Tŭ do, tiah làng bol kòn cau mờ tiah kơh bơnơm neh mờ gam là “tiah rơƀah tờm gùt lơgar dê”. Mùl màl, priă geh tơl hìu làng bol kòn cau tàm uă tiah mìng ndrờm bơh 40 tus 50% mờ priă geh bal tàm tiah hơ̆ dê; khà kờp làng bol kòn cau geh 14,7%, mơya khà hìu rơƀah geh mờr 60% tàm bơta kờp jơh hìu rơƀah gùt lơgar dê. Mờ jơnau kờñ “Tơmù rơhời bơta ờ ndrờm bal rài kis, priă geh bơh tiah làng bol kòn cau mờ tiah kơh bơnơm pơn drờm mờ bơta geh bal gùt lơgar dê; tus nam 2025 gơmù 50% khà xã, ƀòn kal ke; tus nam 2030 ờ gam geh xã, ƀòn kal ke tai”, Quốk hội neh kĭ kờp jơh khà priă rơlao 137 rơbô tơmàn đong nàng lơh jăt broă lơh jơnau kờñ dà lơgar tơnguh bơtàu lơh sa mpồl bơtiàn tiah làng bol kòn cau mờ tiah kơh bơnơm tơngai bơh nam 2021 tus 2030, mờ 10 rơndăp broă lơh bơnah, 14 rơndăp broă dềt mờ 36 tơngu me bơcri priă, dong kờl mùl màl tàm tơngai sơnrờp bơh tŭ do tus jơh nam 2025.

Bơta pa tàm broă bơyai lơh sa bơh broă lơh do là tam gơl tài dong kờl tơn, dong kờl geh broă lơh ai làng bol in, broă tơrgùm kơlôi sơnơng mờ lơh geh uă ală broă tơnguh bơtàu lơh sa jăt mpồl bơta kwơ, crơng gơs tiah lơh gơs phan nàng lơh geh bơta kwơ jăt broă tam gơl phan tam, phan ròng geh cồng nha, ai broă lơh, tơnguh uă priă geh ai hìu làng bol in, tơmù rơƀah kơl jăp. Mờ lơh pràn nùs nhơm mŭt lơh broă tàm tiah làng bol kòn cau ai bơh bơta geh, bơta pràn mờ phan neh geh lài tàm ƀòn lơgar. Jăt Tiến sĩ Hà Việt Quân đơs, Mpồl bơ̆t bơtàu rơndăp broă tơrgùm bal mờ broă lơh jăt jơnau kờñ dà lơgar tơnguh bơtàu lơh sa mpồl bơtiàn tiah làng bol kòn cau mờ tiah kơh bơnơm tơngai bơh nam 2021 tus 2030: “Gơtùi đơs là dơ̆ sơnrờp bơh lài tus tŭ do gah lơh broă kòn cau neh sền Đảng mờ Dà lơgar lơh ngan ai bơta pràn bơcri priă tus tàm tiah do, nàng ai geh broă tam gơl tơrgùm bal. Bè hơ̆, bơta lơi kwơ màng ngan tàm broă ngui bơta pràn do, gơrềng tus mờ jơnau pal tam gơl broă lơh tàm broă tơnguh bơtàu lơh sa mpồl bơtiàn tiah làng bol kòn cau, hơ̆ là dơ̆ sơnrờp he sền tiah do là tiah lơh broă bal tơnguh bơtàu nàng geh broă bơcri priă, ờ gŏ di mìng geh tàm broă dong kờl bè tơngai lài tai”.

Mờ jơnau kờñ tơnguh uă bơta niam bal mờ tam gơl broă lơh, broă lơh do kung ai tơngu me tơnguh bơtàu bơto bơtê lơh broă mờ ai broă lơh cau lơh broă tàm tiah làng bol kòn cau mờ tiah kơh bơnơm in nàng gàr kơl jăp mờ tơnguh bơtàu broă bơto bơtê, tơnguh bơtàu bơta chài rơgơi mờ tơnguh bơtàu broă lơh sơnơm tàm tiah làng bol kòn cau mờ tiah kơh bơnơm, tàm hơ̆ tơrgùm tàm ală tơngu me bè: Tơnguh uă jơnau git wă, kơnòl bè broă bơsram sră, pơn jăt tai geh sùm mờ tơnguh uă cồng nha broă bơto sră; dong kờl phan bơna, phan chài rơgơi ai tiah làng bol kòn cau mờ tiah kơh bơnơm in nàng tơnguh uă bơta kờñ bè bơta chài rơgơi ai làng bol in, pơgồp bal mờ broă tơnguh bơtàu nhơl chờ mpồl bơtiàn... Ồng Vũ Dương Châu, lài do là Kwang atbồ Ƀan Zân tộk, Ủy ƀan Mặt trận Dà lơgar Việt Nam, đơs: “He pal tơrgùm bơsong ală jơnau ờ sŭk, kal ke uă bơh làng bol tŭ do dê, neh jŏ nam, tàm ờ uă jơi bơtiàn kòn cau mơ, bè khà cau ngir jào ma tuý, cau bao gờñ, bao rềp jơi nòi bal, tàm hơ̆ uă ngan là tơmù khà hìu rơƀah, bơ̆t bơtàu phan bơna, tiah tờm tàm xã, lam lơh lài nàng ală tiah ndai đờm jăt bal, tàm hơ̆ uă ngan là pal ai rơndăp ù tiah lơh ƀòn ơm kis tơrgùm bal geh bơh 40 hìu rơlao hờ đang, nàng pleh mờ tơrlah ù, dà cò. Dơ̆ pe là tă priă dong kờl ală làng bol kòn cau tơnguh bơtàu lơh sa lơh gơs phan kă bro, lơh pràn broă bơto broă lơh, ai broă lơh ờ di broă lơh sa suơn sre, lam sồr ală mpồl lơh sa kă bro tus bal, tam gơl pa broă atbồ, sền gàr brê. Gơwèt mờ broă bơto bơtê den he pơn jăt tai geh broă tơnguh bơtàu broă bơto bơtê, tơnguh uă bơta ngăc ngar làng bol, ai geh bơta pràn cau lơh broă, gàr niam ai rài lơh sa 4.0, nàng làng bol geh tus bal mờ rài lơh sa 4.0 do”.

Tus tŭ do, bơta pràn bơh broă lơh neh geh tam pà. Ală kấp ală gah lơh broă, ală càr, ƀòn dờng pal dùl nùs bal, lơh mhar broă lơh jăt ală tơngu me, broă lơh bơh broă lơh do dê, tàm hơ̆ tơrlòng lơh mờ lơh pràn ală broă tơnguh bơtàu lơh sa geh cồng nha; gờñ lơh gơs mờ ai ală broă lơh nàng ngui lơh broă, ai tơl bơta niam nàng lơh tam gơl nùs nhơm git wă, tơnguh uă bơta niam rài kis, tơnguh uă priă geh ai làng bol in bơh tàm nam sơnrờp lơh jăt broă do tơn. Jơnau đơs bơh ồng Trần Đức Anh, Ƀí thư Đảng ủy xã Hương Liên, kơnhoàl Hương Khê, càr Hà Tĩnh: “Tơngai do, lơh jăt rơndăp broă prăp gàr kòn cau Cư̆t, rài kis làng bol kung neh tam gơl uă, bŭ lah bè hơ̆, tàm tơngai tus, Đảng ủy, gơnoar atbồ kung kơ̆p kờñ càr, Dà lơgar gờñ geh kơrnoăt jào ù brê ai làng bol kòn cau in nàng làng bol geh ù lơh sa”.

Bơdìh mờ broă lơh niam ală phan bơna geh kwơ, den broă tơnguh bơtàu lơh sa mpồl bơtiàn tàm ală tiah geh làng bol kòn cau pal geh sền gròi, lơh pràn broă bơyai lơh gơs phan kă bro jăt bơta kwơ, drơng gàr rài kis nùs nhơm làng bol lòt bal mờ broă dong kờl mŭt lơh broă, mŭt kă bro nàng làng bol brồ guh lơh pas. Là nam sơnrờp lơh jăt broă lơh jăt jơnau kờñ dà lơgar dê, broă brồ guh wơl broă tơnguh bơtàu lơh sa tơnơ̆ mờ kòp Kovid-19... kơ̆p kờñ do geh sền là broă lơh geh pơgồp bal tàm broă lơh pràn broă tơnguh bơtàu lơh sa mờ gàr niam rài kis lơh broă sa mpồl bơtiàn.