Jòi sơltìl phan tam phan ròng nàng tơnguh uă priă lơh geh, rlau 4 nam lài, đảng viên kơnòm să Ly Seo Lử ơm tàm thôn tiah nhàr lơgar Lũng Pô, xã A Mú Sung, kơnhoàl Bát Xát neh blơi 100 sơltìl tờm pơ ò tượng rê tam tàm suơn ù dòr bơh hìu bơnhă dê. Bi kung hòi jà làng bol tàm thôn tam bal nàng lơh geh tiah phan bơna kă bro. Bi Lý Seo Lử, thôn Lũng Pô, xã A Mú Sung, kơnhoàl Bát Xát đơs: Tam tờm prìt den sùm gơtìp tu kòp aniai, bùm blàng tam uă nam den lơh klàr ù den añ tam gơl tam tờm chi sa plai, hơ̆ là tàm do añ tam tờm pơ ò. Bơh sơn rờp tờm chi gam dềt an pal sơng ka sền gàr, mơya bơh nam dơ̆ 3 tờm pơ ò neh ai cồng nha uă ngan.

Ồng Ma Seo Lằng, Ƀí thư Ci ƀộ thôn Lũng Pô, xã A Mú Sung pà gĭt, kờp jơh bă ù tam pơ ò tàm thôn dê là 4 lồ. Tàm hơ̆ geh uă bă ù sơnđờm gơ ai plai nam dơ̆ 1, dơ̆ 2, mờ pơ ò geh là tờm chi tam tờm ngan nàng bơtàu tơnguh lơh sa thôn dê. Ồng Ma Seo Lằng, đơs: Geh bơta sền gròi bơh xã dê geh ai tờm pơ ò Lũng Pô tơmŭt tàm OCOP bơh xã A Mú Sung dê. Añ sền gŏ do là dùl tờm chi tam tơn jơh jơgloh tơrmù rƀah kơ̆ kơljap tàm thôn Lũng Pô dê.

Bal mờ bơta kơ̆p kờñ lơh geh ală broă lơh bơtàu tơnguh mhar tàm broă bơtàu tơnguh lơh sa tàm tiah do dê, 2 nam lài, bi Chảo Láo Tả, Phó Củ tịc Mpồl cau lơh broă sa xã Dền Sáng là 1 tàm 10 hìu bơnhă lam lài tus bal rơndap broă lơh tam tờm plai màk. Tus tŭ do, rơng tờm plai màk dong hìu bơnhă bi Tả in geh tai priă jền. Bi Chảo Láo Tả, đơs: Lam lài mờ tam tơrlòng lài 40 tờm plai màk. Bơh sơn rờp ai priă lơh geh mờr 10 tơlak đong. Kung kơ̆p kờñ ngan làng bol tàm xã mờ tàm ală xã ndai dilah geh ală bơta trồ tiah gơ dờp den tờm do geh là dùl tờm chi tam tờm nàng tơn jơh jơ gloh tơrmù rƀah, bơtàu tơnguh kơ̆ kơljap.

Bi Tẩn Láo Tả, ơm tàm thôn Nậm Giàng, xã Dền Sáng, kơnhoàl Bát Xát kung kờñ bơsram broă lơh do nàng kàl tam pa lơh tơnguh khà tờm plai màk, tơnguh priă lơh geh hìu bơnhă in. Bi Tẩn Láo Tả, đơs: Hìu bơnhă añ den dơ̆ hơ̆ kung blơi tam sơl mơya tam dùl ết ngan. Dơ̆ do kung kờñ tus sền ală hìu bơnhă tam uă den bơta hòn gơs bơh tờm do dê mbè lơi, den hơ̆ sồng là añ kung kơ̆p kờñ rê tàm hìu bơnhă añ tam tai bơh 300 tus 400 tờm tai nàng lơh geh uă tai priă jền ai hìu bơnhă in.

          Tàm kơnhoàl Bát Xát, bơdìh mờ broă lơh gơ kờñ ai srơh bơt bơtàu lơh sa, tơn jơh jơ gloh, tơrmù rƀah, ală đảng viên sùm lơh krơh lam lài tàm broă mblàng yal, hòi jà, tă pơgồp bal dong kờl nàng bơt bơtàu ƀòn lơgar pa. Bè dong kờl hìu bơnhă rƀah lơh hìu đam, broă lơh hìu jă brê halà dong thôn lơh gùng lòt... Ƀí thư Đảng ủy xã Trịnh Tường, ồng Lầu A Páo neh mờ gam tă pơgồp bơnah ai srơh bơt bơtàu ƀòn lơgar pa tàm tiah do geh bơta bơtàu tơnguh mhar loh làng. Bi Tẩn Lở Mẩy ơm tàm thôn Nà Đoong, yal: Hìu ơm yau oh dê tàm hơđang đah ne gơ neh sèt mìu ñhăt jơh lơm. Geh pi Páo tus sền gŏ hìu ơm oh dê ờ diơng ngan den dan oh in lơh hìu ơm dềt. Oh chờ hờp ngan.

Ồng Giàng A Sáo mờ bi Tẩn Lở Mẩy, ơm tàm thôn Nà Đoong mìng là 2 tàm ală khà hìu bơnhă rƀah tàm xã Trịnh Tường dê geh dong kờl lơh hìu ơm pa. Mờ nàng lơh geh bơta hơ̆, Ƀí thư Đảng ủy xã ồng Lầu A Páo geh uă ngan bơta tă pơgồp. Bi Lầu A Páo đơs: Añ bal mờ ală kwang bàng xã lòt kờp sền tơn nền nòn ală hìu bơnhă rƀah nàng geh rùp hin, să jan ngan ngồn bè rài kis bơh làng bol kòn cau dê, bơh hơ̆ kơnờm bơta dong kờl, tă pơgồp bal bơh ală mpồl cau, mpồl lơh sa kă bro dong lơh niam hìu ơm ai làng bol in.

Gĭt ală bơta lơh sa bơh uă làng bol tàm xã dê ờ hoan geh ngan, broă bơ̆t dùl nơm hìu kơ̆ kơljap nàng ơm, halà lơh geh dùl gơl gùng lòt rê ƀuơn ƀoài ngan là ờ gŏ ƀuơn dùl ết lơi. Ƀí thư Đảng ủy xã Lầu A Páo neh lơh krơh lài, lam lài tă pơgồp bal, hòi jà ală mpồl lơh sa kă bro dong kờl bơt bơtàu ƀòn lơgar pa. Bi Lý Xá Xe, Phó Kwang atbồ Ban Tuyên vận xã Trịnh Tường, kơnhoàl Bát Xát đơs: Gơwèt mờ ală hìu bơnhă kal ke bè lơh sa, den ồng Páo neh hòi jà cau geh nùs nhơm niam, anih lơh broă, mpồl lơh broă, mpồl lơh sa kă bro tàm ù tiah do dê mờ bơdìh mờ xã dong kờl ală hìu bơnhă làng bol bơ̆t hìu ơm niam, lơh tơl broă jàu ƀòn lơgar pa.

Lơh jat gơnoar broă lam lài lơh lài, ală đảng viên bơh Đảng ƀộ Bát Xát dê ngan ngồn là ală cau lơh “gơ kờñ” sơlơ tơnguh lơh jat broă tam gơl rơndap tap sèng lơh sa tàm tiah do dê. 4 rơbô 440 nă đảng viên tàm jơh gùt Đảng ƀộ geh là mpồl cau tờm nàng lơh jat ală jơnau kờñ dờng bơh kơnhoàl dê tàm nam 2022 mờ ai jơh gùt tơngai lơh broă dê.