Hìu nhă ồng Nguyễn Văn Dương, kis tàm mpồl 3, thôn Thanh Bình, xã Ia Bă, kơnhoàl Ia Grai geh 5 sào ù tam kơphe.

Ồng Dương pà git, kàl tơnhào do priă ơpah cau pĭc plai gơguh uă mờ kal ke ngan jòi geh cau pĭc. Mơya, tài kơphe geh uă plai, tăc gơguh priă den tàng hìu nhă kung gam geh priă cồng: “Nam do bè cau pĭc den priă gơguh rơlao, tài priă kơphe gơguh den tàng priă cau pĭc kung gơguh sơl, di lah pĭc jăt ngai den cau ờ bài pĭc, geh uă cau tus tàm do kờñ pĭc jăt jơnau kờñ, hơ̆ là pĭc dă mờ toal tang ai he in hơ̆ sồng pơn diang rê là 210 rơbô đong tàm 1 tạ. Hìu añ geh 500 tờm kơphe, pĭc dùl tờm kơphe là 20 kĭ plai ris, bal mờ 8 rơbô đong tàm kĭ, tơnơ̆ mờ tŭ neh kờp jơh ală priă tă, ngai lơh broă den priă cồng geh nggùl”.

Kung lơh ngan jòi cau pĭc plai kơphe sơl, ồng Trịnh Văn Lộc, kis tàm ƀòn Út, xã Ia Hrung, kơnhoàl Ia Grai pà git: Hìu ồng kờp dŭ tơnhào geh rơlao 10 tấn kơphe gar bơh 3 lồ ù tam, uă rơlao mờ kàl lài di pơgăp 10%. Jăt ồng Lộc đơs, mờ khà priă kơphe gar gam gơguh tàm khà bơh 41 tus 42 rơbô đong tàm 1 kĭ den do là khà priă niam ai cau tam kơphe in. Nam do, priă phơng sih, sơnơm sền gàr phan tam gơguh uă lơh jăt bal priă tă nàng lơh broă bơh làng bol dê kung gơguh sơl. Mơya, mờ hìu nhă ồng, tài kơnờm mờ broă git ngui jơh phơng rơpu, kơnrồ bal mờ kơmhò kơphe bơh kàl lài, den tàng kung gam geh priă cồng: “Tŭ do ờ hoan ngui phơng hoá họk tai, ờ ngui sơnơm gơsơ̆t ñhơ̆t mờ sền gàr phan tam tai, rơhời wèt tus mờ broă tam phan jăt broă lơh hữu kơ, bơta niam den uă rơlao mờ nam lài, priă den geh uă rơlao mờ nam lài, tơnhào geh di pơgăp bơh 11 tus 12 tấn gar mờ khà priă tăc tŭ do den geh rơlao 400 tơlăk đong”.

Bơdìh mờ broă tam mờ tơnguh bơtàu lơh kơphe jăt broă lơh hìu nhă dê, tŭ do, uă hìu làng bol lơh broă sa neh mờ gam lơh kơphe jăt broă lơh hìu làng bol lơh broă sa, hợp ták xã. Ồng Đào Duy Quỳnh, Kwang atbồ Hợp ták xã lơh bal Ia Bă, kơnhoàl Ia Grai pà git, Hợp ták xã tŭ do geh 125 nă cau mờ 250 lồ kơphe tam jăt jơnau sồr 4C bơh nam 2018 tus tŭ do. Jơh ală cau tàm mpồl ndrờm geh bơsram broă tam sền gàr, dong kờl bè kông nghệ lơh kơphe kloh den tàng cồng nha suơn kơphe geh gơguh sùm. “Broă lơh bơh Hợp ták xã den ală cau tàm mpồl geh ală cau pĭc plai kơphe mờ oh mi gơtùi tàm luh bal tŭ pĭc bơh suơn do tus suơn ne nàng pơdar bal, geh sùm cau pĭc, di lah pơn drờm mờ bơdìh den cau pal ơpah cau pĭc, mơya ală cau tàm mpồl geh pơdar bal pĭc nàng tơl niam kơphe tŭ lơi kung geh dum mờ cồng nha niam rơlao, gàr bơta niam gar kơphe lơgar Việt Nam. Tơnơ̆ mờ hơ̆, kơphe bơh làng bol tăc geh cau blơi lài phan geh lơh, lơh jăt broă lơh den geh gơguh 10 rơbô đong tàm dùl khà priă, hơ̆ là làng bol geh tăc 52 rơbô đong tàm 1 kĭ gar kơphe”.

Kơnhoàl Ia Grai là tiah tam kơphe uă ngan càr Gia lai dê, mờ rơlao 18 rơbô lồ. Jăt Phòng Nông nghiệp mờ Phát triển Nông thôn kơnhoàl do yal, cồng nha kơphe tàm kàl lơh sa do kờp dŭ geh 3 tấn nggùl tàm 1 lồ, uă rơlao 10% pơn drờm mờ kàl lơh sa lài. Mờ ală cau lơh sa jăk, suơn kơphe tơnhào geh bơh 4 tấn nggùl tus 6 tấn tàm 1 lồ. Mò Phạm Thị Thu Hằng, Phó kwang atbồ phòng Nông nghiệp mờ Phát triển Nông thôn kơnhoàl Ia Grai đơs: “Kàl tơnhào kơphe nam 2022 tàm kơnhoàl geh ƀuơn mờ tơnguh bơtàu niam. Đơs bal nam do geh tơnhào uă, khà priă tăc uă rơlao pơn drờm mờ nam lài, trồ tiah ƀuơn niam, cau pĭc geh tơl. Ală anih klơh broă tờm geh bơto sồr khoa họk kỹ thuật kung bè ală kông ty tăc kơphe mờ lơgar bơdìh geh hìu lơh broă tàm càr bal mờ kơnhoàl neh pơgồp bal lơh mờ ală hợp ták xã mờ ală hìu làng bol, bè hơ̆, bơta niam kơphe tăc tàm drà kă bro ală lơgar geh niam mờ kơl jăp”.