Bơh nam 2009, ồng Đinh Văn Bới kòn cau Bơnhàr, kis tàm ƀòn Đăk Kjông, xã Lơ Ku, kơnhoàl Kbang, càr Gia Lai neh tă jơh priă geh tàm hìu nàng tam 4 lồ ù tờm keo. Bơdìh hơ̆ tai, ồng gam càn 50 tơlăk đong bơh Ngân hàng Cíñ sác Xã hội kơnhoàl Kbang dê nàng tam 5 lồ tờm ƀac đàn. tơnơ̆ mờ uă nam sền gàr, ồng neh tơnhào bă ù tam tờm keo geh 85 tơlăk đong tàm 1 lồ. Ồng Đinh Văn Bới pà git, broă tam brê neh dong kờl hìu nhă ồng tơl ngui tơl sa: “Tam brê den ƀuơn mờ priă geh uă rơlao. Tam tơngời ờ geh tơnhào uă ndrờm mờ tờm keo, mờ tờm keo bŭ lah jŏ nam mơya mìng tơnhào dùl dơ̆ là niam. Bơta chài kung bè ờs, mìng blơi sơntìl, blơi sơnơm sơndră mờ kơnàp, mus ñhơ̆t pah nam 2 dơ̆”.

Ồng Phùng Văn Minh, kòn cau Mường, kis tàm thôn 2, xã Lơ Ku, kơnhoàl Kbang, càr Gia Lai kung brồ guh lơh pas tài kơnờm bơh broă tam brê. Bơta tờm geh tàm nam 2010, tŭ ồng tus bal dùl rơndăp broă lơh tam brê geh dà lơgar dong kờl sơntìl tờm keo ờ sa priă. Mờ 3 lồ ù tam sơnrờp ngan ai geh tơnhào tàm nam 2016, hìu nhă ồng neh tơm jơh dồs mờ geh priă bơcri tàm broă lơh sa. Ồng Phùng Văn Minh chờ hờp đơs, brê neh dong kờl rài kis tam gơl ngan: “Tam brê ờ tŭ lơi ờ geh tơnhào. Tàm ală nam do, priă geh bơh brê uă mờ ƀuơn tai. Cau tăc jăt lồ gam he dê den tăc tàm hìu măi. Tăc chi brê den blơi geh rơndeh ôtô nàng pơn diang phan bơh brê tus hìu măi. Ngai lài tam phan ờ jŏ tơngai den mìng tơl sa, càn priă ngân hàng sùm. Mơya bơh tŭ tam brê, rài kis neh tơl ngui tơl sa uă ngan”.

Bơh nam 2021 tus 2023, kơnhoàl Kbang neh tam geh mờr 3 rơbô 200 lồ brê. Mìng is xã Lơ Ku tam geh rơlao 700 lồ brê, tàm hơ̆ nggùl khà brê gam tàm tơngai geh tơnhào. Ồng Trần Xuân Nam, Củ tịc Anih duh broă Làng bol xã Lơ Ku pà git, xã gam pơgồp bal mờ Ngân hàng Cíñ sác Xã hội nàng dong kờl làng bol càn priă blơi sơntìl tờm chi mờ sền gàr brê.

Làng bol kung neh geh bơto pơlam tam bơrlŭ ală bơta phan tam ờ jŏ tơngai bè bùm blàng, tơngời, khoah, bùm lô nàng geh tai priă. Broă tam brê ờ mìng ai geh broă lơh mờ gam dong kờl làng bol geh ngui ù dòr, ù kơh, sơndră mờ tơrlah ù mờ tơnguh priă geh, tàm hơ̆ uă ngan là làng bol jơi bơtiàn ờ gal cau. Ồng Trần Xuân Nam pà git: “Pah nam xã pơgồp bal mờ Cơl dŭ lơh broă Broă lơh sa suơn sre mờ Anih lơh broă drơng ala lơh sa suơn sre kơnhoàl Kbang bơyai lơh pờ ală ơdŭ bơto bè bơta chài tam mờ sền gàr tờm chi brê. Làng bol geh bơto sồr bè broă lơh bơh broă tờ bơtô tus broă mus pès chi che jăt gah mờ broă sền gàr tờm chi brê tàm tơl tơngai”.

Càr Gia Lai tŭ do geh rơlao 723 rơbô lồ ù geh ai nàng tam brê, tàm hơ̆ geh 152 rơbô 470 lồ brê tam. Khà kơl dìng brê geh 47%. Ồng Nguyễn Văn Hoan, Phó Kwang atbồ Sở Broă lơh sa mờ Bơtàu tơnguh Ƀòn lơgar càr Gia Lai pà git, lơh jăt Jơnau lơh nền sồ 06 nam 2017 bơh Tỉñ ủy càr Gia Lai dê bè bơtàu tơnguh brê kơl jăp mờ gơdờp mờ tam gơl trồ tiah tơngai bơh nam 2021 tus 2030, tus tŭ do càr neh tam geh rơlao 16 rơbô 721 lồ brê. “Bol añ ai bơta pràn gùt mpồl bơtiàn là bơta tờm kwơ màng nàng lơh geh ală jơnau kờñ tàm jơnau lơh nền dê. Bol añ hòi jà bơta pràn tàm làng bol, ngui cau lơh broă mờ ù tiah geh tơn, tam gơl bơh broă lơh sa suơn sre nàng tam brê kơl jăp, nàng geh uă priă ai làng bol in. Ală anih lơh broă tờm geh jào khà mùl màl nàng bơtàu tơnguh lơh sa brê mờ geh cồng nha uă”.

Kơnờm mờ broă ai geh gùng dà broă lơh di pal gơwèt mờ broă bơtàu tơnguh brê, làng bol jơi bơtiàn ờ gal cau kis tàm càr Gia Lai neh mờ gam đềt mềr mờ brê, pơgồp bal tàm broă sền gàr tiah kis niam mờ dong kờl rài kis ngai sơlơ kơl jăp, tơl ngui tơl sa rơlao.