Tàm trồ tiah kàl hàm mrềt niam, ƀlàng sre 132 tàm xã Cư Êlang, kơnhoàl Ea Kar geh uă bơta ƀô thồm bơh kòi dê gam tàm tơngai gơlik bơkào. Ùr bơklau ồng Y Teng Ksor, ơm tàm ƀòn Ea Knốp, xã Cư Ni jơh nùs ngan lòt sền lŏ sre mờ di tŭ sơng ka sền gàr nàng kờñ gàr geh cồng nha tơnhào ai lŏ sre in. Ồng yal, lŏ sre ơnàng mờr 4 rơbô thơk vuông do geh Dà lơgar pa ai hìu bơnhă ồng in bơh nam 2004 nàng lơh sa. Broă pà ù lơh jăt Kơrnoat sồ 132 nam 2002 bơh Thủ tướng Cíñ phủ dê bè dong kờl ù lơh sa ai làng bol jơi bơtiàn dùl ết nă cau tàm tiah do dê tàm Tây Nguyên in. Bơh tŭ geh pà ù, 5 nă cau tàm hìu ồng dê ờ gam tai kơlôi jơgloh tàm tơngai puh pah tai, geh tŭ gam lơh geh priă jền rlau jơ̆t tơlak đong priă tăc kòi pah nam. Ồng Y Teng chờ hờp đơs: “Hìu añ geh 5 nă cau mờ geh pà mờr 4 sào sre. Bơdìh mờ hơ̆ gam geh Dà lơgar dong kờl priă rồ tờ ù gời mờ pà tai tơl sào 6 kĭ kòi sơntìl T25. Pah nam tơnhào tơl sào geh rlau 6 tạ kòi, kờp bal jơh nam den lơh geh rlau 2 tấn. Geh lŏ sre lơh kòi rau den tŭ do ờ gam pal kơlôi rcang ngòt gơtìp jơgloh tàm tơngai puh pah bè ală nam lài do tai”.

Drờm bè hơ̆ sơl, hìu bơnhă ồng Y Khiêng Niê, ơm tàm ƀòn M’Briu, xã Cư Huê kung geh dà lơgar pà 3 rơbô 700 thơk vuông ù lơh kòi tàm ƀlàng sre 132 Cư Êlang. Ồng Y Khiêng pà gĭt, broă geh bă ù lơh kòi do neh dong hìu bơnhă ồng dê geh tơl sùm phan sa tàm sùm uă nam do, geh tai rơhe, kòi nàng ròng kơnrồ, sur mờ iar, ada, tơnguh tai priă lơh geh: “Bol añ geh pà ù tàm ƀlàng sre Cư Êlang, bă ù ơnàng mờr 4 sào. Gùt dar sre geh rbòng dà lam dà mut tàm lŏ sre mờ gùng lòt rê ƀuơn ƀoài ngan. Bol añ sih 2 kàl pah nam, pah nam lơh geh pơgap 2 tấn 5 tạ kòi. Kòi do mìng sa jơh pơgap bơh 7 tus 8 tạ lơm tàm nam, kòi gam wơl nàng măi lề ngui lơh phan sa ròng bàr pe nơm sur me bal mờ rlau jơ̆t nơm sur tăc poăc mờ mpồl iar ròng lềng tàm suơn. Priă lơh geh bơh iar, ada pơgap bơh 50 tus 60 tơlak đong dùl nam. Kơnờm bơh hơ̆ hìu bơnhă añ lik klàs rƀah, geh tă pơgồp tàm ală bơnah priă lơh gùng lòt ƀòn lơgar pa”.

Ồng Nhữ Đình Tuyến- Củ tịc Ủy ƀan Ñân zân xã Cư Ni, kơnhoàl Ea Kar yal, jơh gùt xã geh 544 hìu bơnhă làng bol jơi bơtiàn dùl ết nă cau tàm tiah do dê tàm 3 ƀòn là: Ea Knốp, Ea Păl mờ Ega. Bơh kờp sền tàm 3 ƀòn, geh 201 hìu bơnhă kal ke ờ tơl ù lơh sa mờ gơwèt hìu bơnhă geh pà ù jăt Kơrnoat sồ 132 nam 2002 bơh Thủ tướng Cíñ phủ dê. Kờp jơh bă ù ơnàng ù pà là 68 lồ, tơl hìu bơnhă geh dờp bơh 3 rơbô 500 tus 4 rơbô 500 thơk vuông ù lơh kòi 2 kàl. Ồng Tuyến đơs, kòi lơh tàm ƀlàng sre do sùm geh cồng nha sùm, tơl lồ sùm geh bơh 5 tus 6 tấn dùl kàl. Lơh geh cồng nha do là bơh làng bol gĭt bơta chài lơh kòi; ală rbòng dà tàm dơlam ƀlàng sre geh lơh tơl gàr geh dà tuh tàm kàl prang kung bè kàl mìu. Ồng Tuyến pà gĭt, xã gam lơh broă rơndăp lơh tơlik mat ală mpồl lơh broă bal, pơlam gùng dà làng bol in lơh sa mờ lơh uă ƀlàng sre lơh kòi geh cồng nha rlau tàm ală kàl pơn jat tai in. Ồng Tuyến, đơs:“Tơnguh uă cồng nha tàm broă lơh sa tàm ƀlàng sre Cư Êlang ai làng bo in, xã gam geh broă lơh mblàng yal hòi jà làng bol tơlik mat mpồl lơh bal Hợp ták xã bơt bơtàu ală mpồl lơh broă bal. Bal mờ broă lơh kòi, den rơ̆p tam gơl dùl bơnah ù tiah tus lơh kòi sơntìl kă bro nàng làng bol in tơnguh uă priă lơh geh".

Kờp bal gùt kơnhoàl Ea Kar, neh geh 448 hìu bơnhă gơwèt 7 ƀòn, là: M’Oa, M’Briu, Tơng Kroa, Duôn Tai gơwèt xã Cư Huê; mờ ală ƀòn Ea Knốp, Ea Păl mờ Ega xã Cư Ni dê geh pà ù lơh sa, kờp jơh bă ù ơnàng 250 lồ. Jat ồng Nguyễn Đăng Kai, Phó Kwang atbồ Cơldŭ lơh broă Jơi bơtiàn kơnhoàl Ea Kar yal, bơh sơnrờp rơndăp broă lơh ờ geh cồng nha bè jơnau kơ̆p kờñ tài bơh ờ tơl dà tuh, ờ geh gùng lòt tàm ƀlàng sre, ù pa rồ ờ hềt gơ dờp ai tờm kòi in gơs niam. Nàng bơsong ală bơta kal ke, Ủy ƀan Ñân zân càr Dăk Lăk mờ kơnhoàl Ea Kar neh bơcri priă lơh mờr 17 tơmàn đong nàng lơh ală rƀòng dà tàm tơrbŏ bal mờ Tơnau dà Ea Rớt; cò ù pơn ring ƀlàng sre gơ in ring- lơh bê tông uă gơl gùng lòt tàm ƀlàng sre, dong kờl sơntìl kòi lơh 2 kàl ... Kơnờm bơh hơ̆, ƀlàng sre rồ lơh Cư Êlang dê lơh jăt geh cồng nha tŭ lơh geh cồng nha tơnhào uă mờ geh tơnhào sùm. Ồng Nguyễn Đăng Kai, pà gĭt, ƀlàng sre 132 tàm Cư Êlang rơ̆p ờ mìng là ƀlàng sre lơh kòi niam ngan lơm, mờ pơn jat tai geh lơh gơs ƀlàng sre niam, ƀuơn ƀoài ai lơh broă sa in. Ồng Nguyễn Đăng Kai, đơs: “Cơldŭ lơh broă jơi bơtiàn dan mờ Ủy ƀan Ñân zân kơnhoàl Ea Kar mblàng yal, hòi jà làng bol tă pơgồp halà gơtùi ngui priă jền lơi hơ̆ bơh xã dê nàng dong kờl tam tờm chi tàm jơh ală gơl gùng lòt tàm ƀlàng sre lơh geh bơta mƀur nàng làng bol in ơm rlô tàm tŭ tơnhào, sơng ka sền gàr phan tam. 2 là dilah ai geh priă jền mpồl bơtiàn lơh bal lơh bàr pe nơm hìu ơm tàm ƀlàng sre nàng làng bol in tơrgùm ing phan lơh geh bơh lơh sa suơn sre tàm tŭ mìu dờng dà tih, trồ tơngai duh càl khồm tŭ ờ hềt thàn jun pơn diang rê tàm hìu”.

Mờ  bơta dong kờl jơh nùs ngan bơh gah lơh broă geh gơnoar, bơta pơnđơl pràn lơh ngan tam phan bơh làng bol kòn cau jơi bơtiàn dê, tiah ù ro kơn rañ lài do tŭ do neh gơ gơs tiah lơh kòi dờng dong lơh geh kòi phe tàm tơngai puh pah, halà geh tŭ lơh geh bơta pràn nàng làng bol in brồ guh lik klàs rƀah. Bơh hơ̆, đơs nền Kơrnoat sồ 132 bơh Cíñ phủ dê là gùng dà di pal ngan, dong gĭt nđờ rơhiang nă làng bol jơi bơtiàn tàm kơnhoàl Ea Kar, càr Dăk Lăk geh rài kis hờm ra m, ƀòn lơgar Tây Nguyên ngai sơlơ pràn kơl dang, pas gơs rlau tai.