Gơwèt mờ kòn cau Sơdàng ơm tàm ƀòn Mô Bành 2, xã Đăk Na, kơnhoàl Tu Mơ Rông, càr Kon Tum, ràng tơlik dròng cing jañ mồng mờ phan sa bơh yau tŭ do neh gơ gơs phan pơn rơ ngan nàng gơ hòi gơ jà năc lòt nhơl. Kơnờm bè hơ̆ mờ broă bơt bơtàu ƀòn lơgar pa tàm ƀòn Mô Bành 2 kung geh uă bơta ƀuơn ngan sơl. Bi Nguyễn Thị Thiên Nga geh bèp là cau yoan, mè là kòn cau Sơdàng tŭ do lơh Phó Củ tịc Mpồl tam klăc cau ùr xã Đăk Na pà gĭt, làng bol tàm ƀòn chờ hờp ngan tài bơh geh tai dùl broă lơh pa, geh tai priă jền mờ prap gàr, ngui niam bơta kwơ niam chài bơh yau bơh jơi bơtiàn he dê tai:“Tàm xã Đăk Na geh ñrùh dà Siu Puông niam ngan, dà sàng lơngơm mrềt làng bol gĭt wă tàm broă sền gàr sàng goh tiah brê. Nàng drơng broă năc lòt nhơl in làng bol sùm lơh ală phan sa bơh yau bơh kòn cau Sơdàng dê, bè piang mbar prùng, ƀàñ ngke rơpu, ka prùng tàm ding... Bơh ngai lơh gah lòt nhơl mpồl bơtiàn làng bol pin dờn, ngăc ngar rlau uă ngan”.

Đăk Na là xã tiah III gơwèt xã kal ke ngan mờ ngài mờ anih tờm kơnhoàl Tu Mơ Rông, càr Kon Tum dê pơgap 50 kơi sồ rê tiah đah mat tơngai mut. Xã geh 12 thôn, ƀòn mờ rlau 3 rơbô nă cau jơh ală cau tàm do ndrờm là làng bol kòn cau Sơdàng lơm, kis kơldìng jơh lơm tàm broă lơh sa suơn sre. Tềng đăp bơta geh ngan rài kis bơh làng bol dê gam uă ngan kal ke, nàng lơh geh bơta bơtàu tơnguh mhar tàm broă bơt bơtàu geh ƀòn lơgar pa, Đảng ƀộ, gơnoar atbồ xã Đăk Na sền gĭt sơnđờm bơh broă hòi jà tă pơgồp bal, lơh jat niam bơta pràn niam chài bơh yau tàm làng bol. Bơh cồng nha lơh geh bơh sơnrờp tàm broă bơtàu tơnguh lòt nhơl mpồl bơtiàn, làng bol sơlơ pin dờn rlau tai tus bal tàm ală broă lơh kă bro, drơng broă. Cồng nha mờ broă lơh tam, lơh gơlik kơnuh sơnơm jriàng, kơnuh sơnơm Ngọc Linh mờ broă lơh kă bro, bi Y Za Nhi, hìu ơm tàm ƀòn Mô Bành 1, xã Đăk Na là rơnàng kơnòm să pơn rơ jak kòn cau Sơdàng dê ngăc ngar, khin cha kơlôi, khin cha lơh:“Ală gơ̆p bơyô kơnòm să kờñ bơtàu tơnguh lơh sa ai hìu bơnhă, ai ƀòn lơgar in pal geh bơta khin cha tàm broă lơh, lơh broă lơi kung pal kràñ cê jơh nùs lơh tus gùng tus dà. Dilah ală bơyô geh bơta gơguh jak, geh bơta khin cha den gơtùi lơm lơh pas tàm ƀòn lơgar tờm he dê mờ broă lơh tam kơnuh sơnơm jriàng halà kơnuh sơnơm Ngọc Linh. Tŭ do ală bơta phan lơh sơnơm do tàm ƀòn lơgar Tu Mơ Rông he dê tăc bro là niam ngan”.

Sền gŏ kòn cau Sơdàng geh bơta gĭt wă, geh kơnòl mờ mpồl bơtiàn uă ngan ƀuơn ngan tàm broă lơh uă broă lơh lơh sa mpồl bal, bơh ală cau lơh tờm bơh sơnrờp, tàm xã Đăk Na tŭ do neh lơh geh 3 Hợp ták xã mờ 3 Mpồl lơh broă bal. Broă tus bal tàm ală Hợp ták xã neh dong làng bol tam gơl geh bồ tơngoh kơlôi sơnơng tàm broă lơh broă sa. Ồng Võ Nguyên Sinh, Củ tịc Hội đồng Quản trị mơkung là Kwang atbồ Hợp ták xã Lòt nhơl mờ Phan lơh sơnơm tơlir Siu Puông bal mờ 43 nă cau lơh broă bal ndrờm là kòn cau Sơdàng, pà gĭt: “Cau tàm mpồl tus bal tàm Hợp ták xã den bol khi tam gơl geh gùng dà broă lơh bồ tơngoh kơlôi sơnơng lơh gơlik phan, bồ tơngoh kơlôi sơnơng lơh sa. Tus bal Hợp ták xã nàng tam kơnuh sơnơm Ngọc Linh den sền gàr geh mờ bơtàu tơnguh kơ̆ kơl jăp. Tài bơh bol khi tam gơl geh bơta kơlôi sơnơng bơh hơ̆ lơh geh ală broă lơh lơh sa ndai. Lơyah tơngai den tam kơnuh sơnơm jriàng, den ròng iar, ròng sur nàng drơng broă lòt nhơl. Ai jŏ jòng den geh kơnuh sơnơm Ngọc Linh. Làng bol lơh geh priă jền lơyah tơngai mờ jŏ tơngai”.

Bơh broă lơh ngui niam geh bơta pràn niam chài bơh yau mờ ală bơta kwơ niam bơnĕ tàm broă bơt bơtàu ƀòn lơgar pa, uă thôn, ƀòn kòn cau Sơdàng tàm kơnhoàl Tu Mơ Rông, càr Kon Tum tŭ do neh gơ gơs tiah năc lòt nhơl rềp ngài dê. Uă Hợp ták xã, Mpồl lơh broă bal tam phan lơh sơnơm, bơtàu tơnguh lòt nhơl mpồl bơtiàn mờ ală cau tàm mpồl là kòn cau Sơdàng lơh broă sa geh cồng nha mờ dong làng bol tơnguh priă lơh geh, sơlơ bơtàu tơnguh rài kis.

Tơrgùm kờp bơh Ủy ƀan Ñân zân kơnhoàl Tu Mơ Rông pà gŏ tàm nam 2023 neh geh rlau 10 rơbô dơ̆ năc lòt nhơl tus mờ kơnhoàl. Do là cồng nha pal cih dờp ngan gơwèt mờ kơnhoàl Tu Mơ Rông, kơnhoàl tiah sar lơgar ngài kal ke uă ngan bơh càr Kon Tum dê mờ 95% khà kờp làng bol là kòn cau Sơdàng. Ồng Võ Trung Mạnh, Củ tịc Ủy ƀan Ñân zân kơnhoàl Tu Mơ Rông pà gĭt bơta pràn niam chài bơh yau sùm geh kơnhoàl gĭt nền là bơnàng jă kơ̆ kơl jăp tàm broă bơt bơtàu ƀòn lơgar pa. Broă hòi jà geh ală priă jền do nàng bơt bơtàu ƀòn lơgar pa neh dong làng bol sơlơ pin dờn, ngăc ngar lơh geh bơta gơ kờñ, bơta krơi is mờ gàr niam sùm rài kis kơ̆ kơl jap, ring bal: “Huyện uỷ kơnhoàl, Ủy ƀan Ñân zân kơnhoàl Tu Mơ Rông sền gĭt bơta tờm nàng bơtàu tơnguh lơh sa- mpồl bơtiàn hơ̆ là atbồ, sền gàr tam uă brê; tam phan lơh sơnơm, ròng phan tềng hơđơm mƀur chi brê pơgồp bal mờ năc lòt nhơl hơ̆ là gùng lòt bơtàu tơnguh sùm. Jat tàm hơ̆ kơnhoàl neh geh uă broă lơh, broă rơndăp lơh, rơndăp broă lơh nàng ngui bơta ƀuơn, bơta pràn, tàm hơ̆ rơndăp ù tiah ngan ngồn ală tiah lòt nhơl; sền gĭt broă bơcri priă ală tơngume tờm mờ lòt nhơl kờñ nàng gơ hòi gơ jà năc lòt nhơl nàng làng bol dờp geh bơta kwơ uă ngan rlau jơh tàm broă lơh lòt nhơl”.

Mờ broă lơh kah wơl, ngui geh bơta pràn niam chài bơh yau, làng bol jơi bơtiàn dồ ết nă cau tàm kơnhoàl Tu Mơ Rông đơs is mờ càr Kon Tum đơs bal gam ngai sơlơ ngăc ngar, pin dờn tàm broă bơt bơtàu ƀòn lơgar pa. Kờp tus lồi nam 2023 neh geh 32 thôn, ƀòn tiah làng bol jơi bơtiàn dồ ết nă cau càr Kon Tum dê lơh sir broă lơh ƀòn lơgar pa. Jơh ală xã tàm càr lơh geh jơnau kờñ bơh 15 broă jàu ƀòn lơgar pa rlau hơ đang. Gùt càr Kon Tum tŭ do geh 42 xã lơh sir broă lơh ƀòn lơgar pa, tàm hơ̆ uă xã tiah làng bol jơi bơtiàn dồ ết nă cau neh lơh sir broă lơh ƀòn lơgar pa.