Ai tê sơñio gùng lòt lơh mờ bê tông niam ngan, lòt gan tus ală thôn, ƀòn, kra ƀòn ồng K’ Keo, ơm tàm ƀòn Hàng Làng, xã Gung Reh, kơnhoàl Di Linh, càr Lâm Đồng chờ hờp ngan pà gĭt, muh mat ƀòn lơgar bơh xã dê neh tam gơl uă ngan pơndrờm mờ lài do. Kơnờm geh gùng lòt rê ƀuơn ngan, phan bơna lơh geh bơh lơh sa suơn sre ờ gơtìp cau kă bro bơcăp giă, tơn lơyah bơta ngài đah ƀòn lơgar mờ tiah tờm xã dê... den rài kis phan bơna mờ nùs nhơm làng bol dê neh geh bơtàu tơnguh uă rlau ngan pơndrờm mờ lài do. Lơh geh cồng nha do là kơnờm tàm bơta sền gròi bơcri priă bơh Đảng mờ Dà lơgar dê bè tơl ală bơta, tàm hơ̆ geh broă lơh jơnau kờñ dà lơgar bè bơt bơtàu ƀòn lơgar pa. Ồng K’ Keo, đơs:“Geh bơta gĭt wă do là broă lơh mờ bơta kwơ lài ngan rlau jơh bơh làng bol dê den làng bol jơh nùs jơh tồr dùl nùs bal lơh jat. Tơngai pa do, làng bol neh kơl is phan tam, pà is ù tiah mờ tă pơgồp dà kơl hề nàng bal mờ Dà lơgar bơt bơtàu ƀòn lơgar pa. Dà lơgar den dong kờl mờ làng bol den tă pơgồp bal nàng pờ ơnàng gùng lòt mut tàm ală tiah lơh sa, lơh gùng lòt ƀòn lơgar. Lơh bè lơi nàng bơt bơtàu thôn, ƀòn geh gùng lòt rê ƀuơn ngan, lơh geh tơl bơta niam ngan nàng bơtàu tơnguh lơh sa, dong lơh muh mat ƀòn lơgar ngai sơlơ niam bơnĕ rlau tai”.

Ờ mìng tàm ƀòn Hàng Làng, xã Gung Reh lơm, mờ broă lơh bơt bơtàu ƀòn lơgar pa neh cèng wơl cồng nha ngan ngồn ai jơh gùt ală ƀòn bơh kơnhoàl Di Linh, càr Lâm Đồng dê. Tàm ƀòn Duệ, xã Đinh Lạc, tơnơ̆ tŭ geh dờp là ƀòn niam chài lam lài, làng bol tàm tiah do neh jơh nùs ngan rlau tàm broă sơm bat tê bal mờ gơnoar atbồ bơt bơtàu mờ lơh ală broă jàu ƀòn lơgar pa gơguh uă.

Jat ồng M’Hiu Nguyên, Bí thư Ci ƀộ ƀòn Duệ, kung tài bơh làng bol gŏ geh ală bơta kwơ ngan ngồn bơh broă bơt bơtàu ƀòn lơgar pa dê cèng wơl ai să tờm he mờ ai ƀòn lơgar he in den cau lơi kung tus bal lơm lơh jat jơh nùs ngan. Tàm hơ̆, broă lơh Ngai dơ̆ 7 bơt bơtàu ƀòn lơgar pa neh mờ gam geh gơrề uă pràn kơl dang, dong lơh muh mat ƀòn lơgar dê cèng bơta niam hèr bè tiah drà tờm; geh gùng che ồs đèng sòl àng, geh rơdeh khòm tơrgùm sồ siă, gùng lòt mut tàm ƀòn dờng ơnàng mờ sùm tơlir, sàng goh, niam ngan. Ồng M’Hiu Nguyên, đơs:“Tŭ do tàm thôn Duệ neh mờ gam lơh jơh nùs mờ geh cồng nha ngan. Kwang bàng mờ làng bol ndrờm sơm bat tê bal lơh jat Ngai dơ̆ 7 bơt bơtàu ƀòn lơgar pa. Ngan là, gùng lòt tàm sơnah ƀòn sùm tơlir, sàng goh, niam bơnĕ, sồ siă geh khòm tơrgùm, bong đèng sòl àng gùt dar thôn, gơ lơh bè ală gơl gùng tàm thôn ndrờm lơh kơ̆ mờ bê tông lơm... muh mat ƀòn lơgar neh geh tam gơl pa. Đơs bal là rài kis làng bol dê den neh ngai sơlơ geh bơtàu tơnguh rlau”.

Di Linh là kơnhoàl geh làng bol ơm kis là làng bol jơi bơtiàn dồ ết nă cau geh khà uă ngan, rlau 40%, tàm hơ̆ uă ngan là kòn cau K’Ho. Tus tŭ do, jơh gùt kơnhoàl neh geh 18 tàm 18 xã lơh geh jơnau kờñ ƀòn lơgar pa, 2 xã lơh geh jơnau kờñ ƀòn lơgar pa tơnguh uă mờ 1 xã lơh geh jơnau kờñ ƀòn lơgar pa lam lài. Ồng Vũ Đức Nhuần, Phó Củ tịc Ủy ƀan Ñân zân kơnhoàl Di Linh pà gĭt, nàng pơn jat tai lam lơh geh cồng nha broă lơh bơt bơtàu ƀòn lơgar pa tàm tơngai bơh nam 2021-2025, Mpồl Lơh kơnòl broă sùm Huyện ủy kơnhoàl Di Linh neh lơh rơndăp broă lơh sồ 04 lơh broă lơh Ngai dơ̆ 7 bơt bơtàu ƀòn lơgar pa tàm gùt jơh ală ƀòn lơgar. Bơh mờr 1 nam lam lơh jat, broă lơh neh lơh geh bơta gơ rề uă pràn kơl dang tàm ală rơnàng làng bol mờ kwang bàng đảng viên. Tàm hơ̆, gơnoar broă bơh làng bol tàm broă lơh bơt bơtàu ƀòn lơgar pa neh ngai sơlơ geh đơs nền mờ lơh jat niam geh cồng nha. Do geh sền là bơta tờm ngan nàng kơnhoàl in lơh geh ală jơnau kờñ kờñ pal geh mờ tơl nàng lơh tus geh dờp là kơnhoàl ƀòn lơgar pa tàm nam 2024. Ồng Vũ Đức Nhuần, đơs: “Rơndăp broă lơh 04 ngai 18 nhai 01 nam 2023 bơh Mpồl lơh kơnòl broă sùm Huyện ủy kơnhoàl là dùl rơndăp broă lơh tơl làm bè bơt bơtàu ƀòn lơgar pa. Jàu jơnau kờñ ai tơl xã, tơl thôn in nàng lơh ală jơnau kờñ bè ƀòn lơgar pa. Jơh bal kơnhoàl geh 9 broă jàu bè ƀòn lơgar pa den kung pal lơh geh. Tàm tơngai pa do den pah dơ̆ tus ngai dơ̆ 7, ngai rơlô den Củ tịc, Ƀí thư kơnhoàl, kwang đơng lam bồ Ủy ƀan Ñân zân kơnhoàl den bol añ pal tam pà bal mờ ală xã nàng sồr lơh ngan, hơ̆ sồng bal mờ làng bol lơh jat ală tơngume bè: toah wàs rbòng dà, bơto pơlam làng bol tam gơl sồ... Neh lơh geh bơta gơrề uă dờng ngan tàm làng bol bè gơnoar broă bơh he dê tàm broă bơt bơtàu ƀòn lơgar pa”.

Ờ mìng pơnđơl pràn lơh ngan lơh geh jơnau kờñ ƀòn lơgar pa tàm nam 2024 lơm, kơnhoàl Di Linh gam geh tai jơnau kờñ tàm nam 2025 rơ̆p lơh jat ală broă jàu kơnhoàl ƀòn lơgar pa gơguh uă, mờ ết ngan rlau jơh là bơh 8 xã lơh geh jơnau kờñ ƀòn lơgar gơguh uă mờ 5 xã lơh geh jơnau kờñ ƀòn lơgar pa lam lài. Jat tàm ală bơta lơh jat niam bơta pràn tam klăc dờng jơi bơtiàn, ai làng bol lơh mpồl cau tờm, mờ là cau tờm tàm broă lơh jat srơh bơt bơtàu ƀòn lơgar, pin dờn ngan là kơnhoàl Di Linh rơ̆p gờñ lơh geh ală jơnau kờñ neh geh ai, pơgồp bơnah bơt bơtàu tiah kơh bơnơm Di Linh ngai sơlơ pas niam.