Geh bơyai lơh tàm tơngai 3 ngai, bơh ngai 29/11 tus ngai 01/12/2023 tàm ƀòn dờng Kon Tum, càr Kon Tum, Ngai chờ Niam chài, Tàp pràn să jan mờ Lòt nhơl ală jơi bơtiàn dồ ết nă cau tàm tiah Tây Nguyên dơ̆ 1, nam 2023, nàng kờñ jờng rơ ală bơta niam chài bơh yau niam bơnĕ ngan bơh ală jơi bơtiàn tàm tiah Tây Nguyên, mơkung yal tơngĭt hòi jà lòt nhơl. Ngai chờ bơh Ƀộ Văn hóa, Thể thao mờ Du lịc pơgồp bal mờ bàr pe Ƀộ, ngàñ Dà lơgar mờ 5 càr tàm tiah Tây Nguyên, tàm hơ̆ geh ală càr: Kon Tum, Gia Lai, Dăk Lăk, Dăk Nông mờ Lâm Đồng bơyai lơh. Tus bal Ngai chờ geh pơgap 1 rơbô nă cau chài, cau chài lơh, cau tus bal tàm pơrlòng làng bol mờ ala mat ală jơi bơtiàn gam ơm kis tàm ù tiah 5 càr Tây Nguyên dê.

Đơs tàm dơ̆ sơnđờm mut lơh mờ đơng lam Ngai chờ, ala mat Đảng, Dà lơgar Đại tướng Tô Lâm, Kwang bàng Ƀộ Cíñ trị, Ƀộ trưởng Ƀộ Kwang àng đơs sùm: Đảng mờ Dà lơgar he sùm sền gròi ngan bơtàu tơnguh tơl làm mờ kơ̆ kơl jăp tàm tiah Tây Nguyên. Bơh tŭ tam gơl pa tus tŭ do neh ai lơh jat uă Nghị quyết, Cỉ thị, jơnau đơs pơndŭt bè broă do. Ngai 06/10/2022 Ƀộ Cíñ trị khoă XIII neh ai lơh jat Nghị quyết sồ 23 bè bơtàu tơnguh lơh sa- mpồl bơtiàn mờ sền gàr lơngăp lơngai Dà lơgar, lơngăp lơngai Tây Nguyên tus nam 2030, bơta rơndăp lơh tus nam 2045, tàm hơ̆ sền gĭt “Bơt bơtàu rài niam chài Tây Nguyên gơguh jak, cèng bềng bơhiàn niam chài niam bơnĕ jơi bơtiàn, tơrgùm dùl tàm bơta lila, sền dờng màng ală bơta kwơ niam chài krơi is đah ală jơi bơtiàn, sền do là bơta gơn kơnờm, bơnàng jă ai bơta bơtàu tơnguh mờ mut gơrờm bal mờ dunia bơh tiah do dê”. Đại tướng Tô Lâm, đơs: “Pơn jat tai lơh gơ gơs Nghị quyết XIII bơh Đảng dê mờ broă lơh kwơ màng bơtàu tơnguh niam chài tus nam 2030, Ngai chờ Niam chài, Tàp pràn să jan mờ Lòt nhơl ală jơi bơtiàn tiah Tây Nguyên dơ̆ 1 nam 2023 rơ̆p ngan ngồn gơ gơs tiah bơtòm mat bal, lơh gơrề uă, là dơ̆ nàng làng bol ală jơi bơtiàn Tây Nguyên in tìp mat lơh kuèng, tìp mat tơm bơh bơr, cribơyai mờng chài lơh broă, pơgồp bơnah yal tơngĭt rùp hin, kòn bơnus, gơ̆p bơyô tàm lơgar mờ tàm dunia, pờ ơnàng tŭ tơngai niam wă rò bơcri priă, gơ hòi gơ jà bơtàu tơnguh lòt nhơl tiah Tây Nguyên đơs bal, càr Kon Tum đơs is”.

Tơnơ̆ dơ̆ sơnđờm mut lơh geh bơyai lơh yŭ rơyùm, bơnah lơh chờ mờ broă lơh đơs crih tam ya geh tơngume “Brê bơnơm dờng ơning ơnàng Tây Nguyên- Bơta niam chài tơrgùm bal” lời wơl bơta ngoh rơngăc mờ bơta niam tàm nùs nhơm làng bol mờ năc lòt nhơl dê. Bal mờ pơgap 600 nă cau chài, cau chài lơh, cau tus bal tàm pơrlòng ală jơi bơtiàn 5 càr dê yal tơngĭt ală bơta niam chài mùl gŏ ngan cèng bềng bơta niam bơnĕ Tây Nguyên, tàm dơ̆ sơnđờm mut lơh, dơ̆ sơnrờp làng bol geh sền dơ̆ jañ sơngơr ngai chờ “Mpoong ntas brê bơnơm Tây Nguyên” bơh 500 nă cau ling Họk viện Kảñ sát Làng bol dê ràng tơlik mờ dơ̆ ràng tơlik uh kơwào bơh mờr 100 nă cau ling Mpồl bơyai lơh dơ̆ bơhiàn Kwang àng Làng bol, Ƀộ Tư lệñ Kảñ sát Cơ động dê. Bơh xã Tà Nung, ƀòn dờng Dà Làc, càr Lâm Đồng tus mờ càr Kon Tum tus bal Ngai chờ, cau chài K' The, làng bol kòn cau K’Ho chờ hờp đơs: “Ưn ngài Mpồl bơyai lơh neh lơh geh tiah nhơl do. Do là tiah tơrgùm bal bơh jơh ală bơta niam bơnĕ niam chài bơh jơh ală jơi bơtiàn oh mi tàm ù tiah Tây Nguyên do dê. Do là tiah tơrgùm bal nàng tìp mat, nàng lơh kwèng niam chài, nàng gĭt tai ală bơhiàn, ală bơta niam bơnĕ ngan bơh tơl jơi bơtiàn dê. Bol añ cèng tus tàm do phan soh kòn cau, ală jơnau đơs pơnđick kòn cau K’Ho, den ală phan sa nàng he in tìp mat lơh kwèng bal mờ ală gơ̆p bơyô...”.

Ngai chờ Niam chài, Tàp pràn să jan mờ Lòt nhơl ală jơi bơtiàn tàm tiah Tây Nguyên dơ̆ 1, nam 2023 geh bơyai lơh tàm càr Kon Tum geh bơyai lơh mờ uă broă lơh li la ngan. Tàm hơ̆ broă lơh niam chài bơh yau geh 6 tơngume: Dơ̆ ràng tơlik gơl lơh bơhiàn rài kis pah ngai niam chài bơh yau ală jơi bơtiàn; ràng tơlik yal tơngĭt, yal ală phan bơna bơh yau niam chài bơh ală tiah dê; ràng tơlik yal tơngĭt phan sa bơh yau; dơ̆ tàm pơrlòng niam chài đơs crih tam ya làng bol mờ ràng tơlik phan soh ală jơi bơtiàn tàm tiah Tây Nguyên; ràng tơlik mùl gŏ ngan niam chài jơi bơtiàn tiah Tây Nguyên tàm mpồl bơtiàn niam chài ală jơi bơtiàn Việt Nam dê; ràng tơlik rùp niam ngan niam chài ală jơi bơtiàn tiah Tây Nguyên lòt bal mờ bơta bơtàu tơnguh bơh Dà lơgar dê. Broă lơh tàp pràn să jan,  tàp pràn să jan làng bol geh 5 môn pơrlòng, geh: droh gai, dŭi che, hào jrong tơngi mờ ñhĕt bao tạ. Broă lơh lòt nhơl yal tơngĭt tus mờ làng bol mờ năc lòt nhơl in uă ù tiah niam ngan bơh càr Kon Tum dê.

Bơdìh mờ jơnau kờñ lơh geh ù tiah tàm tơrbŏ bal niam chài, yal tơngĭt tus mờ làng bol in bè bơta niam chài bơh yau bơh làng bol ală jơi bơtiàn Tây Nguyên dê, Ngai chờ Niam chài, Tàp pràn să jan mờ Lòt nhơl ală jơi bơtiàn Tây Nguyên dơ̆ 1 gam là tŭ tơngai kwơ màng ai lòt nhơl Tây Nguyên đơs bal mờ càr Kon Tum đơs is “geh bơyai lơh”. Tàm bơta geh ngan, tŭ do, ală càr tàm tiah Tây Nguyên ndrờm neh lơh geh ală tiah, phan bơna, drơng broă lòt nhơl; geh bơta tàm tơrbŏ bal đah ală tiah tus niam ngan mờ gơ kờñ ngan. Bơh tơngai lơh chờ dê, dùl dơ̆ tai ală bơta niam bơnĕ Tây Nguyên dê geh uă ngan gơ̆p bơyô tàm tiah rềp ngài gĭt tus, lơh geh tai ală tŭ tơngai niam pa ai lòt nhơl tàm ù tiah Tây Nguyên in sơlơ bơtàu tơnguh.