Di kàl rơlô bơkang nam do, bè hơ̆ sùm bơh drim ngai dơ̆ 2 tus ngai dơ̆ 6 tàm poh, 40 nă kơnòm dềt geh rài kis kal ke tàm ƀòn Trol Đeng, ƀòn drà dềt Chư Ty, kơnhoàl Đức Cơ den chờ hờp ngan tus mờ ơdŭ bơsram ing do tàm hìu bơsram ƀòn dê tơn. Bulah ală kơnòm dềt 6 sơnam halà ală kơnòm neh 10 sơnam, kung ndrờm kờñ ngan mờ sră, gai cih mờ ală tŭ bơsram tàm bơrlŭ bal mờ tŭ nhơl. Oh Rơ Mah H’xiêu, 7 sơnam, ơm tàm ƀòn Trol Đeng, ƀòn drà dềt Chư Ty, kơnhoàl Đức Cơ, đơs: “Kòn bơsram ơdŭ 2, lòt bơsram geh nhơl ală bơta nhơl, ùr pơgru bơto kòn in sền sră, kòn lòt bơsram kàl rơlô bơkang gơ lơh chờ hờp ngan”.

Ai oh H’Nhi Ê Ban, 10 sơnam gơ lơh pin dờn rlau tŭ geh lòt bơsram tàm ơdŭ bơsram do:“Nam do oh guh ơdŭ 5, lòt bơsram chờ hờp ngan, geh iăt ùr pơgru bơto jơnau bơsram, kòn kờñ ngan lòt bơsram kàl rơlô bơkang bè do”.

Ùr pơgru Nông Ngọc Huân, (pơgru hìu bơsram kấp pe Lê Hoàn, kơnhoàl Đức Cơ) là 1 tàm ală cau pơgru tus bal is bơto ai kơnòm dềt ƀòn Trol Đeng in. Tàm do, ùr pơgru lơbơn niam ngan bơto ai ală kơnòm dềt tàm do in bơh broă cih akhar, bơsram sền akhar tus lơh ală jơnau toán ƀuơn ngan. Ùr pơgru Nông Ngọc Huân pà gĭt, añ gơ lơh chờ hờp ngan tŭ ală kơnòm dềt tàm tiah kal ke sơlơ gĭt wă rlau tai tàm tơl dơ̆ bơsram: “Ală kơnòm mut bơsram ơdŭ 1 ală ùr pơgru sền gròi bơto pơlam ală kơnòm dềt in sền sră mờ cih akhar, mơkung rcang tai ai ală kơnòm dềt in bàr pe bơta chài gĭt wă tàm rài kis. Ală kơnòm dờng rlau den bơta chài sền sră mờ cih neh gĭt rao, mơya nàng ală kơnòm in gơrờm bal mờ khin cha den ală ùr pơgru rơ̆p geh ală jơnau bơsram is, geh ală broă lơh nàng ală kơnòm dềt in bơsram tàp tai bơta chài kis. Gŏ ală kơnòm dềt sơlơ gĭt uă rlau, chờ hờp rlau, tus bal tàm ală broă lơh jơh nùs rlau”.

Jat ùr pơgru Lê Thị Xuân, đoàn viên Đoàn ơruh pơnu ƀòn drà dềt Chư Ty, kơnhoàl Đức Cơ yal, bulah ală bơta suơ̆i siar, pal lòt bơsram tàm trồ mìu càl mơya ală kơnòm dềt kung gam tơryang tơryồng lòt tàm ơdŭ bơsram. Ơdŭ bơsram kàl rlô bơkang gời tàm ƀòn Trol Đeng ờ mìng cèng tus jơnau bơsram gĭt wă, bơta chài is ai ală kơnòm bơsram in lơm mờ gam dong ală gơ̆p bơyô kơnòm să dong kờl is in geh tai bơta sền gĭt, geh drơng broă mpồl bơtiàn mờ ngai sơlơ dờng pràn rlau. Ùr pơgru Lê Thị Xuân, đơs: “Tàm tŭ bơto tai tàm do den añ kung gŏ ală kơnòm dềt jơh nùs ngan, bulah trồ mìu, càl mơya ală kơnòm dềt hơ̆ kung tus tàm ơdŭ tơl làm, lòt bơsram geh tŭ gam lam oh jat bal sơl. Ală kơnòm dềt suơ̆i siar uă ngan mơya gŏ nùs nhơm bơsram sră bơh ală kơnòm dềt dê niam ngan. Añ kơ̆p kờñ là broă lơh do rơ̆p geh pơn jat tai lơh sùm tàm ală kàl rơlô bơkang nam tơnơ̆”.

Bi Lê Thị Thu, Ƀí thư Đoàn Ơruh pơnu ƀòn drà dềt Chư Ty pà gĭt, ơdŭ bơsram kàl rơlô bơkang geh lơh tàm ƀòn Trol Đeng là ơdŭ bơsram lơh tơrlòng lài bơh ală bơyô kơnòm să ƀòn drà dềt dê tàm kàl rơbô bơkang nam do. Mpồl lơh broă rơ̆p pơnđơl pràn lơh ngan pơn jat tai lơh sùm broă lơh do tàm ală nam tơnơ̆ nàng dong ală kơnòm dềt tiah kal ke in geh tŭ niam nàng bơsram sră, nhơl ñiŏ mờ dờng pràn tơl làm. Bi Lê Thị Thu, đơs: “Ală đoàn viên geh uă ngan bơta pơn đơl pràn lơh ngan nàng hòi jà ală kơnòm dềt tus tàm ơdŭ nàng boto ai ală kơnòm in ală jơnau bơsram, ală bơta chài kờñ pal geh tàm rài kis. Đoàn Ơruh pơnu kung hòi jà tă pơgồp bơh ală cau geh nùs nhơm niam nàng ală kơnòm dềt in geh tŭ lik bơdìh nhơl tơl nă kơnòm rơ̆p geh 1 hộp sữa, dong kờl sră măi, sră cih, ào mpha yau mờ ală phan ngui bơsram sră nàng lơh geh tiah bơsram mờ tiah nhơl niam ngan ai ală kơnòm dềt in”.

Nam bơsram pa neh mờr tus rềp, bàr pe tiah ai kơnòm dềt lòt bơsram lài 2 poh nàng mờng kwèng tàm hìu bơsram, ơdŭ bơsram. Gam wơl uă ngan ală hìu bơsram rơ̆p ai kơnòm bơsram ală kấp in lòt bơsram tàm bồ poh tus.

Dùl kàl rơlô bơkang mờ ală ơdŭ bơsram ƀarah ƀarài ngan mơya bềng bơta kờñ gơboh, ală kơnòm dềt tiah kal ke bè geh tai bơta gơn kơnờm mờ bơta pin dờn nàng brồ guh. Gơwèt mờ ală bơyô kơnòm să geh nùs nhơm dong kờl is, bulah mìng là ală dơ̆  bơto dồ ết lơm mơya neh cèng tus uă bơta mờng chài mờ tih dờng rlau tŭ gĭt wă jrô rlau tai bè rài kis làng bol kòn cau tiah sar lơgar ngài dê.