Ală kwang bàng ring bal uă ngan mờ gùng dà broă lơh lơh tơrlòng lài tam pà kấp ai kấp kơnhoàl in tàm broă atbồ, lam lơh jat ală broă lơh jơnau kờñ Dà lơgar jat broă lơh: Hội đồng Ñân zân kấp kơnhoàl geh lơh nền tam gơl broă lơh tam pà priă bơcri dà lơgar, priă tă sùm đah ală broă lơh jơnau kờñ Dà lơgar tàm broă rơndăp lơh bơcri priă Dà tơngai dimơ tơngai, broă rơndăp lơh bơcri priă pah nam, kờp dŭ lài kes priă Dà lơgar pah nam neh geh kấp geh gơnăp gơnoar dê jàu”. Kwang bàng Mai Văn Hải, mpồl kwang bàng Quôk hội càr Thanh Hóa, đơs là:“Broă lơh do rơ̆p ngui tơn gùng dà broă lơh krơi is ai broă lơh tă bơsong kal ke, kòl yan tàm nam 2024- 2025 in. Rlau mờ hơ̆, Nghị quyết bơh Quôk hội dê gam cribơyai nàng tă bơsong kal ke, kòl yan, lơh mhar tŭ tơngai lơh jat 3 broă lơh jơnau kờñ Dà lơgar tơngai bơh nam 2021-2025 nàng ală tiah in rcang lài priă jền đah ală broă lơh jơnau kờñ Dà lơgar tam gơl bơh priă broă lơh tus priă bơcri lơh. Dilah lơh geh den broă ai priă jền bơh ală broă lơh jơnau kờñ Dà lơgar hơ̆ sồng gơtùi gàr geh jơnau kờñ geh ai”.

Bal mờ tam pà kấp là tam pà priă jền. Bulah gam bàr pe bơta kwi kwơ bè bơta pràn jak ngui priă bơh kấp kơnhoàl dê, mơya uă ngan ală kwang bàng jờng rơ uă ngan broă lơh tam pà, jàu kờp dŭ tă ngui priă jền sùm bơh jơnau rcang cih Nghị quyết hơ̆ là: Quôk hội lơh nền tam pà; Thủ tướng Cíñ phủ jàu kờp dŭ lài kes priă dà lơgar ai ală tiah in jat kờp jơh priă tă; Hội đồng Ñân zân kấp càr tàm pà priă tă ngui sùm tus rơndăp broă lơh bơnah phan. Dilah kờñ pal geh Hội đồng Ñân zân kấp càr lơh nền tam pà kấp ai Hội đồng Ñân zân kấp kơnhoàl in lơh nền.

Gơrềng tus broă atbồ phan bơna lơh gơs bơh rơndăp broă lơh dong kờl lơh sa ală kwang bàng sồr kơlôi sơnơng sền sơ wì ai ngui lài mờ tŭ tàm jàu ai mpồl bơtiàn in, cau lơh bal mờ sơlơ tơnguh bơta lòt sền bơh kấp hơđang dê, jàu kơnòl ai anih lơh broă geh gơrềng in. Kwang bàng Nguyễn Thị Sửu, Mpồl kwang bàng Quôk hội càr Thừa Thiên- Huế kơ̆p kờñ, broă ring bal Nghị quyết bè bàr pe gùng dà broă lơh, broă lơh krơi is lơh jat ală broă lơh jơnau kờñ Dà lơgar rơ̆p là bơnàng jă adat boh lam dong ală tiah in tă bơsong kal ke, kòl yan, bơsong ală bơta gơ kòl nàng lơh tus lơh sir jơnau kờñ, kơnòl broă bơtàu tơnguh lơh sa- mpồl bơtiàn bơh nam 2024 đơs is mờ bơh jơh tơngai lơh broă đơs bal. Kwang bàng Nguyễn Thị Sửu, đơs:“Jơh ală broă lơh jơnau kờñ Dà lơgar ndrờm jàu ai kấp xã in lơh cau tờm bơcri priă lơh, ală rơndăp broă lơh dờng rơ̆p tam pà kấp ai kấp càr halà kấp kơnhoàl in. Tơngume tam pà pal loh làng, song dơ pă, geh kơnòl tŭ hơ̆ Hội đồng Ñân zân kấp càr, Hội đồng Ñân zân kấp kơnhoàl, Hội đồng Ñân zân kấp xã hơ̆ sồng lơh niam gơnoar broă, kơnòl broă bơh he dê. Jat tàm ală bơta hơ̆, gơnoar atbồ Ủy ƀan Ñân zân kấp xã là anih lơh jat adat boh lam hơ̆ sồng lam lơh tơl gơnoar broă mờ ờ geh lơh tàm rơndăp tàm rơndồl kơnòl broă mờ jờng rơ gơnoar broă bơh tơl kấp dê”.

Mờ 3 broă lơh jơnau kờñ Dà lơgar, uă kwang bàng kơ̆p gơn Nghị quyết geh ring bal rơ̆p geh uă tam gơl, lơh geh broă lơh niam nàng kơnhoàl ù tiah in lơh jat geh bơta ƀuơn bơta pràn geh lài, bơtàu tơnguh brồ guh. Kwang bàng Tạ Văn Hạ, mpồl kwang bàng Quôk hội càr Quảng Nam, đơs là: “Mờ 8 broă lơh lơh tơrlòng lài den añ đơs là rơ̆p lơh geh bơta bơtàu tơnguh mhar tàm broă lơh mhar tŭ tơngai lơh jat 3 broă lơh jơnau kờñ Dà lơgar. Do là bơta mờ añ kờñ pal sền sơwì lơh bè lơi tŭ sac rơwah, neh hòi là lơh tơrlòng lài den pal geh bơta ala mat, digơlan là ƀòn lơgar, tiah drà, tiah kơh bơnơm..., jơh ală bơta hơ̆ tŭ bol he tơrgùm wơl den broă lơh hơ̆, broă hơ̆ gơ pal cèng bơta tơrgùm jơh ală bơta geh ală gah broă mờ ù tiah”.

Ală kwang bàng kung kơ̆p gơn, Nghị quyết bè bàr pe gùng dà broă lơh, broă lơh dong kờl krơi is lơh ală broă lơh jơnau kờñ Dà lơgar geh Quôk hội ring bal, Cíñ phủ mờ gah lơh broă geh gơnoar rơ̆p gờñ ai lơh jat ală Nghị địñ, Thông tư, sră nggal bơto pơlam nàng adat gờñ ngan lơh jat geh cồng nha mờ mut lơh broă tàm rài kis.