Tàm ù tiah ro kơnrañ bơh xã Ea Nuôl, kơnhoàl Buôn Đôn, càr Dăk Lăk dê suơn plai gơ àl rlau 1 lồ 5 sào gam geh cồng Lý Mạnh Hùng sơng ka sền gàr, koh ntê niam ngan nàng rcang ai tơngai gơlik plai pa. Ồng Hùng pà gĭt, tàm kàl tơnhào plai gơ àl, tŭ lòt tàm suơn, năc kờñ ngan geh sa plai mờ jòi gĭt bè broă tam mờ sơng ka sền gàr, tơnhào plai, cau tờm suơn kung chờ hờp ngan tài bơh phan bơna tàm dùl tiah ờ duh pal jơh priă ơpah cau pĭc, ờ duh pal jơh priă jun pơndiang phan. Ồng Lý Mạnh Hùng, đơs: “Bơh tŭ tam uă tờm plai gơ àl do drơng năc lòt nhơl mờ drơng lơh sa hìu bơnhă añ gŏ tàm ù tiah ro kơnrañ bơh Buôn Đôn dê den gơ dờp ngan mờ tờm plai gơ àl. Tờm plai gơ àl tŭ geh tam tàm Tây Nguyên ƀuơn ngan sơng ka sền gàr bơkiar bơkào jat jơnau he kờñ. Plai gơ àl añ lơh geh gơtùi tăc tơn ai năc lòt nhơl in mờ cèng wơl priă jền geh sùm ai hìu bơnhă in”.

Ờ mìng tam uă ală phan tam bơh yau lơm, bàr pe cau lơh broă sa tàm kơnhoàl Buôn Đôn neh khin cha tam gơl, tam tơrlòng mờ ală phan tam pa. Bàr pe broă lơh neh cèng wơl priă lơh geh uă mờ lơh gơ kờñ bơta kờñ jòi gĭt bơh năc lòt  nhơl dê tus mờ suơn chi. Pơn rơ ngan là suơn nho tờm chi, rlau 1 rơbô 800 tờm bơh ồng Đỗ Trọng Huế, ơm tàm xã Ea Huar, kơnhoàl Buôn Đôn. Ồng Đỗ Trọng Huế pà gĭt, bulah pa mìng geh 100 tờm geh plai, mơya priă lơh geh bơh hìu bơnhă ồng dê bơh plai nho ai geh pơgap 200 tơlak đong dùl nam. Ờ mìng bè hơ̆ lơm, uă ngan cau hòi lùp mờ kơ̆p kờñ geh tus tơn nàng kờñ lòt sền mờ sền gĭt... Ồng Đỗ Trọng Huế, đơs:“Tŭ hìu bơnhă tam mờ lòt sền tờm nho do sền gŏ geh cồng nha, kung tăc tàm drà kă bro bàr pe nam rềp ndo. Hìu añ geh pơnđàng tàm ală pang màng xã hội, geh uă ngan cau tus jòi mờ kờñ geh sền gĭt... Den tàng hìu añ kung geh broă lơh tam gơl tus lơh lòt nhơl lơh sa suơn sre den gam dan sră ai gơnoar”.

Bơh bơta ƀuơn, bơta pràn bơh tiah do dê mờ sền gĭt jơnau kờñ lòt nhơl sền gĭt bơh năc lòt nhơl dê ngai sơlơ uă. Ồng Trần Văn Toàn, Kwang atbồ Hợp ták xã drơng lòt nhơl lơh sa suơn sre Phú Nông- Buôn Đôn pà gĭt, Hợp ták xã neh lơh bal mờ ală hìu bơnhă cau lơh broă sa tơrgùm bơtàu tơnguh jrô ơnàng làm uă ală broă lơh ròng phan, tam phan geh bơta pràn bơh tiah do dê, bè: ròng rơpài, ròng iar, ròng ka, tam plai kam, plai kroăt, plai bung, ka kao, plai gơ àl... nàng drơng năc lòt nhơl in. Ồng Trần Văn Toàn, đơs:“He pal rcang lài mờ gơ dờp is tài bơh dilah bol he mìng lơh gah lòt nhơl lơm mờ lời tĕ lơh sa suơn sre den bơta sền gĭt rơ̆p ờ geh ờ. Tŭ do, năc lòt nhơl kung rơ hời tam gơl jat gùng dà sền gĭt mờ lòt sền tàm tŭ dờp ală broă lơh”.

Ồng Y Si Thắt Ksơr, Phó Củ tịc Ủy ƀan Ñân zân kơnhoàl Buôn Đôn pà gĭt: Kơnhoàl sền gròi ngan broă bơtàu tơnguh lòt nhơl pơgồp bal mờ lơh sa suơn sre, ƀòn lơgar. Tàm Nghị quyết Đảng ƀộ kơnhoàl tơngai lơh broă bơh nam 2020-2025 geh đơs sùm tơngume do. Tơngai pa do, Ủy ƀan Ñân zân kơnhoàl neh jàu ai Phòng Nông nghiệp mờ Phát triển Nông thôn pơgồp bal mờ Phòng Văn hoá- Thông tin jat tàm ală gùng dà pơlam bơta ƀuơn bơta pràn bơh kơnhoàl dê sac rơwah ală broă lơh di pal nàng lơh jat. Bal mờ hơ̆, kơnhoàl Buôn Đôn kung sền gròi bơtàu tơnguh hợp ták xã. Tus tŭ do, jơh gùt kơnhoàl geh 19 Hợp ták xã gam lơh broă, tàm hơ̆ geh uă Hợp ták xã lơh broă jat broă lơh lòt nhơl- lơh sa suơn sre. Ồng Y Si Thắt Ksơr, pà gĭt tai:"Mờr tus bol añ kung jat tàm nùs nhơm Nghị quyết sồ 88 bơh Quôk hội dê nàng dong kờl ai ală hìu bơnhă geh bơta pràn bơtàu tơnguh. Mơkung pơgồp bal mờ ală Hợp ták xã, ngan là tàm tiah làng bol jơi bơtiàn dồ ết nă cau nàng hời rơ hời tam gơl bồ tơngoh kơlôi sơnơng, broă lơh bè bơtàu tơnguh lòt nhơl pơgồp bal mờ lơh sa suơn sre, ƀòn lơgar.. Bơsong broă lơh ai làng bol jơi bơtiàn dồ ết nă cau mơkung pơgồp bơnah tam gơl pa bơtàu tơnguh di pal mờ ală bơta tàm tiah do dê”.

Mờ ală gùng lòt geh ngan, kơnhoàl Buôn Đôn, càr Dăk Lăk gam wèt tus lơh li la ală phan bơna lòt nhơl, ngui jơh bơta ƀuơn, bơta pràn lơh sa suơn sre, lơh jat geh cồng nha broă lơh lòt nhơl pơgồp bal mờ lơh sa suơn sre nàng gơ hòi gơ jà năc lòt nhơl tàm lơgar mờ dunia, pơgồp bơnah bơtàu tơnguh lơh sa ƀòn lơgar tiah nhàr lơgar dê.