Pa mìng 16 sơnam lơm, H’Đô Ayun (kòn cau Rơđê) ơm tàm ƀòn Dhung, xã Cư M’Gar, kơnhoàl Cư M’Gar, càr Dăk Lăk, neh bau. Ală ngai bơh sơnrờp, yô kơnòm să gam geh hìu bơnhă sền gròi dong kờl mờ ờ duh pal kơlôi rcang bơta tàm rài kis. Mơya bơh tŭ deh kòn, rài kis sơnđờm kong  tìp mờ ală bơta kal ke. Tŭ do neh geh 2 nă kòn, bi H’Đô Ayun hơ̆ sồng sền gĭt bơta tìs bơh he dê. Rài kis kal ke, sươ̆i siar tŭ jơh bal 2 nă ùr bơklau ndrờm gam tàm sơnam ờ hềt ntào dờng jơh bè nùs nhơm, den pal tam sang. “Kal ke ală bơta. Tài añ bau gờñ. Kal ke priă jền ròng siam oh kòn mờ broă lòt bơsram bơh kòn dê kung kal ke ngan sơl. Ờ tơl priă jền nàng ai kòn in lòt bơsram. Di ờ den kòn neh bơsram ờdŭ 7 rao mơya tŭ do mìng gam bơsram ơdŭ 4 lơm. Jơh ală bơta là tài bơh he lơm gơ dê. Ală bơta kal ke, lơh sa kung ờ bơtàu tơnguh tài bơh he ờ tơl bơta gĭt wă, wă wờng. Dilah sac rơwah wơl añ rơ̆p ờ bau gờñ, tài bơh sơnđàc ngan rlau jơh là oh kòn he dê....

Dùl nă cau ndai kung bè hơ̆ sơl, ngai bi H’Mai Kƀuôr, ơm tàm ƀòn Dhung, xã Cư M’Gar, kơnhoàl Cư M’Gar, càr Dăk Lăk bau kung tàm sơnam 16 sơl. Bulah jơh hìu bơnhă kơryan ờ ai, ùr pơgru tàm hìu bơsram kung bơto tơngkah mơya bi ờ gŏ iăt. H’Mai Kƀuôr kơl dăng nùs bau gờñ tŭ gam tàm sơnam bơsram sră. Bau gờñ, broă bơsram sră kung sang tĕ tơn, rài kis kờp ngai mờ anih ràng tăc phan dềt mờ ală broă lơh drơng tàm hìu bơnhă. Bi H’ Mai Kƀuôr đơs, bau gờñ mìng  ơm sùm tàm bơnhă ồs, bơdìh gam geh uă bơta niam ngan mờ he ờ hềt gĭt mơya kung lời tĕ tài bau tài kòn. “Tŭ gam kơnòm să ngan neh gơ gơs dùl nă cau mè. Gĭt nđờ bơta kal ke gùt dar. Kòp tê jê să den ờ geh priă blơi sơnơm kal ke ngan. Kơlôi wơl wờl să ngan tài bơh neh lời tĕ broă bơsram sră nàng bau gờñ.

H’Đô mờ H’Mai ndrờm bau gờñ. Dùl nă cau gam chờ hờp đau mờ rài kis tŭ do, dùl nă den pal “tam sang bau”. Mờ nùs nhơm bau gờñ ai kòn in nàng bè ờs rài kis, hìu bơnhă den geh tai cau lơh broă ờ gam di pal tai. Mò H’Mưu Kƀuôr (sùm hòi là mò H’Mai) ơm tàm ƀòn Dhung, xã Cư M’Gar, kơnhoàl Cư M’Gar đơs: “Añ sùm bơto tơngkah oh kòn kòn sau pal bơsram sră, ờ gŏ di hàm nhơl, añ ờ ai oh kòn kòn sau sang tĕ bơsram sră den bau gờñ, ờ gĭt lơh broă lơi ai rài kis hìu bơnhă in”.

Kơnhoàl Cư M’Gar càr Dăk Lăk geh rlau 197 rơbô nă cau mờ 25 jơi bơtiàn oh mi ơm kis bal. Bơh bồ nam 2018 tus tŭ do tàm ù tiah kơnhoàl dê cih dờp geh 50 yô bau gờñ mờ ngai sơlơ gơmù. Uă tiah lài do là tiah “geh uă ngan” bè bơta do mơya nam do neh geh gơmù mờ hời rơ hời geh kơryan uă. Mơya, tàm ù tiah kơnhoàl dê kung gam geh tai 8 yô bau gờñ. Ồng Y-Wem Hwing- Phó Củ tịc kơnhoàl Cư M’Gar, càr Dăk Lăk pà gĭt, ală nam pa do, gơnoar atbồ tiah do mờ ală mpồl cau, mpồl bơtiàn neh lam lơh uă broă lơh jơh nùs lơh jat rơndăp broă lơh tơrmù uă ngan bơta bau gờñ mờ bau mờ cau jơi nòi rềp bal tàm tiah jơi bơtiàn dồ ết nă cau. Bulah lơh geh cồng nha bơh sơnrờp, mơya nàng lơh geh mờ tam gơl bơta gĭt wă bơh làng bol dê, kờñ pal sơlơ tơnguh rlau tai broă lơh mblàng yal. “Tàm ală nam pa do, bơta geh ngan bau gờñ, bau mờ cau jơi nòi rềp bal neh gơmù loh làng. Ală ƀan, ngàñ, mpồl cau bơh kơnhoàl dê jat sền mìng dùl tơngume bau gờñ, bau mờ cau jơi nòi rềp bal. Tơnơ̆ tŭ gĭt gŏ bàr pe nă cau bau gờñ, bau mờ cau jơi nòi rềp bal Ủy ƀan Ñân zân kơnhoàl neh sồr xã bơsong lơh tìs mờ priă. Ală ƀan, ngàñ, mpồl cau neh mut lơh bal jơh nùs, dùl ròt bal mblàng yal ai làng bol in ờ gŏ di bau gờñ mờ bau mờ cau jơi nòi rềp bal”.

Lơh jat Rơndăp broă lơh “Tơrmù uă ngan rlau jơh bơta bau gờñ mờ bau mờ cau jơi nòi rềp bal tàm tiah jơi bơtiàn dồ ết nă cau”, pa do, Mpồl lơh broă Jơi bơtiàn càr Dăk Lăk neh pơgồp bal mờ Ủy ƀan Ñân zân ală tiah sơlơ tơnguh bơyai lơh Pơrjum mblàng yal tơrmù uă ngan bơta bau gờñ mờ bau mờ cau jơi nòi rềp bal ai mờr 3 rơbô 900 dơ̆ cau tus bal tàm ù tiah 30 xã geh khà cau bau gờñ mờ bau mờ cau jơi nòi rềp bal uă. Mờ Mpồl lơh broă Jơi bơtiàn càr Dăk Lăk kung neh pơgồp bal mờ Ƀan Tuyên giáo Tỉñ ủy càr sơlơ tơnguh broă lơh mblàng yal tàm ală xã geh khà bau gờñ mờ bau mờ cau jơi nòi rềp bal uă tàm ù tiah càr dê.