Tàm hìu ơm “Tam klăc ling klàng làng bol” pa geh lơh pà ồng Y Huê Êƀan ơm tàm ƀòn Niêng 1, xã Ea Nuôl, kơnhoàl Buôn Đôn in chờ hờp đơs, bơh ngai geh hìu ơm pa dờng niam, hìu bơnhă ờ gam kơlôi tai broă jơm tơngai, đơ dà mìu ñhăt tai. Pràn kơl dang să jan bơh ồng dê kung geh pràn rlau, lơh geh uă broă, hìu bơnhă geh tai priă jền. Ồng ưn ngài ngan ală bi mpồl ling neh lơh hìu pà hìu bơnhă ồng in. Ồng Y Huê Êban đơs:“Lài do hìu ơm trồ mìu den ñhăt lơm, trồ tơngai den duh, tŭ do, geh tiah do sền gròi dong kờl lơh hìu ơm dờng niam den añ chờ hờp ngan. Añ rơ̆p pơnđơl pràn lơh ngan lơh sa nàng bơtàu tơnguh, bal mờ làng bol tàm ƀòn pơgồp bơnah gàr niam lơngăp lơngai, rơndăp tăp sèng”.

Jat ồng Y Kim Êban, Kwang atbồ ƀòn Niêng 1 yal, mpồl ling mờ ồng Y Huê đơs tus hơ̆ là kwang bàng, cau ling mpồl K864 (Kụk Ling klàng phàu crong, Tổng kụk Măi mok). Do kung là mpồl lơh oh mi bal mờ ƀòn Niêng 1 bơh uă nam do. Broă dong kờl lơh hìu ơm ai hìu bơnhă rƀah in neh lơh geh tai bơta gơn kơnờm nàng ală hìu bơnhă in pơnđơl pràn brồ guh. Ồng Y Kim Êban đơs:“Nùs nhơm ling klàng làng bol khi jơh nùs ngan, tus lùp còp tam pà bal ală mờng chài lơh broă nàng làng bol in bơtàu tơnguh lơh sa. Ƀòn lơgar bol añ hờn chờ mờ brờn brài ngan. Is ồn là ală hìu bơnhă rƀah den khi pơnđơl pràn lơh ngan bơtàu tơnguh lơh sa nàng tơnơ̆ do khà hìu bơnhă rƀah ngai sơlơ gơmù”.

Là mpồl ling lơh oh mi bal mờ ƀòn M’riu, xã Cư Huê, kơnhoàl Ea Kar, càr Dăk Lăk, 20 nam do, Kông ty Ồs đèng Dăk Lăk neh pơgồp bơnah ờ dồ ết tàm broă tam gơl pa muh mat ƀòn lơgar tàm tiah do dê. Bơh dùl ƀòn jơgloh rƀah, pal dờp dong kờl phe tàm kàl puh pah, den tŭ do, khà hìu bơnhă rƀah mìng gam 10%. Uă hìu bơnhă tàm ƀòn neh lơh hìu, blơi rơndeh kông nông, măi ƀồm dà drơng broă lơh sa. Jat ồng Trần Văn Thuận, Kwang atbồ Kông ty Ồs đèng Dăk Lăk, jat tàm broă rơndăp lơh lơh oh mi bal pah nam, Đảng ủy Kông ty neh jàu kơnòl broă gơwèt mờ tơl ƀan, ngàñ, mpồl cau, Ci ƀộ pơgồp bal mờ ală mpồl ling lơh oh mi bal nàng lam lơh jat geh cồng nha broă lơh do. Ồng Trần Văn Thuận, đơs:“Jat broă lơh lơh oh mi bal den mpồl ling neh geh ală broă lơh lơh broă pah nam dong kờl gàr niam rài kis mpồl bơtiàn mờ sền gròi tus ală hìu bơnhă geh dà kơl hề mờ Dà lơgar, hìu bơnhă kal ke nàng dong ală hìu bơnhă bơtàu tơnguh lơh sa. Gơwèt mờ ƀòn M’riu den ală bơta kal ke tŭ do mpồl ling neh gĭt loh mờ ai ală broă lơh dong kờl geh ngan mờ làng bol kung bè broă bơt bơtàu ƀòn niam chài”.

Lơh jat gùng dà broă lơh bơh Tỉñ ủy càr Dăk Lăk dê bè broă lơh lơh oh mi bal mờ ală thôn, ƀòn jơi bơtiàn dồ ết nă cau, tus tŭ do, càr Dăk Lăk geh mờr 200 anih lơh broă, mpồl lơh broă, mpồl lơh sa kă bro kấp càr lơh oh mi bal mờ ală thôn, ƀòn. Ồng Nguyễn Đình Trung, Kwang bàng Đảng Dà lơgar, Ƀí thư Tỉñ ủy càr Dăk Lăk pà gĭt, mờ bơta dong kờl, dong kờl geh ngan bơh ală mpồl ling lơh oh mi bal, rài kis phan bơna mờ nùs nhơm bơh làng bol jơi bơtiàn dồ ết nă cau geh lơh oh mi bal neh tam gơl uă ngan. Tàm tơngai tus, Tỉñ ủy càr Dăk Lăk rơ̆p pơn jat tai lơh pràn lơh jat broă lơh lơh oh mi bal mờ ală ƀòn làng bol jơi bơtiàn dồ ết nă cau nàng kờñ pơgồp bơnah tơn jơh jơgloh tơrmù rƀah, bơt bơtàu mpồl tam klăc dờng jơi bơtiàn, pơnđơl pràn lơh ngan bơt bơtàu càr Dăk Lăk ngai sơlơ pas niam- niam jak mờ bơhiàn niam chài. Ồng Nguyễn Đình Trung, đơs:“Ală anih lơh broă mpồl lơh oh mi bal mờ ală thôn, ƀòn gơtùi đơs là lơh jat geh kơnòl ngan, geh ală cồng nha ngan ngồn mờ lơh geh jơnau sồr, jơnau kờñ geh ai. Rài kis bơh làng bol tàm tiah sar lơgar ngài geh ală bơta tam gơl loh làng mờ bơta sơm bat tê bal, bơta tam klăc bal đah ală jơi bơtiàn bal mờ gơ̆p bơt bơtàu càr Dăk Lăk pas niam”.

Gơtùi đơs là, ală broă lơh geh kwơ ngan, pơgồp bal mờ bơta geh ngan tàm ƀòn lơgar, broă lơh lơh oh mi bal thôn, ƀòn tàm càr Dăk Lăk neh cèng wơl cồng nha niam ngan, pơgồp bơnah kwơ màng tàm broă bơtàu tơnguh lơh sa- mpồl bơtiàn, bơt bơtàu kơ̆ ală anih lơh broă cíñ trị ƀòn lơgar, gàr niam lơngăp lơngai cíñ trị, rơndăp tăp sèng lơngap lơngai mpồl bơtiàn mờ sơlơ lơh niam rlau tai nùs nhơm tam klăc bal đah ală jơi bơtiàn dê.