Broă lơh sơnrờp là Ủy ƀan Ñân zân kơnhoàl Ia H’Drai bơyai lơh Dơ̆ yal kơrnoat bơh Ủy ƀan Ñân zân càr Kon Tum dê dờp xã Ia Đal lơh geh jơnau kờñ ƀòn lơgar pa. Do là xã tiah nhàr lơgar dơ̆ 7 tàm kờp jơh 13 xã tiah nhàr lơgar bơh càr Kon Tum lơh sir broă lơh ƀòn lơgar pa. Tàm ală nam pa do Đảng ƀộ, gơnoar atbồ mờ mờr 5 rơbô nă làng bol tiah nhàr lơgar Ia Đal neh sơm bat tê bal, dùl nùs bal lơh jat broă lơh jơnau kờñ Dà lơgar bơt bơtàu ƀòn lơgar pa mờ lơh geh uă cồng nha niam ngan. Bơh uă priă jền xã neh hòi jà tă pơgồp bal geh rlau 49 tơmàn đong bơcri priă lơh bơt bơtàu gàr niam ală broă jàu bè phan bơna bơt bơtàu; priă lơh geh kờp bal tơl nă cau geh rlau 43 tơlak đong dùl nă cau dùl nam; khà hìu bơnhă rƀah, hìu bơnhă ndrờm bè rƀah gơmù gam hơđơm 12%. Ồng Lò Văn Nịa, ơm tàm thôn Ia Đal, xã Ia Đal, pà gĭt: “Làng bol chờ hờp ngan tài bơh broă lơh bơt bơtàu ƀòn lơgar là lơh làng bol in, lơh ai să tờm he in nàng bơtàu tơnguh, brồ guh uă rlau tai. Bơt bơtàu ƀòn lơgar pa làng bol tă pơgồp bal dà kơl hề, bơta pràn mờ là pà is ù lơh gùng lòt ƀòn lơgar. Bơt bơtàu ƀòn lơgar pa làng bol dờp geh bơta kwơ uă ngan, lơh geh ală bơta bơtàu tơnguh lơh sa hìu bơnhă sơr lèt gan lik klàs rƀah kơ̆ kơl jăp. Bơta niam chài, lơh sa bơtàu tơnguh uă loh làng ngan pơndrờm mờ tơngai ờ hềt bơt bơtàu ƀòn lơgar pa” .

Mờ broă geh dờp lơh sir broă lơh jơnau kờñ ƀòn lơgar pa, xã Ia Đal là xã tiah nhàr lơgar dơ̆ 7 tàm kờp jơh 13 xã tiah nhàr lơgar bơh càr Kon Tum dê lơh sir broă lơh jơnau kờñ ƀòn lơgar pa. Tus tŭ do, jơh gùt càr Kon Tum neh geh 48 tàm kờp jơh khà 85 xã bơh càr dê lơh sir broă lơh jơnau kờñ ƀòn lơgar pa, tàm hơ̆ geh 4 xã lơh geh jơnau kờñ ƀòn lơgar pa gơguh uă mờ 1 xã lơh geh jơnau kờñ ƀòn lơgar pa lam lài.

Mờ nùs nhơm kràñ cê jơh nùs lơh sir ală jơnau kờñ bơtàu tơnguh lơh sa- mpồl bơtiàn geh ai tàm nam 2024, tàm dơ̆ lòt lơh broă bơt bơtàu ƀòn lơgar pa mờ tiah drà niam jak, 10 kơnhoàl, ƀòn dờng bơh càr Kon Tum dê neh lam lơh ală tơngume geh ngan nàng pơn đơl pràn lơh ngan lơh jat. Tàm hơ̆, tơrgùm tàm broă lơh ală broă lơh lơh sa, rồ ù gời lơh geh ƀlàng sre, bơtàu tơnguh phan bơna OCOP; lơh pa, lơh niam wơl broă lơh gùng lòt, rƀòng dà, hìu niam chài; dong kờl ală hìu bơnhă geh dà kơl hề mờ Dà lơgar geh rài kis kal ke lơh niam wơl hìu đam, lơh niam wơl suơn chi nàng bơtàu tơnguh lơh sa; sơlơ tơnguh broă lơh atbồ, sền gàr mờ tam uă brê...

Là kơnhoàl geh rlau 79 kơi sồ gùng tiah nhàr lơgar Dà lơgar rềp nhàr bal mờ lơgar Campuchia, tàm dơ̆ lòt lơh broă bơt bơtàu ƀòn lơgar pa geh bơyai lơh tàm xã Ia Đal, ồng Võ Anh Tuấn, Củ tịc Ủy ƀan Ñân zân kơnhoàl Ia H’Drai, pà gĭt:“Đảng ƀộ, gơnoar atbồ mờ làng bol kơnhoàl dê ai jơnau kờñ bơt bơtàu kơnhoàl tus lồi nam 2025 sền bal là kơnhoàl lơh geh ală broă jàu bơh kơnhoàl ƀòn lơgar pa dê. Jat tàm ală Nghị quyết bơh Tiñ Đảng ƀộ, kơnhoàl kung neh geh broă rơndăp lơh geh ngan nàng tơl xã in lơh sir broă lơh ƀòn lơgar pa. Mờ jơnau kờñ kung bè là broă rơndăp lơh neh geh ai bol añ ai jơh bơta pràn pơnđơl pràn lơh ngan kung bè neh geh broă lơh geh ngan nàng ai xã Ia Tơi tus nam 2024 lơh sir broă lơh ƀòn lơgar”.

Sền gĭt kòn cau Sơdàng geh bơta gĭt wă, geh kơnòl mờ mpồl bơtiàn uă ngan ƀuơn ngan tàm broă bơtàu tơnguh broă lơh lơh sa mpồl bal, bơh ală bơta tờm hơ̆, tàm xã Đăk Na, kơnhoàl Tu Mơ Rông, càr Kon Tum neh lơh geh 3 Hợp ták xã mờ 3 Mpồl lơh broă bal. Broă tus bal tàm ală Hợp ták xã neh dong làng bol tam gơl geh bồ tơngoh kơlôi sơnơng tàm broă lơh sa. Ồng Võ Nguyên Sinh, Củ tịc Hội đồng Quản trị mơkung là Kwang atbồ Hợp ták xã Lòt nhơl mờ Phan lơh sơnơm tơlir Siu Puông mờ 43 xã tàm mpồl bal ndrờm là làng bol kòn cau Sơdàng, pà gĭt:“Xã tàm mpồl tus bal Hợp ták xã den làng bol tam gơl geh gùng dà broă lơh bồ tơngoh kơlôi sơnơng lơh sa, kơlôi sơnơng bơtàu tơnguh lơh sa. Tus bal Hợp ták xã nàng tam kơnuh sơnơm Ngọc Linh den gàr geh brê mờ bơtàu tơnguh kơ̆ kơl jăp. Tài bơh làng bol tam gơl geh bơta kơlôi sơnơng bơh hơ̆ lơh geh ală broă lơh lơh sa ndai. Lơyah tơngai den tam kơnuh sơnơm jriang, ròng iar, ròng sur nàng drơng broă lòt nhơl. Ai jŏ jòng den geh kơnuh sơnơm Ngọc Linh. Làng bol geh priă jền bơh lơyah tơngai mờ jŏ tơngai”.

 Mờ gơnoar broă là cau tờm tàm broă bơt bơtàu ƀòn lơgar pa, uă mpồl bơtiàn jơi bơtàn dồ ết nă cau càr Kon Tum neh pơnđơl pràn lơh ngan tàm broă lơh sa yờ tơnguh uă priă jền mờ pơgồp bơnah lơh tam gơl uă ngan muh mat ƀòn lơgar dê. Kờp tus lồi nam 2023 neh geh 32 thôn, ƀòn tiah làng bol jơi bơtiàn dồ ết nă cau bơh càr Kon Tum dê lơh geh jơnau kờñ broă lơh ƀòn lơgar pa. Jơh ală xã tàm càr lơh geh bơh 15 broă jàu ƀòn lơgar pa rlau hơđang. Jơh gùt càr Kon Tum tŭ do geh 42 xã lơh geh broă lơh jơnau kờñ ƀòn lơgar pa, tàm hơ̆ geh uă xã tiah làng bol jơi bơtiàn dồ ết nă cau neh lơh sir broă lơh ƀòn lơgar pa.