Tàm hìu ơm pa lơh dờng ơnàng, bi Nguyễn Thị Lệ Thu, ơm tàm ƀòn 4, sơnah ƀòn Tân Hòa, ƀòn dờng Buôn Ma Thuột, càr Dăk Lăk pà gĭt, he là mè ròng is 3 nă kòn dềt, uă nam pal ơm đah bơdìh. Hìu ơm pa ơnàng mờr 40thơk neh dong 4 nă mè mờ kòn geh dùl nơm hìu ơm ram mhŭ ngan: “Lài do ơm bal mờ hìu ndàp mò đah mè dê, trồ mìu den nhăt dà mìu tơl tiah, trồ tơngai den duh mờ kơm buh bơ̆ ngan, mè mờ kòn ơm bòl glar ngan. Ƀộ Kwang àng jàu pà hìu ơm, 4 nă mè mờ kòn geh hìu nàng jơm tơngai, jơm mìu bè do brờn brài ngan, ờ kơlôi sơnơng trồ mìu nhăt halà trồ tơngai duh kơm buh bơ̆ tai. Să tờm añ ờ geh priă jền lơi den mpau kung ờ khin kơlôi tus geh lơh dồ nơm hìu bè do sơl”.

Hìu bơnhă bi H’Nuân Knul là dùl tàm ală hìu bơnhă rƀah ngan rlau jơh tàm ƀòn Tiêu, xã Ea Tiêu, kơnhoàl Cư Kuiñ, càr Dăk Lăk dê. Bi pà gĭt, hìu bơnhă geh 6 nă cau mơya ờ geh ù lơh sa, rài kis mìng kơnờm tàm ngai lòt lơh broă apah bơh 2 nă ùr bơklau dê lơm. Tài bơh ală bơta lơh sa hìu bơnhă ờ geh den bi kong mờ ơm tàm hìu lơh ing mìu nhăt dà mìu. Bi H’Nuân kơlôi sùm là, hìu bơnhă he rơ̆p ờ tŭ lơi geh lơh jai dồ nơm hìu kơ̆ kơl jăp nàng jơm mìu, jơm tơngai, mơya tŭ do, bi wơl geh dùl nơm hìu dờng bè do: “Lài do, ùr bơklau añ blơi hìu ndàp lơh hìu mờ giă 3 tơlak đong, mơya ndàp mờ sơlo neh ồm lề rau. Den gah Kwang àng tus lơh hìu pa dờng niam, 6 nă cau tàm hìu bơnhă brờn brài ngan, ờ duh pal kơlôi rcang tai. Tŭ do, ùr bơklau añ mìng kơlôi lơh broă sa nàng ròng oh kòn bơsram sră lơm”.

Jat ồng Hồ Viết Hùng– Phó Củ tịc Anih duh broă làng bol xã  Ea Tiêu, kơnhoàl Cư Kuiñ yal, Jơnau neh lơh nền bơh Ƀộ Kwang àng dê tàm xã geh 22 hìu bơnhă kal ke bè hìu ơm geh jàu pà hìu bơta nđàc. Kờp jơh priă tă lơh 1 tơmàn 760 tơlak đong. Tŭ do ală hìu bơnhă ndrờm neh dờp tàm jàu hìu mờ mut ơm. Broă dong kờl hìu ơm ờ mìng dong ală hìu bơnhă “iang nùs ơm kis lơh broă sa” lơm mờ gam dong tiah do lơh sir broă jàu bè hìu ơm tàm broă bơt bơtàu ƀòn lơgar pa. Ồng Hồ Viết Hùng, pà gĭt:“Tŭ do khà tơn jơh hìu lơh ing tàm ù tiah xã dê sền bal là tơl pơndrờm mờ broă jàu, pơgồp bơnah tàm broă lơh bơt bơtàu ƀòn lơgar pa bơh xã dê. Tŭ geh dong kờl hìu ơm, làng bol brờn brài ngan, iang nùs bè ờs wơl rài kis nàng bơtàu tơnguh lơh sa hìu bơnhă, pơgồp bơnah bơt bơtàu mờ bơtàu tơnguh xã he dê pràn kơl dang mờ kơ̆ kơl jăp".

Tơngai bơh nam 2022 – 2025 càr Dăk Lăk lơh ngan lơh rlau 5 rơbô nơm hìu dong kờl ai ală hìu bơnhă rƀah, hìu bơnhă pa lik klàs rƀah, hìu bơnhă geh sră dong kờl dà lơgar, hìu bơnhă làng bol kal ke bè hìu ơm in. Jơnau neh lơh nền lơh 1 rơbô 200 nơm hìu bơta nđàc bơh Ƀộ Kwang àng dê là dong kờl dờng ngan, dong càr gơtùi lơh sir jơnau kờñ neh geh ai. Ồng Lê Bá Cảnh– Phó Củ tịc Anih duh broă Mặt trận Dà lơgar Việt Nam pà gĭt, tŭ dờp Jơnau lơh nền, Anih duh broă Mặt trận Dà lơgar ală kấp  tàm càr dê neh pơgồp bal mờ gah lơh broă Kwang àng, gơnoar atbồ ală tiah, kờp sền, sền sơ wì, cih mat ală cau dờp geh broă lơh hìu jàu ai ală hìu bơnhă làng bol in. Jơh  1 rơbô 200 nơm hìu neh geh tàm jàu mờ ală hìu bơnhă neh mut ơm. Tàm tơngai tus, Anih duh broă Mặt trận dà lơgar Việt Nam càr Dăk Lăk pơn jat tai hòi jà tă pơgồp priă jền mpồl bơtiàn nàng lơh jat broă rơndăp lơh lơh ală hìu gam wơl nàng jàu pà ală hìu bơnhă làng bol in. Ồng Lê Bá Cảnh, đơs:“Bol añ pơn jat tai lam lơh dong kờl ală cau kal ke bè hìu ơm mờ kơ̆p kờñ ală gah broă, mpồl cau, ală mpồl cau halà cau geh nùs nhơm niam tàm càr mờ bơdìh càr pơn jat tai pơgồp bal mờ càr Dăk Lăk dong kờl làng bol tàm ù tiah càr dê ờ geh hìu ơm. Lơh bè lơi tàm tơngai bơh nam 2022 – 2025, gàr niam broă lơh sir geh jơnau kờñ lơh rlau 5 rơbô nơm hìu ơm, dong kờl cau kal ke bè hìu ơm tàm tơngai do tàm ù tiah càr dê”.

Jơnau neh lơh nền Ƀộ Kwang àng, lơh 1 rơbô 200 nơm hìu pà ală hìu bơnhă kal ke, hìu bơnhă geh sră dong kờl dà lơgar, hìu bơnhă làng bol jơi bơtiàn dồ ết nă cau tàm càr Dăk Lăk, geh lam lơh bơh nhai 03 nam 2024 mờ neh lơh sir tàm lồi nhai 07 nam 2024. Kờp jơh priă lơh Jơnau neh lơh nền là 96 tơmàn đong, tàm hơ̆ priă dong kờl bơh Ƀộ Kwang àng dê là 60 tơmàn đong, bơnah gam wơl ală tiah càn lài nàng lam lơh. Tơl nơm hìu ơnàng 36 thơk vuông, mờ lơh kơlik, rơkàng jơm mờ sơlo, lă găc men, kờp priă 80 tơlak đong. Tŭ do rlau 1 rơbô 200 hìu bơnhă neh mut ơm, bơh hơ̆, pơgồp bơnah dong càr Dăk Lăk tơn jơh jơgloh, tơrmù rƀah, tam pà bal kal ke mờ làng bol jơi bơtiàn dồ ết nă cau, dong làng bol iang nùs lơh sa, tam klăc bal bơt bơtàu lơh sa, ƀòn lơgar pa mờ sền gàr lơngăp lơngai Dà lơgar. Dùl Jơnau neh lơh nền dờng, mơya neh lơh sir mìng tàm rlau 4 nhai kung pà gŏ bơta bơcri lơh niam, pơgồp bal geh cồng nha bơh ală kấp, gah broă dê.