tai tàm internet broă ròng rơpu, kơnrồ, tam phan nàng tơnguh cồng nha tơnhào, tơnguh priă lơh geh. Là đảng viên añ kung lơh jat niam gơnoar broă, mblàng yal ai làng bol in broă ròng phan geh cồng nha uă”.

Ală jơnau niam, broă lơh geh cồng nha nàng bơtàu tơnguh lơh sa, bơt bơtàu ƀòn lơgar pa bơh uă tiah, uă jơi bơtiàn dê... geh Ƀí thư Ci ƀộ, mpồl kấp ủy bal mờ ală đảng viên ƀòn dê jơh nùs ngan tàm pà bal tàm pang is he dê, ală mpồl mờ mpồl. Ồng Giàng A Dệnh, Ƀí thư Ci ƀộ mơkung là Kwang atbồ ƀòn Sam Quảng, đơs:“Sền tàm internet kung geh uă jơnau niam bè đảng viên lơh krơh niam, krơh cau niam broă niam, añ tam pà bal tus mờ đảng viên tàm Ci ƀộ in. Tàm anih sơñio rùp mờ ală gah yal tơngĭt jơnau mpồl bơtiàn den kung neh lùp bơsram bal, ngui bơta chài măi mok pa tơmut tàm broă lơh sa; kấp ủy, Ci ƀộ kung neh kơlôi sơnơng, jòi gĭt, lùp bơsram  tơmut tàm broă lam lơh ai làng bol in”.

Ồng Phan Thanh Lăng là kwang bàng kơnhoàl, geh sồr tus dờp kơnòl broă Ƀí thư đảng ủy tàm xã tiah nhàr lơgar kal ke uă ngan Mường Lèo, kơnhoàl Sốp Cộp, càr Sơn La pà gĭt: Đảng ủy neh hòi jà ală Ci ƀộ blơi măi tíñ, drơng broă lơh, lơh broă bal. Tus tŭ do, 10 tàm 17 Ci ƀộ tàm xã neh geh măi tíñ; ală Ƀí thư Ci ƀộ ndrờm rcang lài jòi gĭt, lùp bơsram bal nàng ngui kông nghệ thông tin tàm broă đơng lam, sồr lơh. Bơdìh hơ̆, Đảng ủy xã kung sồr lơh nền tus mờ mpồl kwang bàng, kông cứk, đảng viên lơh jat niam ală gah niam bơh măi mok dê. Ồng Phan Thanh Lăng, đơs:“Añ neh sồr kwang bàng, kông cứk, yal tơl làm ală mat tàm internet, ală mpồl Zalo nàng lơh bè lơi geh kơnòl tàm broă ngui mờ ƀuơn ngan tàm broă atbồ bơh kấp hơđang dê. Jơh nùs tam pà bal jơnau yal bơh ală pang ngan ngồn bơh ƀăo, anih jơnau đơs Dà lơgar, ală tiah dê; lơh nền ờ tam pà ală jơnau yal ờ hềt sền sơ wì nền nòn, jơnau yal ờ niam, ờ di.. lơh geh bơta ờ niam tàm mpồl bơtiàn, bồ tơngoh ờ niam, tơrmù bơta pin dờn mờ mpồl bơtiàn, mờ Đảng, Dà lơgar. Bơdìh hơ̆, pơn jờng ală Ci ƀộ cùp rùp, lơh video bè ală broă lơh niam bơh ƀòn, Ci ƀộ, bơh ală broă dềt rơhền ngan rlau jơh dê... jat gùng dà broă lơh là ai bơta niam, ờ ai bơta ờ niam”.

Kơnờm ngui kông nghệ thông tin, lơh jat niam bơta niam bơh tàm internet, ală đảng viên ơm tàm tiah nhàr lơgar Mường Lèo, kơnhoàl Sốp Cộp, càr Sơn La bơsong ală bơta kal ke tàm xã tàm broă lơh bơt bơtàu ƀòn lơgar pa, bè ù tiah ngài, làng bol ơm kis ờ hoan geh, bơta gĭt wă làng bol ờ ring bal, bơta gĭt wă ờ hoan geh, ƀuơn gơtìp sơmờm, sơnờm mờ priă jền phan bơna, jat ală Yàng krơi is ờ di mờ adat boh lam ai gơnoar. Bơh hơ̆ sền gŏ gơnoar lam lài lơh krơh lài bơh đảng viên dê geh tơngŏ tàm tơl ală bơta lơh broă.