Hìu bơnhă mò H’Sắk, ơm tàm ƀòn Mơ Nú, xã Chư Á, ƀòn dờng Pleiku, geh 7 nă kòn, kis tàm hìu kấp 4 neh geh lơh bơh jŏ ngan. Bơklau mò H’ Sắk dê neh chơ̆t tài bơh kòp kơn jơ̆, să tờm mò pal ròng siam tai oh gah bơklau dê gơtìp kuĕt kơl te bơh tàm kơndul mè den rài kis kal ke ngan, priă lơh geh uă ngan kơnờm tàm broă lòt lơh apah. Nàng dong hìu bơnhă mò H’Sắk in brồ guh “Rơndăp broă lơh lơh li la broă lơh broă sa, bơtàu tơnguh broă lơh tơrmù rƀah” neh dong kờl 1 nơm kơnrồ me. Mò H'Sắk chờ hờp ngan tài bơh 2 nam ròng siam, mò neh gŏ geh cồng nha: “Ưn ngài gơnoar atbồ neh sền gròi tus ală hìu bơnhă kal ke bè bol añ, kơnờm geh bơta dong kờl do mờ bol añ geh ală bơta nàng brồ guh tàm rài kis, añ ưn ngài uă ngan”.

Jat mò Nguyễn Thu Hương, Phó Củ tịc Anih duh broă làng bol xã Chư Á yal, bơdìh mờ ròng uă gơ gơs mpồl bơh kơnrồ me sơntìl mờ gơnoar atbồ dê dong kờl, broă lơh tơrmù rƀah tàm tiah do dê gam lơh jat geh cồng nha bơh broă ai càn priă ờ sa priă cồng uă, tam gơl broă lơh. 3 nam do, xã neh pà 42 nơm kơnrồ me ai hìu bơnhă rƀah in, dong kờl priă jền tam gơl broă lơh ai 10 hìu bơnhă mờ ai 8 hìu bơnhă in càn priă ờ sa priă cồng uă... Mò Nguyễn Thị Thu Hương pà gĭt: “Pah nam xã sùm ai lơh lài ală broă lơh, rơndăp broă lơh, broă lơh drơng broă lơh sa bơh ƀòn dờng Pleiku mờ xã dê dong kờl tus ală hìu bơnhă rƀah, hìu bơnhă pa lik klàs rƀah bè sơnơm, bơto bơtê, hìu ơm, càn priă ờ sră priă cồng uă, bơto broă lơh geh cồng nha, bơh hơ̆ pơgồp bơnah bơtàu tơnguh rài kis, tơnguh bơta chài gĭt mờ ală broă drơng mpồl bơtiàn, ngan là tus mờ hìu bơnhă rƀah mờ hìu bơnhă pa lik klàs rƀah”.

Ngan ngồn pà gŏ, tơl hìu bơnhă rƀah tàm ƀòn dờng Pleiku, càr Gia Lai geh rài kis mờ jơnau kờñ geh dong kờl krơi is. Bè mò Trần Thị Phượng, 50 sơnam, ơm tàm thôn 4, xã Trà Đa, ƀòn dờng Pleiku, tơnơ̆ tŭ jơh ngan priă jền tài bơh ală bơnah càn priă sơm kòp ai bơklau in gơtìp kòp ung thư, sơlơ kờñ ngan geh bơta dong kờl. Mờ bơta geh ngan, bơh gơnoar atbồ xã, mpồl cau ùr, ală cau geh nùs nhơm niam... neh tàm sơm bat tê bal, dong kờl mò sơr lèt gan kal ke. Mò Phượng kah wơl bè ờs ngan ală phan dong kờl kwơ màng hơ̆, bơh tơl dơ̆ sa piang tus geh lơh dùl bơm hìu ơm. Mò Phượng đơs:“Tŭ kal ke ngan rlau jơh gơnoar atbồ tiah do neh dong kờl hìu bơnhă añ in geh 1 nơm hìu ơm, ală mpồl, gah broă dong kờl ai oh kòn añ in geh ală dơ̆ sa sào pah ngai tŭ kal ke ngan hơ̆. Tŭ do ală oh kòn lơh ngan bơsram sră nàng lik klàs rƀah. Dơ̆ mờ bơklau añ kòp kơn jơ̆ den xã Trà Đa mờ Mpồl cau ùr dong añ 5 tơlak đong priă apah cau pĭc kơphê tài bơh tŭ hơ̆ añ ơm tàm hìu sơnơm den pal apah cau pĭc, dùl ết tŭ jơgloh drờm mờ dùl kơldung tŭ hờm, añ ngoh rơngăc ngan”.

Lơh jat Broă lơh sồ 31 ngai 03/11/2021 bơh Mpồl duh broă Đảng ƀộ ƀòn dờng Pleiku khoă XII dê “Bè pơn jat tai lơh pràn broă lơh tơrmù rƀah kơ̆ kơl jăp, tơnguh uă bơta niam rài kis làng bol, ngan là tàm ală tiah làng bol jơi bơtiàn dồ ết nă cau tàm ù tiah do dê”, bơh nam 2021 tus tŭ do, ƀòn dờng pơgồp bal mờ ală anih lơh broă, mpồl lơh broă, Anih duh broă làng bol ală xã, sơnah ƀòn hòi jà tă pơgồp bal bơh ală mpồl lơh sa kă bro, cau dồ nă să, cau geh nùs nhơm niam, kes priă “Tài cau rƀah ƀòn dờng dê” mờ bơh xã dê dong kờl 95 hìu bơnhă geh lơh hìu ơm pa mờ lơh niam wơl hìu ơm mờ kờp jơh khà priă 4 tơmàn 700 tơlak đong; dong kờl kòn sơntìl, phan sơntìl, phơng sih, priă lơh sa 1 tơmàn 2 tơlak đong; dong 252 hìu bơnhă rƀah, hìu bơnhă pa lik klàs rƀah, ai hìu bơnhă pa lik klàs rƀah in càn priă ờ sa priă cồng uă rlau 13 tơmàn 800 tơlak đong... Ồng Trần Tấn Quang, Kwang atbồ Cơldŭ Lơh sa ƀòn dờng Pleiku dê, pà gĭt, khà hìu bơnhă rƀah tàm ƀòn dờng geh 0,24%, mờ rlau 149 hìu bơnhă rƀah. Ƀòn dờng gam pơn jat tai kơlôi sơnơng, lam lơh tai uă broă lơh drơng rài kis làng bol in di pal nàng tơnguh uă cồng nha bơh broă lơh do dê. Ồng Trần Tấn Quang, đơs:  “Mờ gơnoar broă là mpồl lơh broă tơn lam lơh ală jơnau sồr bơh ƀòn dờng dê bè dong kờl drơng rài kis broă lơh sa ai cau rƀah in, mpồl lơh broă neh lơh ngan ngồn ală broă lơh dong kờl drơng rài kis broă lơh sa, rcang ală phan bơna lơh sa nàng di pal mờ rài kis hời rơ hời lik klàs rƀah mờ lik klàs rƀah kơ̆ kơl jăp. Cơldŭ lơh broă Lơh sa ƀòn dờng rơ̆p pơn jat tai bal mờ Anih duh broă làng bol ală xã, sơnah ƀòn mờ Anih tờm drơng broă lơh sa kơlôi sơnơng, lam lơh uă broă lơh drơng rài kis lơh broă sa lơh li la uă, di pal mờ bơta geh ngan rài kis mờ lơh sa bơh làng bol dê, pơgồp bơnah tơnguh uă cồng nha jơnau kờñ tơrmù rƀah kơ̆ kơl jăp tàm ù tiah ƀòn dờng dê tàm tơngai tus”.

Broă lơh tơrmù rƀah geh ƀòn dờng Pleiku, càr Gia Lai lơh jat sùm tàm uă nam do. Tàm tơngai bơtàu tơnguh pa broă lơh do ngai sơlơ geh pơlam gùng dà loh làng bơh broă lơh lài bơsong ală broă bè làng bol ơm kis, hìu ơm mờ bơta niam rài kis dê. Bơh hơ̆, tơnguh uă bơta ƀuơn bơta pràn, bơta gơn kơnờm bơtàu tơnguh bơh ƀòn dờng dê, lơh pràn bơtàu tơnguh tiah drà, lơh sa- mpồl bơtiàn ƀòn dờng kơ̆ kơl jăp, pơgồp bal mờ sền gàr tiah ơm kis ƀòn brê bơnơm.