Tềng hơđơm mƀur tờm chi tàm ƀlàng hìu bơsram kấp 2 Tô Vĩnh Diện, thị xã Buôn Hồ, càr Dăk Lăk, dùl mpồl kơnòm bơsram nggui jơh nùs ngan sền sră kềng gah rơndeh dờng dà rơmĭt mờ mat sơnđan “Hìu sền sră nam pa”. Bulah tàm trồ tơngai duh tơr ồl ngan, săp dam dre nrau, halà ală jơnau ntas hô hơng ngan bơh uă broă lơh nhơl ñŏ gùt dar gam geh bơyai lơh, ală kơnòm dềt kung gam jơh nùs ngan sền tơl pang sră.

Pa sền jơh pang sră nrĭ “Em cứ sống một cuộc đời của cỏ”, oh H’Sơ Mi Mlô, kơnòm bơsram ơdŭ 7A3 ai tơn dùl nơm pang sră cih ală jơnau kơlôi sơnơng bơh he dê bè pang sră he sền den hơ̆ sồng cèng tus tiah cau drơng broă mờ tong wơl nàng dờp geh phan pà. Oh H’Sơ Mi Mlô đơs, oh gơlơh gŏ rơndeh sền sră ntrờn làm bă tiah bè do gơ kờñ ngan, tàm hơ̆ geh uă ngan bơta sră mờ geh bal phan nhơl gơ kờñ ngan. Oh H’Sơ Mi Mlô đơs: “Oh kờñ ngan hìu sră bè do tài bơh geh uă ngan sră nàng sền mờ geh uă bơta nàng sền gĭt, nàng bơsram tai. Oh tus tàm do sền jơnau cih, sền bal uă bơta sră geh kwơ ai broă bơsram sră in kung bè lơh rài bồ tơngoh mờ lơh chờ hờp wơl nùs nhơm”.

Ờ mìng geh pà sră mờ sền sră, ală kơnòm bơsram gam geh dờp ală bơnah phan pà geh kwơ ngan mờ sền gĭt uă broă lơh geh kwơ bè nhơl kờ vua, wăc sềr rùp, mòn tò he, lơh pang sră bơh sră carton... Bi Phạm Khánh My, ơm tàm ƀòn dờng Buôn Ma Thuột, càr Dăk Lăk, drơng broă tàm rơndeh “Hìu sră nam pa” đơs: mờ kơ̆p kờñ lơh geh ală bơta sền gĭt gơ kờñ ngan nàng kơnòm dềt tàm ală ù tiah kal ke, tiah sar lơgar ngài tàm tiah Tây Nguyên in geh tus bal mờ sền sră uă rlau tai, bơh nam 2020 Kông ty Mpồl bơtiàn Bồ Công Anh (ơm tàm ƀòn dờng Buôn Ma Thuột) pơgồp bal mờ ală cau geh nùs nhơm niam lam lơh rơndăp broă lơh mpồl bơtiàn mờ mat sơnđan “Hìu sră rê tàm ƀòn”. Tơnơ̆ rlau 2 nam, “Hìu sră do” hời rơ hời gơ gơs “niam rlau tai” tŭ geh rơndeh kong goa dềt geh bơka niam ngan, pơndiang tơl bơta sră, phan pà, phan nhơl lòt tus gùt ală ƀòn lơgar, hìu bơsram tiah sar lơgar ngài tàm ală càr Dăk Lăk,  Gia Lai, Kon Tum, Dăk Nông. Bơh do, “Hìu sră rê tàm ƀòn” tam gơl mat sơnđan pa là “Hìu sră nam pa”.

Kung jat bi Phạm Khánh My, tus tŭ do “Hìu sră nam pa” neh drơng pơgap 50 Hìu bơsram tàm ală tiah, dong rlau 15 rơbô nă kơnòm dềt geh sền sră mờ sền gĭt ală broă lơh. Bal mờ hơ̆, mpồl đơng lam neh jàu pà rlau 12 rơbô nơm pang sră ai ală tùh sră ơn tàm ală cơdŭ bơsram tàm tơl hìu bơsram geh lam lơh broă lơh dê. Bi Phạm Khánh My, pà gĭt: “Nàng ală kơnòm dềt in sền sră sùm tàm rơndeh sùm rcang ală bơnah phan pà nàng pơn jờng sền sră. Tŭ ală kơnòm dềt neh sền jơh cih wơl jơnau kờñ he dê nàng gĭt là ală kơnòm dềt geh sền sră halà ờ, he ai wơl sră hơ̆ mờ pà wơl phan pà ai ală kơnòm dềt in, digơlan là sră cih, gai cih halà khat dùl bơta lơi tàm rơndeh dê, geh bal sră he dê kung gơtùi pà tơn sơl”.

 Tàm càr Dăk Lăk, nàng lơh gơrề uă mờ sơlơ geh uă bơta niam chài sền sră, bơh nam 2017, Ủy ƀan Ñân zân càr neh ai lơh jat broă rơndăp lơh, lam lơh rơndăp broă “Bơtàu tơnguh niam chài sền sră tàm mpồl bơtiàn tus nam 2020, pơlam gùng dà tus nam 2030 tàm ù tiah càr Dăk Lăk dê”. Jơnau kờñ ai geh là tus nam 2030, lơh geh ală bơta nàng làng bol in geh bơta mờng kwèng sền sră mờ bơta chài tus bal, ngui jơnau yal tơngĭt, bơta gĭt wă tàm tiah ơm kis, bơsram sră, broă lơh. Rơndăp broă lơh do neh geh càr sền gròi lam lơh mờ ală broă lơh, dơ̆ pơrlòng duh hồl mờ geh ngan. Pah nam, Ngai sră mờ niam chài sền sră geh lam lơh mờ tơngume li la uă ngan. Ồng Ngô Trung Vinh, Kwang atbồ Cơldŭ lơh broă Văn hoá Thông tin kơnhoàl Krông Búk, càr Dăk Lăk pà gĭt, broă lơh bơh kơnhoàl dê: “Pơgồp bal mờ ală anih lơh broă, mpồl lơh broă, kwơ màng là ală hìu bơsram bơyai lơh Ngai sră mờ niam chài sền sră tàm mpồl lơh broă; lam lơh uă broă lơh jat tàm ală bơta geh ngan, digơlan là rơndăp sră, ai ală kơnòm dềt in sền gĭt sền sră rao den geh ală broă lơh ndai geh kwơ wèt tus mờ ală kơnòm bơsram, bơto bơtê ală kơnòm dềt in bè bơhiàn yau, bơta niam chài kung bè niam chài sền sră”.

 Jat ồng Trương Hoài Anh, Kwang atbồ Sở Thông tin mờ Truyền thông càr Dăk Lăk, mờ bơta lòt bal bơh ală anih lơh broă, mpồl lơh broă, mpồl lơh sa kă bro, Ngai sră mờ niam chài sền sră pah nam geh tai uă sră nàng jun tus tàm ală hìu bơsram, hìu sră tàm ală tiah sar lơgar ngài tàm càr in, pơgồp bơnah lơh jơh nùs tàm bơtàu tơnguh niam chài sền sră tàm ală thôn, ƀòn. Bal mờ broă lơh sền sră bè ờs, broă ngui tam gơl sồ, lơh sồ tàm bơtàu tơnguh niam chài sền sră rơ̆p sơlơ lơh gơrề uă rlau tai tàm làng bol, ngan là kơnòm dềt mờ kơnòm bơsram. Ồng Trương Hoài Anh, đơs: “Tàm tơngai lơh sa mờ măi mok 4.0 den kơ̆p kờñ là tơl nă cau lơh jat bal uă rlau tai, ờ mìng tàm sră bè ờs mờ ală gah yal tơngĭt jơnau, ală bơta sră nàng bơta gĭt wă rơ̆p geh lơh gơrề uă tàm rài kis mpồl bơtiàn, gơ gơs dùl mpồl bơtiàn bơsram sră. Nàng lơh jat sùm broă do den càr, kơnhoàl, xã mờ jơh ală kấp gơnoar atbồ bơh Dà lơgar tus ală tiah ndrờm tus bal lam lơh, lơh gơrề uă gơ mut tàm bơta geh ngan ai broă sền sră in gơ gơs broă lơh sùm pah ngai tàm rài kis mpồl bơtiàn dê”.

Mờ ală hìu sră bơh càr tus ƀòn lơgar, tùh sră adat boh lam, tùh sră Bưu điện- niam chài xã, tùh sră pôs đồng ling sền gàr tiah nhàr lơgar, bal mờ ală hìu sră trờn làm bă tiah geh jun tus tàm tơl thôn ƀòn, hìu bơsram tàm càr Dăk Lăk dê, neh hời rơ hời lơh geh cồng nha, drơng jơnau kờñ sền sră bơh làng bol dê, ngan là kơnòm dềt, kơnòm bơsram tàm tiah sar lơgar ngài, tiah nhàr lơgar, tiah kal ke uă ngan. Bơh hơ̆ pơgồp bơnah lơh niam chài sền sră ngai sơlơ geh lơh gơrề uă.