Nhai 7 pa do, tàm càr Bình Định, Mpồl lơh broă bơh Phó Thủ tướng Cíñ phủ ồng Trần Lưu Quang lơh broă tơn mờ pờ tơlik tơn tàm internet mờ 19 càr, ƀòn dờng tiah  tàm gùl đah tô dà lơgar, tiah jăt kềng gah dà lềng tàm gùl lơgar mờ tiah Tây Nguyên bè bơta lơh jăt ală broă lơh jơnau kờñ dà lơgar.

Tơngai bơh nam 2021-2025, Dà lơgar jàu kờp jơh priă bơcri lơh bơtàu tơnguh  rlau 39 rơbô tơmàn đong ai ală tiah gơwèt tiah tàm gùl đah tô dà lơgar, tiah jăt kềng gah dà lềng tàm gùl lơgar mờ Tây Nguyên nàng lơh jăt 3 broă lơh jơnau kờñ dà lơgar. Tŭ do, 17 tàm 19 tiah tàm tiah neh lơh jăt broă ai priă dà lơgar bơh kes priă dà lơgar ală tiah dê nàng lơh ală broă lơh jơnau kờñ dà lơgar. Tàm hơ̆, ƀòn dờng Đà Nẵng neh lơh jăt broă ai priă dà lơgar rlau 93% kes priă dà lơgar ală tiah dê. Ală càr: Nghệ An, Quảng Nam, Bình Định, Khánh Hòa, Lâm Đồng gơwèt mpồl ơm lam lài bè khà ai priă dà lơgar dê rlau 30%.

 Đơs tàm dơ̆ pơrjum, Phó Thủ tướng Cíñ phủ ồng Trần Lưu Quang đơs loh, broă lơh jơnau kờñ dà lơgar wèt tus broă rcang ai làng bol in tàm tiah ƀòn lơgar, tiah làng bol kòn cau dùl ết nă cau mờ hìu bơnhă geh rài kis kal ke in là dùl broă lơh dong kờl niam ngan kòn bơnus dê. Pơndrờm mờ nam 2022, ală Bộ, ngàñ mờ ală tiah neh geh uă bơta tă bơsong bè gùng dà broă lơh. Mơya, tàm bàr pe tiah, broă ai priă dà lơgar dê jơh bal 3 broă lơh jơnau kờñ dà lơgar mìng lơh geh pơgap 8%. Tàm ală bơta kal ke bè bơta tŭ tơngai, kung bè gùng dà broă lơh gam bàr pe bơta kòl yan, Phó Thủ tướng Cíñ phủ ồng Trần Lưu Quang sồr ală tiah pal yờ tơnguh uă rlau tai kơnòl broă, lơh ngan, rcang lài mờ kràñ cê jơh nus rlau tai tàm broă lam lơh ală broă lơh jơnau kờñ dà lơgar dê: “Bè Dà lơgar bol añ kong kơnòl lài ngan mờ rơ̆p pơn jat tai lơh niam wơl, bơto pơlam mhar ngan rlau jơh ală bơta mờ kwang bàng gam gơ kòl. Bè đah ală kwang bàng, añ sồr pal geh kơnòl, lơh ngan rcang lài mờ kràñ cê jơh nùs rlau tai tàm broă lam lơh ală broă lơh, bơta lơi gam gơ kòl lùp dà lơgar mờ lùp ală Bộ, ngàñ. Añ kung sồr ală Bộ, ngàñ, 3 anih lơh broă đơng lam tàm tơrbŏ bal niam rlau tai mờ ală tiah mờ di tŭ iăt kơno ală jơnau đơs gam gơ kòl”.

Jăt Bộ Kế hoạch mờ Đầu tư, tŭ do ală broă lơh jơnau kờñ dà lơgar gam kal ke, kòl yal tàm broă lơh atbồ, lam lơh mờ lơh jăt. Ngan là ală broă lơh geh kĭ, jơnau sồr priă dà lơgar tơnơ̆ tơngai broă rơndăp lơh priă dimơ tơngai Kes priă Dà lơgar tơngai bơh nam 2021-2025 bơh ală tiah dê, den tàng broă ai priă dà lơgar nàng lơh ală broă lơh jăt khà jơnau sồr dê là kal ke ngan geh lơh. Khà priă broă lơh geh jàu tơl nam mờ tam pà jăt bơta broă nền cê lơh ai ală tiah kal ke in tàm broă sền gĭt jơnau kờñ bơh tơngai lơh broă mờ tam pơgơl priă bơh ală tơngume tàm broă lơh dê nàng gơ dờp mờ ală bơta geh ngan. Bộ trưởng, Củ ñiệm Cơldŭ lơh broă Cíñ phủ ồng Trần Văn Sơn pà gĭt: “Pe broă lơh jơnau kờñ dà lơgar, tŭ do Cíñ phủ tơlik mat 26 mpồl tơl nă kwang bàng Cíñ phủ lam bồ tơn lòt lơh broă tàm tơl càr. Pa do, Cíñ phủ ai tơlik Nghị quyết 1 nhai mù lơh broă tơn nàng tă bơsong kal ke. Tài bơh tŭ do lòt tàm ală tiah sền gŏ là kal ke, kòl yan ngan den pal tơrgùm tă bơsong, mờ pal tă bơsong bơh bơta geh ngan ală tiah dê”.

Nàng pơn jăt tai lơh mhar tŭ tơngai ai priă lơh ală broă lơh jơnau kờñ dà lơgar mờ lơh jăt geh cồng nha Nghị quyết sồ 100 bơh Pơrjum dơ̆ 5 bơh Quôk hội khoă XV dê, Thủ tướng Cíñ phủ sồr, ală Bộ, ngàñ ală tiah jăt gơnăp gơnoar, kơnòl broă geh jàu mhar pơgồp bal mờ Bộ Tài cíñ mờ ală Bộ, anih lơh broă cau tờm rơndăp broă lơh bơnah phan nàng yal khà priă broă lơh nam 2024 mờ 2025 ai ală Bộ, anih lơh broă Dà lơgar mờ ală tiah in jăt jơnau sồr tàm Nghị địñ sồ 38 nam 2023 bơh Cíñ phủ dê.

Ủy ƀan Jơi bơtiàn mhar đơng lam, pơgồp bal mờ ală Bộ, anih lơh broă cau tờm rơndăp broă lơh bơnah phan kờp sền jơh ală bơta broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol kòn cau dùl ết nă cau mờ tiah kơh bơnơm tơngai dơ̆ 1; Lơh sră nggal tam gơl tơngume Kơrnoat kĭ Broă lơh jăt di mờ jơnau sồr, jăt rơndăp tăp sèng, sră nggal bơh adat boh lam dê bè bơcri priă dà lơgar; yal mờ Thủ tướng Cíñ phủ in mờ pơyoa bal mờ Bộ Kế hoạc mờ Đầu tư in tàm nhai 8 nam 2023.

Bộ Tài cíñ mhar đơng lam, pơgồp bal mờ ală Bộ, anih lơh broă geh gơrềng lơh sir broă tam gơl, bơtơl ală Thông tư sồr bè priă tă broă lơh lơh ală broă lơh jơnau kờñ dà lơgar dê.