Bi Rcom Vu, ơm tàm ƀòn Ia Rniu, xã Ia Broái, kơnhoàl Ia Pa gam ờ ru ngan sơng ka sền gàr suơn tơngời siñ khối ơnàng 1 lồ bơh he dê, bi Rcom Vu pà gĭt, do là kàl tam tơngời dơ̆ 3 tàm nam do, dong hìu bơnhă bi lơh geh priă jền 80 tơlak đong tơnơ̆ tŭ ờ kờp jơh priă tă lơh. Bi Rcom Vu, đơs:“Mờ bơta chài tam pa, làng bol tam tơngời siñ khối geh uă bơta ƀuơn, bơh bơta chài lơh ù, tus crăp ding dềt nàng rcang lài tuh dà, broă lơh tŭ do kung ƀuơn rlau pơndrờm mờ lài do. Dùl bơnah cồng nha bơh broă tam phan do kung dùl bơnah kơnờm bi Kpă H’Yư, kwang bàng mpồl cau ùr xã dê bơto pơlam jơh nùs ngan ai hìu bơnhă mờ làng bol tàm ƀòn in bơh ală ngai sơnrờp”.

Ồng Rcom Tiêu- Kwang atbồ thôn Ia Rniu brờn brài pà gĭt: kơnờm ngui di broă lơh bơta chài tam phan dê, tơl lồ tơngời siñ khối digơlan tơnhào geh bơh 35 tus 40 tấn. Bơh broă tam gơl broă lơh tam phan pa, thôn Ia Rniu neh gơmù mhar ngan khà hìu bơnhă rƀah, tŭ do mìng gam 73 hìu bơnhă. Ồng Rcom Tiêu đơs: “Lài do tam rơngời 1 nam 1 kàl lơm, mơya bơh tŭ ngui broă lơh tam tơngời siñ khối den 1 nam làng bol geh tam bơh 3 tus 4 kàl, gah mpồl cau ùr kung neh pơrjum oh mi tàm mpồl mblàng yal broă ngui broă lơh tam tơngời siñ khối, broă lơh geh yal tơngĭt uă jat uă broă lơh krơi is, bơh bơta chài tuh dà ntờc, broă ơn phơng, ƀồm sơnơm kung geh ală cau tàm mpồl dong kờl sơl, bơh tŭ ngui broă lơh do den cồng nha kung geh bơtàu tơnguh loh làng ngan”.

Broă dong làng bol jơi bơtiàn kòn cau Jrai tam gơl phan tam, ngui jak chài tàm broă lơh sa geh tă pơgồp dà kơl hề uă ngan bơh bi Kpă H'Yư, Củ tịc Mpồl tam klăc cau ùr xã Ia Broái dê. Bi neh jơh nùs tă pơgồp jơnau đơs mờ kấp ủy, gơnoar atbồ tiah do lam lơh uă broă lơh bơtàu tơnguh lơh sa geh cồng nha tàm tiah làng bol jơi bơtiàn dồ ết nă cau. Bi Kpă H'Yư, đơs:“Să tờm añ kung sùm pơndờm pơnđiang oh mi, tơl nă cau pal hời rơ hời tam gơl bơta mờng sơnơng mờ bơta mờng lơh broă; pal jat ngui bơta chài mờ ngui măi mok pa, bè lài do tam phan là pal gơn gơdùh dà mìu, mơya tŭ do he ƀồm dà tuh ntờc, ngui phơng sih, sơnơm sền gàr phan tam nàng cèng wơl cồng nha tàm broă lơh sa suơn sre, tŭ do uă oh mi neh tam gơl bơta mờng sơnơng mờ bơta mờng lơh broă mờ gĭt ngui bơta chài măi mok pa tàm broă lơh sa suơn sre”.

Jat ồng Vương Chí Thông, Phó Ƀí thư Đảng ủy xã Ia Broái, mờ bơta lơh ngan sùm bơh ală kwang bàng tơryang tơryồng bè bi H’ Yư dê, broă lơh tơrmù rƀah tàm xã gam lơh geh ală cồng nha pal pơn jờng ngan: “Krơh niam bơh Củ tịc Mpồl tam kăc cau ùr xã dê là jơh nùs, ngăc ngar tàm broă mblàng yal hòi jà làng bol tàm broă lơh tơrmù rƀah, làng bol pin dờn, iăt, pơgồp bơnah dong ai broă lơh tơrmù rƀah bơh xã dê ƀuơn rlau tai. Bi H’Yư neh geh Mpồl tam klăc cau ùr Dà lơgar Việt Nam jờng rơ mờ pà khà jờng tàm broă hòi jà mblàng yal làng bol tàm ƀòn, tàm thôn in. Bi H’ Yư là cau pràn jak, tàm broă lơh hòi jà mblàng yal bi lơh niam ngan”.

Mờ ală cồng nha jak ngan tàm broă lơh Mpồl mờ srơh cau ùr, nam 2023, bi Kpă H’ Yư neh chờ hờp geh Mpồl Tam klăc cau ùr Dà lơgar Việt Nam pà sră jờng rơ. Mơya, gơwèt mờ bi, phan ƀàn dờng ngan rlau jơh ngan là bơta pin dờn, kờñ gơboh bơh làng bol mờ ală bơta tam gơl niam ngan tàm rài kis bơh làng bol tàm tiah do dê.